Сариев саясий партиялардын лидерлери менен үгүт компаниясы боюнча пикир алышат

БИШКЕК, 15-сен. — Sputnik. Премьер-министр Темир Сариев бүгүн парламенттик шайлоого катыша турган саясий партиялардын өкүлдөрү менен жолугуп, үгүт кампаниясынын жүрүшү, мыйзамдуу добуш берүү боюнча пикир алышат. Бул туурасында өкмөт башчысынын маалымат катчысы Бакыт Асанов Sputnik маалымат агенттигине билдирди.

"Премьер буга чейин үгүт компаниясынын жүрүшү боюнча жергиликтүү бийлик жана мамлекеттик органдардын жетекчилерине бардык саясий күчтөргө бирдей шарт түзүп берүүнү тапшырган. Ал кандай өтүп жатат, эмне маселелер болуп жатат, булар туурасында пикир алмашууну көздөдү", — деди Асанов.

Премьер-министрдин маалымат катчысы өкмөттүн көздөгөнү — шайлоонун жыйынтыгын эл жана саясий партиялар таанышы керек экендигин айтты. 

"Азыртадан баштап алар менен пикир алмашып, эгер кандайдыр бир кемчиликтер болсо, партиялардын пикирин угуу менен өкмөт өзүнө жыйынтык чыгарууну көздөп жатат", — деди Асанов.

Премьер буга чейин укук коргоо органдарына үгүт өнөктүгү учурунда жана шайлоо күнү коомдук тартипти сактоо жана коопсуздукту камсыз кылуу боюнча иштерди күчөтүүнү эскерткен. 

Парламенттик шайлоо 2015-жылдын 4-октябрында өтөт. Ага 14 саясий партия ат салышууда. 3-сентябрда башталган үгүт иштери 2-октябрда аяктайт. 3-октябрь — шайлоо алдындагы "Жымжырттык күнү".