БИШКЕК, 27-мар. — Sputnik. Оппозициянын өкүлү Эрнест Карыбековду сот 12-майга чейин камакка алуу чечимин чыгарды. Бул тууралуу Адиль Турдукулов Sputnik Кыргызстан маалымат агенттигине билдирди.
Анын айтымында, Карыбековдун баш коргоо чарасы боюнча чечимди Биринчи Май райондук соту кабыл алган.
"Эрнест Карыбековду 12-майга чейин камакка алуу боюнча соттун өкүмү чыкты. Ал УКМКнын убактылуу кармоо жайында кармалат", — деди Турдукулов.
Белгилей кетсек, УКМК буга чейин бийликти басып алууга аракет көргөн деген шек менен оппозициянын өкүлдөрү Кубанычбек Кадыров менен Бектур Асановду камакка алган. Андан кийин ушундай эле шек менен Кубанычбек Кадыров дагы кармалган болчу.
21-мартта Интернетте Кубанычбек Кадыров, Дуулатбек Турдуналиев менен Бектур Асановдун бийликти басып алуу боюнча сүйлөшүп жатат деген видеосу тараган. Видеодо бийликти басып алуунун жолдору жана акчаны бөлүштүрүү талкууланган.
Оппозициянын өкүлдөрү аталган видео монтаж деп айтышкан.
