БИШКЕК, 16-май — Sputnik. Ноокендик ишкерге Ош — Бишкек жолунан кол салып, автоунаасындагы 450 миң долларын алып кеткендердин үчөө кармалды. Бутунан ок жеген жабырлануучу учурда медиктердин көзөмөлүндө турат деп билдирди ИИМдин өкүлү.
Ал арада Ош шаардык ИИБдин кылмыш иштерин иликтөө тобу "Допинг" жана "Нелегал" операцияларын өткөрүп, баңгизат менен кара-суулук Улукбек аттуу 25 жаштагы жаранды кармаган.
Милиция анын автоунаасын текшергенде эки миң доллар өлчөмүндөгү каражат чыккан. Иликтөө андан ары уланып, тинтүү учурунда Кара-Суу шаарындагы үйүнүн гаражына катылган 10 миң доллар табылган.
"Ноокендеги каракчылык боюнча маалыматыбыз жок эле. Биз кармаган Улукбек, Аббас жана Дилшот аттуу жарандардын ноокендик ишкерге кол салууга тиешеси бар экендиги далилденди", — деп билдирди ИИМ өкүлү.
Кылмыш иштерин иликтөө тобу жалпысынан аталган жарандардан 12 миң 200 доллар таап чыккан.
"Ноокендеги ишкерди карактагандар Улукбекке 20 миң доллар берген экен. Биз андан 12 миң, ал эми Дилшоттон 200 доллар таптык", — деди ал.
Алынган каражат менен тиешелүү документтер толтурулуп, Жалал-Абаддык ички иштер башкармалыгынын тергөөчүсүнө өткөрүп берилген.
"Улукбек учурда баңгизаты боюнча берене менен кармалып, убактылуу тергөө жайына отургузулду. Иликтөө иштери жүрүп жатат. Берки экөө окуяны иликтеген Жалал-Абаддагы ыкчам топко өткөрүп берилди", — деди ИИМ өкүлү.
Ал учурда эркиндикте жүргөн алардын дагы 2-3 шеригин кармоо боюнча тиешелүү иштер жүргүзүлүп жаткандыгын кошумчалады.
