ЕРЕВАН, 20-май – Sputnik. Премьер-министр Сооронбай Жээнбеков Арменияда өтүп жаткан Евразиялык өкмөт аралык кеңешинин жыйынынын алкагында Казакстандын премьер-министри Карим Масимов менен жолукту.
Учурда КР өкмөт башчысы Армениянын борбор калаасы Ереван шаарында Евразиялык экономикалык биримдиктин өкмөт аралык кеңешине катышууда.
Масимов Жээнбековду премьер-министрлик кызматка дайындалышы менен куттуктап, мындан аркы ишине ийгилик каалады. Өз кезегинде Жээнбеков Масимовго ыраазычылык билдирип, казак тарапты күзүндө Кыргызстанда өтө турган Экинчи дүйнөлүк көчмөндөр оюндарына жана 7-июнда Бишкекте өтө турган КМШ өлкөлөрүнүн өкмөт башчыларынын жыйынына чакырды. Мындан тышкары, тараптар эки өлкөнүн учурдагы мамилесин талкуулап, аларды бекемдөө аракеттеринин зарылдыгын белгилешти.
Эскерте кетсек, жыл башынан бери Кыргызстандан казак жергесине 1400 тонна картошка экспорттолуп, анын 113 тоннасынан ылаң табылганынан улам кайра артка кайтарылган. Премьер Сооронбаевдин тапшырмасы менен аталган маселе боюнча Айыл чарба жана мелиорация министрлигинин, Ветеринардык жана фитосанитардык коопсуздук боюнча мамлекеттик инспекциянын адистеринин комиссия түзүлүп маселе менен жеринен таанышуу үчү Астана шаарына барган.
Эки өкмөт башчынын жолугушуусуна биринчи вице-премьер Олег Панкратов, тышкы иштер министринин орун басары Эмил Кайкиев, премьер-министрдин кеңешчиси Нурсулу Ахметова катышты.
Евразиялык экономикалык биримдикке Кыргызстан, Россия, Казакстан, Белоруссия жана Армения мамлекеттери мүчө. Кыргызстан аталган биримдикке 2015-жылдын 12-августунда расмий кошулган.
