БИШКЕК, 12-мар. — Sputnik. Америка президентинин улуттук коопсуздук боюнча мурдагы кеңешчиси Майкл Флинн Түркия бийлиги үчүн АКШда жашап жаткан Фетхуллах Гүлен жөнүндө маалымат чогулткан. Бул тууралуу РИА Новости New York Times басылмасына шилтеме жасап билдирди.
Маалыматка ылайык, Майкл Флиннди Түркиянын президенти Режеп Тайип Эрдогандын администрациясына жакын адамдар жалдаган. Буга чейин анын фирмасы мындай кызмат көрсөтүү үчүн 500 миң доллар алгандыгы айтылат.
Ал макала азыр да коомчулуктун назарында турат.
2016-жылдын 16-июлунда көтөрүлүшчүлөр Түркияда төңкөрүш жасоого аракет кылган. Негизги каршылыктар Анкара жана Стамбул шаарларында болгон. Көтөрүлүш токтотулганы менен 240 түрк жараны каза таап, 2 миңден ашык адам жаракат алган.
Түрк бийлиги төңкөрүш аракетине Гүленди күнөөлөп, АКШдан аны экстрадиция кылууну суранган. Ал эми диний аалым өзү көтөрүлүштү сынга алып, ага тиешеси жок экендигин айтып чыккан.
