ЕАЭБде биринчи болуп Кыргызстан криптовалюта чыгарууну пландап жатат

БИШКЕК, 14-июн. — Sputnik. Кыргызстандын бийлиги улуттук криптовалюта чыгарууга камынып жатканын "Известия" басылмасы жазып чыкты.

Бул долбоорду ишке ашыруу үчүн Россиянын "Крипт НН" компаниясы тартылган. Ал эми жоопкерчилик "Кыргызстан соода үйү" мамлекеттик компаниясына жүктөлгөн. КР өкмөтүнө жакын эки булактын айтымында, жаңы криптовалюта (аталышы GoldenRock болушу мүмкүн) алтынга негизделет.

Кыргызстандын бийлиги алтын кендерин иштетүүнү колго алууга кызыкдар, мындан улам мамлекетке жеке инвестиция тартуу зарылдыгы бар. Каражатты тез арада алуу үчүн криптовалюта чыгаруу чечими кабыл алынган. Эгер бул ишке ашса Кыргызстан ЕАЭБ өлкөлөрү ичинен мындай кадамга барган алгачкы мамлекет болот.

GoldenRock криптовалютасынын ар бир бирдиги (токен) алтынга негизделет. Токенди сатып алгандар алтын кени ишке киргенден кийин аны баалуу металлга алмаштыра алат. Токендин баасы канча болору азырынча белгисиз.

ICO – IPO аналогу (initial Public Offering) — компаниянын акцияларын биринчи жолу биржага чыгаруу. Биржага чыгаруу жагын башкы трейдер "Крипт НН" компаниясы колго алат.

"Кыргызстан соода үйү" мамлекеттик компаниясы криптовалюта үчүн токендерди өз күчү менен чыгарат. Башкы директордун кеңешчиси Улан Мусакунов алтын казуучу компанияларга инвестиция тартуу пландалып жатканын айтты. Андан сырткары, айыл-чарба долбоорлоруна да инвестиция тартуу каралган.

"Кыргызстан соода үйүнүн акционери мамлекет болгондуктан ICO параметрлери өкмөт жана компаниянын өкүлдөрү менен макулдашылууда. Россиялык бир катар компаниялары бизди техникалык жактан колдоого алмай болду", — деген пикирин ал "Известия" басылмасына билдирген.

Маалыматка ылайык, КР өкмөтү ICO өткөрүү менен 5 миллион доллардан 40 миллионго чейин пайда көрүүнү пландап жатат. Бул каражатты "Кыргызстан соода үйү" запасы 40 тонна болгон алтын кенин иштетүүгө жумшайт. Эгер бул долбоор ийгиликтүү болсо, айыл-чарба долбоорлоруна дагы инвестиция тартуу боюнча аракеттер көрүлөт.

КР Улуттук банкы менен өкмөт Sputnik Кыргызстан агенттигине бул маалымат боюнча кийинчерээк түшүндүрмө берерин билдирди.