Мамлекет тарабынан муктаж үй-бүлөлөргө берилген акысыз көмүрдүн сапаты ар дайым эле жакшы боло бербейт. Бул туурасында Sputnik Кыргызстан радиосуна пенсионер Бурулсун Бейшекеева билдирди.
Ал 6 жылдан бери акысыз көмүр алып жагат.
"Азыр дурус көмүр келиптир деп жатышат. Жылда алган көмүрлөрдүн жарымын гана жаксак, жарымын элеп төкчүбүз. Сапаты начары берилип калчу. Эми журналисттер жаза баштаганда жакшысын ташып калышты окшойт. Дүйшөмбү күнү келгенде бул жактагылар "эки күндөн кийин келиңиз, ошондо сапаттуу көмүр түшөт" деп жөнөткөн", — деди Бейшекеева.
Белгилей кетсек, жыл сайын майыптар, согуштун ардагерлери, муктаж пенсионерлер жана аз камсыз болгон үй-бүлөлөр мамлекет тарабынан 1,5 тоннадан акысыз көмүр алышат. Бул тизмеде катталгандардын саны Бишкек шаарында 4346 үй-бүлөнү түзөт.
