Жүрөктү жылыткан сүрөт. Профессор студенттин баласын көтөрүп алып лекция окуду

БИШКЕК, 10-мар. — Sputnik. АКШда профессор өзү сабак берген студенттин беш айлык кызын бооруна арчындап алып лекция окугандыгын CNN жазды. 

​

Телеканалдын маалыматына караганда, бул ич жылыткан көрүнүш Алабамадагы Морхаус колледжинде болгон.

Студент Уэйн Хейер алгебра боюнча акыркы лекцияга кызын көтөрө келген. Ал шартын келинчиги абдан зарыл иштер менен кетип, ал эми бала багуучуну таба албай калгандыгы менен түшүндүргөн.

"Алгебра боюнча акыркы лекцияга келбесем, тест тапшыра албай калышым мүмкүн", — деген студент-ата.

Ал эми мугалим баланы бооруна арчындагыч менен көтөрүп алып, лекция өтө берерин айтып, студенттин кызын сураган. Профессор ошол тейде лекциясын уланткан. Ал эми ал учурда атасы кызын көтөрүп сабак өткөн лектордун айткандарын конспектилеп жазып отурган.

Хейердин курсташтарынын бири бала көтөрүп сабак өтүп жаткан профессордун сүрөтүн тартып алып социалдык тармакка жарыялап жиберген.

Бир нече күн ичинде сүрөт тез тарап кетип, Натан Александр интернеттин жылдызына айланган. Сүрөттү көргөн 300 миң киши "жакты" деп, 80 миң киши биринен сала бири бөлүшкөн.

"Ошол күнү аларды математикага эле эмес, ак дилге, боорукерликке, камкордукка үйрөттүңүз", — деп жазган бир посттун автору.

Профессордун мындай кадамын колледждин президенти да белгилеген.

"Бул  — сүйүү менен ар тараптан боорукер жана ийкемдүү болууну көрсөткөн кадам. Студенттерге жасалган мындай жылуу мамиле алардын ийгиликтүү жолундагы тоскоолдуктарды азайтат", — деп айтылган.

Профессор CNN кабарчысы менен маегинде 26 жаштагы Уэйн Хейер камкор ата, аракетчил студент гана эмес, эки жерде иштеп, бүлөсүн багууга умтулган жоопкерчиликтүү адам экендигин айтып берген.

Ал эми айтуусуна караганда, сабак учурунда бөбөк чыр салып ыйлаган эмес, ал эми аягында таптакыр эле уктап калган.