Нурматов: өлкөдө боорунан рак болгондордун 90 пайызы — алгач гепатитке чалдыккандар
"Азыр мечит, базар, көчөлөрдө, ал тургай коомдук транспортторго чейин чыгып операцияга каражат сурагандар көбөйдү. Алардын көпчүлүгү — боордун циррозу же боордун рагы деген диагноздогулар. Бул көрүнүш чынында өлкөдө аталган илдетке кабылгандардын саны өсүп жаткандыгынан кабар берет. Эмне себептен көбөйүүдө, анткени бизде гепатит менен күрөшүү боюнча мамлекеттик деңгээлдеги программа жок. Жогоруда айтылган боор ооруларынын бардыгы вирустук гепатиттерден келип чыгат. Тилекке каршы, киши каза болуп калганда ага адам келип жеткен акыркы диагноз жазылат да, вирустук гепатит көйгөйү көмүскөдө калып кетүүдө. Кыргызстанда боордун рагынан каза болгондордун 90 пайызы алгач вирустук гепатитке кабылгандар болууда. Дүйнөлүк статистикада бул 60 пайызды түзөт. Бизде ВИЧ/СПИД, кургак учук илдеттерине олуттуу көңүл бурулат, бирок ошол эле ВИЧ, вирустук гепатит ооруларына мамлекеттик деңгээлде маани берилбей келет. Эгер ушул боюнча кете берсек, 2040-жылдары вирустук гепатиттен көз жумгандардын саны ВИЧ/СПИД же кургак учуктан каза болгондорго караганда 2-2,5 эсеге көбөйөт", — деди Нурматов.
