Кадыралиев: саякаттоочуларга "шпаргалка" боло турчу блог тартам

"Туризм жаатында билим алган студенттер бир гана китеп окуу менен чектелбеши керек. 2014-жылы студенттик кезде эл аралык жана ички турларды уюштуруп, алты жигиттен турган команда саякаттоонун бул түрүн биринчилерден болуп баштадык. Башка окуу жайлардагы бизге окшогон студенттер жана башка чоӊ кишилер муну өздөштүрө баштады. Ортодо саякат турларын уюштуруу токтоп калган. Андан тышкары, грек компаниясынын круиздик кемесинде иштеп, бир нече өлкөгө барып, бул жаатта тажрыйба топтодум. Бир нече компанияда гид, тур-менеджер болуп иштедим. Акыркы ирет Германия тышкы жардам берүү агенттиги Жалал-Абад уюмуна эксперт катары чакырып, Сары-Челек, Арсланбап, Чаткал аймактары боюнча туристтик маршруту так белгиленген тур жасап чыктык. Бул "А" чекиттен "Б" чекитке кантип жетсе болорун көрсөткөн туристтик маалыматтык портал болуп эсептелет. Пандемиядан соӊ Бишкекке келип Kyrgyz Friends туристтик фирмасынын тур-менеджери болуп турган кезде "Кыргызстанга келүүгө кырк себеп" аттуу кырк турду камтыган каталог жасадым. Учурда туризм боюнча көз карандысыз эксперт болуп иштеп келе жатам жана саякат блогдорун жасоого быштым деп эсептейм. Ошондуктан Son of Mountains же "Тоолордун баласы" аталышындагы Кыргызстан боюнча саякат тууралуу деталдуу блог тартуу аракеттерин баштадым. Бул саякаттоочуларга "шпаргалка" болуучу блог болот", — деди Кадыралиев.