БИШКЕК, 29-дек. — Sputnik. Россияда иштеп жүргөн Евразиялык экономикалык биримдикке мүчө мамлекеттердин жарандары 2017-жылдын 1-январынан тарта милдеттүү медициналык камсыздандыруу кызматын пайдаланууга мүмкүнчүлүк алышат. Бул тууралуу Евразиялык экономикалык комиссиянын (ЕЭК) маалымат кызматы билдирди.
"Россия тараптын мындай чечиминен улам ЕАЭБге мүчө мамлекеттерден келип иштеп жаткан мигранттар россиялык жарандардай эле социалдык кепилдиктерге ээ боло алат", — деди ЕЭК коллегиясынын мүчөсү (министр) Карине Минасян.
Келишимге ылайык аталган төрт мамлекеттин жарандарына пенсиядан тышкаркы бардык социалдык камсыздандыруу берилет. Буга чейин ЕАЭБге мүчө мамлекеттердин жарандары Россиянын милдеттүү медициналык камсыздандыруу программасына катыша алчу эмес.