БИШКЕК, 13-июль — Sputnik. Башталгыч мектептердин мугалимдери жана мектепке чейинки билим берүү мекемелердин тарбиячылары үчүн тренингдердин биринчи бөлүмү аяктаганын Билим берүү жана илим министрлигинин маалымат кызматы билдирди.
Маалыматка ылайык, министрликте балдарды мектепке даярдоонун 480 сааттык программасын жайылтуу боюнча кеңешме өттү.
Министрдин орун басары Токтобүбү Ашымбаеванын айтымында, программанын алкагында жалпысынан 4217 педагог окутулду.
"Окуу жылынын башталышына мектептер жана мектепке чейинки билим берүүчү мекемелер программанын алкагында тийиштүү программалар, усулдук кеңешмелер, окуу куралдар жана эмерек менен камсыз болушат", — деди Ашымбаева.
Билим берүү жана илим министрлиги 2015-жылдын 1-сентябрынан тартып балдарды мектепке даярдоо боюнча 480 сааттык программаны мектептерге жана бала бакчаларына киргизет.
