БИШКЕК, 25-июль — Sputnik. Тубаса жүрөк кемтиги менен төрөлгөн ымыркайларга Түштүк Кореядан акысыз операциялана турганын Кызыл жарым ай улуттук коомунун ыктыярчысы Айдай Эрикова билдирди.
Анын айтымында, балдар Инчхон шаарына 28-июль күнү учуп кетишет. Бардык чыгымды уюштуруучулар өз мойнуна алышкан.
"Биз жыл сайын Кыргызстандан акысыз операция жасоо үчүн бештен бала тандап алабыз. Мында баланын абалы, ата-энесинин материалдык абалы да эске алынат", — дейт Эрикова.
Маалыматка ылайык, мындай акция беш жылдан бери өткөрүлүп келет. Бул мезгил аралыгында 26 балага операция аман-эсен жасалган.
