Сариевге куттук айткандардын аягы үзүлө элек

БИШКЕК, 13-ноя. — Sputnik. Темир Сариевдин дарегине чет элдик мамлекеттердин өкмөт башчыларынан премьер-министрлик кызматка дайындалышы боюнча куттуктоолор келип жатканын өкмөттүн маалымат кызматы билдирди.

Сариев ноябрдын башында жаңы парламенттин шайлоосу менен кайрадан өкмөт башчылыгына дайындалды.

Казак премьер-министри Карим Масимов өкмөттү кайра жетектөө боюнча Сариевге көрсөтүлгөн ишеним анын эмгегине жана өлкөнүн гүлдөп-өнүгүүсүнө кошкон салымына карата болгон жогорку бааны билдирерин айткан. Ал Кыргызстандын премьер-министрине чың ден-соолук, жоопкерчиликтүү кызматына ийгиликтерди жана жаңы жетишкендиктерди кааларын билдирген.

Тажикстандын өкмөт башчысы Кохир Расулзода эки өлкөнүн ортосундагы өз ара урмат жана кызматташтык боюнча жетишилген ийгиликтер мындан ары карай да Сариевдин активдүү катышуусу менен өсүү багытынан тайбай турганына ишеним арткан. 

Белоруссия өкмөтүнүн башчысы Андрей Кобяков Темир Сариевдин кайра дайындалышы Белоруссия менен Кыргызстандын ортосундагы соода-экономикалык кызматташуу ырааттуу өнүгөөрүнө, Евразиялык экономикалык биримдиктин алкагында интеграциялык процесстердин чыңдалышына шарт түзөрүн белгилеген.

Өкмөттүн жаңы курамын Sputnik инфографикасында көрө аласыздар>>