Кыргызстандык футбол күйөрмандары Кыргызстан менен Палестинанын курама командаларынын 6-сентябрдагы жолдоштук беттешинен кийин отурган жерлерин тазалап кетишти. Анын видеосун Берен Самидин уулу аттуу колдонуучу Facebook баракчасына жайгаштырды.
Видеодон оюн аяктагандан кийин төрт-бештей бала отурган орундуктарды тазалап жүргөнүн көрүүгө болот.
Белгилей кетсек, беттеш Бишкектеги Дөлөн Өмүрзаков атындагы футбол талаасында өтүп, командалар 1:1 эсебинде тең чыгышкан.
Эми кыргызстандык футболчулар 10-сентябрда Азия кубогуна даярдык көрүү үчүн Бишкекте Сириянын курамасы менен кез келет.
Белгилей кетсек, быйыл Россияда Футбол боюнча дүйнө чемпионаты учурунда япониялык күйөрмандар оюн аяктагандан кийин отурган орундарын тазалап кеткени көпчүлүктү суктанткан болчу.
