Шеримкулов: Бишкектин аталышы СССР чачырай электе кайтарылган
11:51 05.02.2021 (Жаңыртылды: 14:27 14.12.2021)
© Sputnik / Табылды КадырбековЛегендарлуу парламенттин төрагасы, мамлекеттик ишмер Медеткан Шеримкулов. Архив
![Легендарлуу парламенттин төрагасы, мамлекеттик ишмер Медеткан Шеримкулов. Архив Легендарлуу парламенттин төрагасы, мамлекеттик ишмер Медеткан Шеримкулов. Архив - Sputnik Кыргызстан, 1920, 05.02.2021](https://sputnik.kg/img/102865/93/1028659396_0:0:6016:3385_1920x0_80_0_0_42c3fa21dae69ac184efa27aa38cf0f2.jpg)
Жазылуу
Легендарлуу парламенттин төрагасы, мамлекеттик ишмер Медеткан Шеримкулов 1991-жылдын 5-февралында Фрунзе шаары өзүнүн тарыхый атына кайтарылып Бишкек деп аталып калганын белгиледи.
Шеримкулов: Бишкектин аталышы СССР чачырай электе кайтарылган
Фрунзенин Бишкек атына кайтуусу СССР чачырагандан кийин кабыл алынган деген маалыматтар туура эмес. Бул тууралуу Медеткан Шеримкулов Sputnik Кыргызстан радиосуна маек куруп жатып билдирди.
Анын айтымында, Советтер Союзу 1991-жылы декабрь айында ураган, февралда держава чачырайт деген шек жок болчу.
"1860-жылдарда орустар Бишкекти өз тилине ылайыкташтырып Пишпек деп жазылып калган. Этимологиясы эч кандай тарыхый баалуулукту түшүндүрбөйт. 1925-жылы 31-октябрда Михаил Васильевич Фрунзе дүйнө салгандан кийин 1926-жылы 12-майда Пишпектин тургундарынын демилгеси менен Фрунзе аты берилген. Михаил Фрунзе биздин жердешибиз, залкар инсандардын бири. Аны менен сыймыктанып, ал кишинин ысымы көчөгө, музейге ыйгарылып, эстелиги темир жол бекетинин алдына тургузулган. 1990-жылдын 15-декабрында Жогорку Кеңеш тарабынан "Кыргыз Республикасынын суверендүүлүгү жөнүндө" декларация кабыл алынган. Анын негизинде 1936-жыдан бери Кыргыз ССРи деген аталышты өзгөртүп, "Советтик Социалисттик" деген абрревиатураны алып, Кыргыз Республикасы деп атаганбыз. Буга байланыштуу жер-шаарларга өзүнүн тарыхый аталышын кайтаруу максатталган. Ошентип борбор калаага Бишкек баатырдын ысымы ыйгарылган", — деди Шеримкулов.
Ошондой эле ал борборду Манас деп атоо сунушу болгонун кошумчалады.