Афтандилова: сентябрь айынан тарта дагы 35 мектепте ысык тамак бериле баштайт

"2013-жылдан бери Кыргызстандын 850дөн ашык мектеби Бириккен Улуттар Уюмунун Дүйнөлүк азык-түлүк программасы тарабынан иштелип чыккан долбоордун алкагында ысык тамак менен камсыз болду. Программанын негизги донору — Россия мамлекети. Жергиликтүү бийликтин, ата-энелердин жана демөөрчүлөрдүн жардамы менен мектеп ашканаларынын инфратүзүмү калыбына келтирилди. Анын ичинде муздак, ысык суу менен камсыздоо, канализация дагы бар. Мектептер заманбап ашкана жабдууларынын 30дан ашык түрү жана 4,5 миӊ тонна байытылган ун менен камсыз болду. Учурда өлкөдөгү 2 200 мектептин 70 пайызында ысык тамак берилет. БУУнун Дүйнөлүк азык-түлүк программасынын Тармактык тамактануу институту (СИФИ) менен биргеликте балдардын энергияга жана пайдалуу заттарга болгон муктаждыктарын, аймактардагы азык-түлүктүн жеткиликтүүлүгүн эске алуу менен мектеп тамактануусуна арналган 100дөн ашуун рецептти камтыган китебин жана "Үй-бүлө үчүн пайдалуу рецепттер" китебин иштеп чыкты. Мектептеги тамак-аштын энергиялык баалуулугу 335 килокалориядан 550гө көтөрүлдү. Жалпысынан 1500дөн ашуун мектеп ашпозчулары тамак даярдоо, тамактануу стандарттары, санитардык нормалар, коопсуздукту көзөмөлдөө боюнча билим алышты. Мектеп ашпозчуларын даярдоо үчүн былтыр Республикалык компетенциялык борбор (И.Раззаков атындагы КМТУда) түзүлдү. Ошондой эле "Мектеп менюсун түзүү үчүн калькулятор" программасы иштелип чыкты. Бул тамактануу стандарттарына ылайык мектеп менюсун тез жана натыйжалуу түзүүгө жардам берет. Андан тышкары, логистикалык борбор (анын ичинде мобилдик лаборатория, изотермикалык фургон жана кайра иштетүүчү жабдуулар) программанын муктаждыктары үчүн Баткен облусунун Кадамжай районунда мектептер менен жергиликтүү дыйкандардын ортосундагы байланышты бекемдөө үчүн түзүлдү. Борбордо жергиликтүү азык-түлүк өндүрүүчүлөрдөн келген өнүмдөрдүн сапатын сертификациялоону жеӊилдетүү функциясы каралган", — деди Афтандилова.