Самыйкожо: ар бир өкмөт мүчөсүн сыйлайм, алар жылдап иштеген адистер
© Sputnik / Асель Сыдыкова
Жазылуу
Жогорку Кеңештин депутаты Мирлан Самыйкожо эл өкүлдүк ишмердүүлүгү, жеке чыгармачылыгы тууралуу кеп козгоду.
Депутат болгондон бери чыгармачылыгы калып кеткенин айткан Мирлан Самыйкожо Sputnik Кыргызстан радиосуна маек куруп, саясатка аралашып кетиш оңой болбогонун айтып берди.
Самыйкожо: ар бир өкмөт мүчөсүн сыйлайм, алар жылдап иштеген адистер
Эл өкүлү эки жылдык иш тажрыйбасында беш мыйзамга автор болгонун белгиледи.
"Үгүт учурунда "ыр жазган киши кантип депутат болсун" дегендер болгон. Ырды кантип жазсак, мыйзамды да ошентип жазабыз деп шайлоочуларыма сөз бергем. Мына ушул элге берген ар бир убадам эсимде, парламентте микрофонго чыгып сүйлөөрдө дайыма элге сөз тийип калбасын деп ойлоном. Эки суроо берсем да даярданып келип берем. Ар бир келген өкмөт мүчөсүн сыйлайм, анткени алар мен отуруп эле берип койчу суроо боюнча 10-20 жылдап иштеген адистер. Алардын "сиз туура айтып жатасыз, бирок..." деген дипломаттык жообун угуу эл өкүлү үчүн уят иш болушу керек. Мына ушундай жооп угуп калбоого тырышам. Билбеген нерсемди бөлүмдүн кызматкеринен барып сурап алгандан деле намыстанбайм. Ооба, элдин добушун алып эл өкүлү болуп калып эле саясатка аралашып кетиш оңой болгон жок. Мыйзам кантип жазылат, кантип көзөмөлдөнөт деп парламенттин ишин, депутаттын ишмердүүлүгүн дене боюма сиңирип, түшүнүш үчүн уктабай окуп таң атырган күндөр болуп эле келе жатат. Эки жылда беш мыйзамды өзүм демилгелеп жана бир нече мыйзамга авторлош (соавтор) болдум. Ушул эки жыл аралыгында депутаттыкка тиешелүү ар бир кадамымда калыс болууга, мамлекеттин кызыкчылыгын ойлогон чечимдерди колдоого тырышып келем. Бул оппозиция же позиция болуу эмес. Популисттик кылып алдына килем төшөп, үстүнө чепкен жаба сүйлөө колумдан келет. Бирок мен саясатчы болсом да абийирим менен иш кылсам дейм. Башкага эмне керек экенин билбейм, мага мамлекет керек", — деди Самыйкожо.
Ал парламент мыйзамдарды чыгарып эле эмес, аткарылышын көзөмөлдөгөн дагы орган экенин унутпоо зарылдыгын кошумчалады.
