Ибраева: бөйрөк алмаштыруу операциясына кыргызстандык хирургдар даяр

"Мамлекеттен гемодиализ алып жаткан бейтаптардын саны өткөн жумада 2 654 адамды түздү. Жумасына 2ден 5 бейтапка чейин кошулуп турат. Ар бир шаршембиде атайын комиссия карап, мамлекеттик гемодиализге өткөрөт. Каржылоо жылдан-жылга көбөйүүдө. Анткени бейтаптардын саны өсүп турат. Быйыл 2 миллиард 400 миллион сом каралган. Бул акча жетпесе дагы суроого туура келет. Бир бейтапка жылына миллион сомго чейин сарпталат. Дарыгерлер 2012-жылдан бери бөйрөк алмаштыруу боюнча Беларусь жана башка чет мамлекеттерден окуп, тажырыйба топтоп келген. Бүгүн толук команда бар. Эне жана баланы коргоо улуттук борборунун бир бөлүмүндө атайын операция жасоочу кабинет даярдалып, акырындык менен материалдык-техникалык базасы оңдолгон. Анда жарнамасыз эле оор кырдаалдарда бирден-экиден бөйрөк алмаштырылып жүргөн. Кыргыз-Түрк ооруканасында алгач ирет расмий түрдө бөйрөк алмаштыруу операциясын жасаар алдында статистиканы карасак, буга чейин өлкөдө 54 операция болуптур. Азыр материалдык-техникалык базаны дагы жакшыртып, операциялык блокту кеңейтүү керек. Ага кошумча каражат бөлүп берүүгө аракет жасалууда. Операцияга эки бригада кирип, бири бөйрөктү алып, экинчиси салып, эки столдо иштейт", — деди Ибраева.