Мамлекеттик Салык кызматы: Кара-Суу районун карызы баарынан көп

Жазылуу
Мамлекеттик салык кызматы былтыркы жылга салыштырмалуу салыкты 3 милиарддан ашуун сомго көп жыйнаган.

БИШКЕК, 30-дек — Sputnik. Кыргызстандын Мамлекеттик салык кызматы карыздарлардын айлык тизмесин жарыялады. Аймактар боюнча Кара-Суу районунун казынага бересеси баарыныкынан көп, ал эми шаарлар боюнча Жалал-Абад алдыда турат.

"Тилекке каршы, салык төлөөчүлөрдүн арасында өз милдетин убагында аткарбагандар бар жана КРдин салык кызматы жөнүндө мыйзамына ылайык, алардын карызын төлөтүп алуу боюнча чаралар көрүлөт. Жарыяланган тизмедеги сандар Салык кызматынын 2014-жылдын 1-декабрына туура келет. Кара-Суу районунун карызы 66 миллион 519 миң сомго жеткен жана ал тизмеде биринчи орунда турат. Ал эми Өзгөн районунун карызы эң аз. Тизмеде аталган район боюнча 741 миң 900 сом бересеси бар бир гана ишкер — Кутлугбек Кочкоров көрсөтүлгөн", — деди аталган кызматтын маалымат катчысы Эркин Сазыков.

Салык боюнча ири карызы барлардын тизмесине ылайык, мамлекеттин казынасына дагы төлөнө турган акчанын саны республика боюнча 342 миллион 513 миң 200 сомду түзөт.

Ошондой эле салык боюнча бересеси бар Ак-Суу районундагы —"Жыргалаң шахтасы" ААК (4 млн.342 300 сом) жана Аламүдүн районунда — Суйнуш Габбасова (993 600 сом) катталган.

Жайыл районундагы "КБ Арак заводу" ЖЧКсынын карызы — 4 млн.618 400 сом, ал эми Москва районуна караштуу "Дариха плюс" ЖЧКсы 835 500 сом бересе.

Карыз болгондордун саны дагы эле Кара-Суу районунда көп, тактап айтканда, 16 субъект.

Кыргызстандын шаарларынын ичинен эң чоң карыз Жалал-Абад шаарынын ишканаларына туура келип, 1-декабрга карата 20 млн. 843 900 сомду түздү.

Ал эми карызы аз Ош шаары, бул калаадагы ишканалардын бересе акчасы учурда — 416 200 сом.

Ысык-Көлдүн Каракол шаарынын ишканалары казынага 5 млн.790 600 сом жана Балыкчынын ишканалары 7 млн. 368 300 сом салык төлөй элек.

Токмок шаарынын бересеси 8 млн.349 700 сомду түздү.

Акыркы 11 айда Мамлекеттик салык кызматы өлкөнүн бюджетине 37 миллиард 343 миллион сом көлөмүндөгү салыктар менен ар кандай төлөмдөрдүн түшүүсүн камсыз кылды. 2013-жылдын ушул эле мезгилине салыштырганда, салык 3 миллиард 684 миллион 700 миң сомго көп жыйналган.

Жаңылыктар түрмөгү
0