БИШКЕК, 16-сен. — Sputnik. Германия мамлекетинин колдоосу менен Бишкек шаарында курула турган медициналык клиника зарыл жана абдан маанилүү экенин вице-премьер-министр Валерий Диль Marien Hospital Herne клиникасынын өкүлү Марк Реймонд менен жолугушуу учурунда билдирди.
Маалыматка ылайык, курула турган клиниканын хирургия, кардиология жана терапия бөлүмдөрүнүн болушу каралган. Диль германиялык дарыгерлердин тажрыйбасы көптөгөн оорулууларга жардам берерин белгиледи.
"Дары-дармек менен медициналык жабдуулардан тышкары, 10 кыргызстандык дарыгерди окутуп берүүсү да олуттуу жардам болот. Кызматташуубуз улана берерине ишенем", — деди чиновник.
Өз кезегинде Марк Реймонд германиялык тарап биргелешкен клиниканын курулушуна кызыкдар экенин айтып өттү.
"Долбоор жакын арада ишке ашат деген үмүттөмүн. Курулуштун алдын ала баасы 10 миллион еврого бааланууда", — деди өкүл.
Жолугушуунун жүрүшүндө Диль ушул эле жылы клиниканын имаратын долбоорлоо, курулушка жер бөлүү жана башка уюштуруу иштери башталарын кошумчалады.
