БИШКЕК, 17-ноя. — Sputnik. Эл аралык жарандык авиация уюмунун (ИКАО) жаңы стандарттарына ылайык үстүбүздөгү жылдын ноябрь айынан баштап 1994-жылы берилген эски үлгүдөгү паспорттор чет өлкөгө чыгуу үчүн колдонуудан чыга турганын Мамлекеттик каттоо кызматы билдирди.
ИКАОго мүчө мамлекеттер эл аралык авиакаттам учурунда автоматташтырылган жабдуу аркылуу таанылган паспорттор гана пайдаланылышы шарт. Каттоо кызматы колго толтурулган документ колдонуудан алынышы керектигин белгилейт.
1994-жылы берилген документти 2004-жылкы паспортко акысыз алмаштыруу үчүн 60 жаш куракка жеткен жарандар катталган жеринен паспорт бөлүмүнө кайрылуусу керек.
Каттоо кызматы үстүбүздөгү жылдын август айынан баштап 60 жаштан жогорку курактагыларга 2004-жылкы паспорт берүү жараянын баштаган. 16-ноябрга карата 101 миң 38 жаран паспорт алмаштырган.
Маалыматка ылайык, учурда Кыргызстанда эски үлгүдөгү паспорт пайдаланып жүргөн 3 миң 740 жаран каттоодо турат.
