Акыйкатчы болчу талапкерлердин ысымдары аталды

Жазылуу
Акыйкатчынын милдетин буга чейин Гүлнара Жамгырчиева аткарып келген.

БИШКЕК, 27-ноя. — Sputnik. КСДП фракциясы өз жыйынында акыйкатчылык орунга өзүнүн талапкерин тандады.

Фракция лидери Чыныбай Турсунбековдун айтымында, фракцияга эки талапкерден – Гүлнара Жамгырчиева менен Турсунбек Акундан кайрылуу келип түшкөн. Бюллетень аркылуу жашыруун добуш берүү жыйынтыгында 22 добуш менен Гүлнара Жамгырчиева озуп чыкты. Ал эми Турсунбек Акундун талапкерлигине тогуз добуш берилген.

Буга чейин башка фракциялар да акыйкатчылык кызматка өз талапкерлерин сунуштаган.

"Кыргызстан" Нуркамил Мадалиевдин талапкерлигин сунуштоону ойлонуп жатса, "Өнүгүү — Прогресс" фракциясы ысык-көлдүк коомдук ишмер Мурат Жетмишбаевди карап жатат. "Республика — Ата-Журт" фракциясы белгилүү укук коргоочу Атыр Абдрахматова көрсөтсө, "Бир Бол" фракциясы буга чейин Жалал-Абад облустук прокуратурасын жетектеп келген Нурлан Жээналиевди сунуштоодо.

Белгилей кетсек, Жогорку Кеңеш 25-июндагы жыйынында акыйкатчы Бакыт Аманбаевдин иш-аракетин канааттандырарлык эмес деп таап, кызматынан мөөнөтүнөн мурда бошоткон. Мыйзам боюнча акыйкатчыны шайлоо бир ай ичинде, башкача айтканда 25-июлга чейин шайланышы керек болчу.

Аманбаев кызматтан кеткенден кийин анын милдетин аткаруучу болуп,анын орун басары Гүлнара Жамгырчиева дайындалган.

Жаңылыктар түрмөгү
0