Жаңы жылдык момпосуйга бөлүнгөн миллиондор: ким канча акча коротот?

БИШКЕК, 22-ноя. — Sputnik. Жаңы жылдык белек алууга камынган алгачкы жактар белгилүү болду. 

Мамлекеттик сатып алуулар порталына жарыяланган маалыматка караганда, биринчилерден болуп жаңы жылдык белектерди сатып алуу үчүн тендерди президенттин иш башкармалыгы, "Манас" эл аралык аэропорту жана Бажы кызматы жарыялаган.

Алардын ичинен эң көп сумманы "Манас" эл аралык аэропорту жумшаганы жатат. Тагыраагы 4086 даана атайын белек менен сыйлыктарга 2 миллион 043 миң сом сарптоо пландалган. Белек менен сыйлыктардын ичине эмнелер кирери ачык көрсөтүлгөн эмес. Тендердин мөөнөтү 24-ноябрда аяктайт. 

Ал эми мамлекет башчынын иш башкармалыгы жаңы жылдык белектерди 1 миллион 667 миң сомго алганы жатат. Тендердин мөөнөтү бүгүн, 22-ноябрда аяктайт. Жаңы жылдык белек катары 1845 даана кооз таңгакка салынган момпосуйдун 40 түрү алынат. Ар бир таңгактагы белектин салмагы бир килограммдан кем болбойт. 

Бажы кызматынын камсыздоо борбору салыштырмалуу аз суммага тендер жарыялады. 337 даана таңгакка салынган шириндиктерди 165 миң 130 сомго сатып алганы жатат. Тендер мөөнөтү 23-ноябрда аяктайт.