БИШКЕК, 4-апр. — Sputnik. Президент Сооронбай Жээнбеков "Мамлекеттик сатып алуулар жөнүндө" мыйзамга өзгөртүү киргизүү тууралуу" КР мыйзамына кол койгонун өлкө башчынын маалымат кызматы билдирди.
Мыйзам Жогорку Кенеш тарабынан 2018-жылдын 22-февралында кабыл алынган.
Кабыл алынган мыйзамдын максаты — мамлекеттик сатып алуулар чөйрөсүндөгү процесске катышкан кызмат адамдарынын арасында коррупциянын деңгээлин төмөндөтүү жана атаандаштыкты камсыз кылуу.
Ошол себептен "Мамлекеттик сатып алуулар жөнүндөгү" мыйзамдын 3-беренесинин бешинчи абзацында аффилирленгендикти белгилөө үчүн акционердик коомдун акцияларынын жалпы санынын ичинен 20 жана андан ашык пайыздагы акцияларга ээлик кылуу фактысынын болушу зарыл деген ченем алып салынган.
Мыйзам күчүнө киргенден баштап саясий мамлекеттик кызмат орундарын, саясий муниципалдык кызмат орундарын, атайын мамлекеттик кызмат орундарын ээлеп турган адамдар, алардын жакын туугандары акцияларга ээлик кылуу үлүшүнө карабастан берүүчүлөрдүн (подрядчылардын) түзүүчүлөрү жана (же) катышуучулары болгон учурда алар аффилирленген жак болуп эсептелет.
Мыйзам расмий жарыяланган күндөн тартып күчүнө кирет.
