Sputnik Кыргызстан агенттиги өлкөдөгү коомдук тамактануучу же болбосо көңүл ачуучу жайлардын эсебин тактап, алар казынага канча каражат төгүп жатканына кызыкты. Ал эле эмес, той-мааракеде кызмат кылгандардын да төлөгөн салыгын билүүгө мүмкүн болду. Статистикалык маалыматтар 2017-жылдын аягына карата алынган.

Мамлекеттик салык кызматынын берген маалыматына ылайык, Кыргызстанда 2594 коомдук тамактануу жайы бар. Бул тизмеге чакан ашканадан тарта чайхана, кафе, ресторан, клубдарга чейин кирет. Мунун баары биригип өткөн жылы мамлекетке 239 миллион 35 миң сом салык төлөгөн.

Ал эми той-мааракелерде кызмат кылган музыкант, тамада, бийчи, ырчы-чоорчу жана актердук топтор 808 патент алып, казынага 1 миллион 734,5 миң сом пайда келтирген.

Видеого тартуу жана үн жазуу кызматтары менен алектенгендерге былтыр 2 миллион 119,3 миң сомго 1518 патент берилген. Фотографтар болсо 2615 патент алып 3 миллион 946,2 миң сом салык төлөгөн.

Ар бир аймакка карата өзүнчө тарифтер коюлган. Мисалы ырчы-чоорчу менен тамадаларга бир айлык патенттин баасы Нарын шаарында 500, Баткен калаасында 750 сом болсо, Токмокто 1,5 миң сом, Ош шаарында 2 миң сом. Эң жогорку баа Бишкекте, 2,5 миң сом.

Ушул эле коомдук тамактануу жайларынын санын өлкөдөгү социалдык объектилер жана мечиттер менен салыштырып көрүүнү чечтик. Анын жыйынтыгында мечиттер сап башына чыкты.

Ден соолук жагынан алганда, Саламаттык сактоо министрлигинин маалыматы боюнча Кыргызстанда жалпы 135 оорукана бар. Мындан сырткары, 64 бейтапкана, анын курамына 1038 Фельдишердик-акушердик пункт (ФАП) жана 715 Үй-бүлөлүк дарыгерлер тобу (ҮДТ) кирет. Ал эми стоматология, клиника сыяктуу жеке медициналык мекемелердин саны 2617ге жетет. Баса, Кыргызстанда 443 тез жардам унаасы бар экен, бирок учурда анын 334үнүн гана төрт дөңгөлөгү айланып жүрүп жатат. Өлкө дагы 228 унаага муктаж болуп турганы айтылды.

Билим берүү мекемелери да тамактануучу жайларды кууп жете албайт. Жеке менчик жана мамлекеттик экенине карабай эсептегенде 2262 мектеп жана 1390 бала бакча бар

Баарын салыштырып бүткөндөн кийин Sputnik Кыргызстан агенттиги иштеп чыккан калькулятор менен ресторандагы банкетке жана меймандар үчүн оюн-тамаша программасына канча акча кетерин өз алдыңызча эсептеп көрсөңүз болот.

БИШКЕК, 8-мар. — Sputnik. Нарында Кыргыз эл акыны Кожогелди Култегиндин "Шыпыргы өмүр" поэмасынын негизинде инсценировкаланган фарс-интерпретация жанрындагы спектаклинин премьерасы болду. Бул тууралуу өкмөттүн өкүлчүлүгү аймактык кабарчыга билдирди.

Театрлаштырылган программа Муратбек Рыскулов атындагы Нарын облустук академиялык музыкалык драма театрында өтүп, бет ачар аземге чыгарманын автору, ТҮРКСОЙ эл аралык уюмунун мүчөсү Кожогелди Култегин катышты.

Алгач чыгарма конокторго тартууланган соң автор поэмаларынын ичинен, сахнага алып чыгууга мүмкүн эмес болгон аталган поэманы сахналаштырган режиссёр Шамбет Мендебаировго жана ролдорду ийине жеткире аткарган театр ишмерлерине ыраазычылык билдирди.

"Мен алгач "Мөөркан апа" деген поэмамды койгон экен деп ойлодум. Анткени ал поэмада Мөөркан апанын акыркы окуялары Нарында өтөт. Бирок "Шыпыргы өмүрдү" сахналаштыруу оңой эмес жумуш. Себеби бул поэма сахнага ылайык келбейт эле. Даяр жазып берген драманы коюштун өзү канчалык оор, ал эми поэманы коюш андан да түйшүктүү иш. Поэма баяндалып жазылат. Шамбет мырза мүмкүн болбогон нерсени сахнага алып чыгып эрдик жасады. Бул театрдын тарыхындагы өзгөчө окуя болду. Театрдын жамаатына терең ыраазычылык билдирем жана ар дайым иштешүүгө макулмун", — деди автор.

Анкарадан атайын келген Култегин облустук академиялык драма театрына ТҮРКСОЙ табагын тапшырды (ТҮРКСОЙ эл аралык түрк маданияты уюмунун белеги). Ошондой эле Чыңгыз Айтматовдун альбомун жана өзүнүн Анкарада кыргыз тилинде басылып чыккан чыгармаларынын беш томдук жыйнагын белек кылды.

Жогорудагы чыгарма буга чейин 18-19-февраль күндөрү көрүүчүлөргө тартууланган. Анда кыргыз элинин бүгүнкү тагдыры, 30 жылдан бери миграция маселесине байланышкан трагедиясы чагылдырылган.