Кыргызстанда Salam бренди менен жаңы уюлдук байланыш ачылат

БИШКЕК, 16-май – Sputnik. MegaCom бренди менен таанымал "Альфа Телеком" ишканасы бир айдын ичинде Salam бренди менен таанымал төртүнчү уюлдук операторду ишке киргизүү милдетин алды. Бул тууралуу өкмөттүн маалымат кызматынан кабарлашты.

Билдирмеге караганда, премьер-министр Мухаммедкалый Абылгазиев "Альфа Телеком" жана "КТ Мобайл" мамлекеттик ишканаларынын ортосундагы кызматташтыктын талаш маселелерин жөнгө салуу боюнча кеңешме өткөргөн.

Жолугушуунун жыйынтыгы боюнча "Альфа Телеком" менен "КТ Мобайл" жыштыктарды биргелешип колдонуу боюнча кызматташууну улантмай болду. Өнөктөштүктүн алкагында жакынкы айларда виртуалдык оператор түзүү долбоорун ишке киргизүү пландаштырылган. Бул үчүн "Альфа Телеком" ЖАКсы өзүнүн техникалык базасын берип, таяныч оператор болот.

"Премьер-министр Мухаммедкалый Абылгазиев эки мамлекеттик компаниянын кызматташуусун колдойт. Анткени алар өлкөнү санариптештирүү саясатын илгерилетүүнүн негизги инфратүзүмдүк локомотиви болушу керек. Бул өлкө боюнча, анын ичинде эң алыскы жана жетүүгө кыйын болгон калктуу аймактарды камтып, жогорку сапаттагы байланышты камсыз кылат", — дешти өкмөттөн.

Премьер-министрдин айтымында, бул сыяктуу өнөктөштүк өлкөнүн ири салык төлөөчүлөрүнүн бири болгон "Альфа Телеком" компаниясынын кирешелүүлүгүнө оң таасир берет.

Кеңешмеде биргелешкен ишмердүүлүктөн түшкөн киреше "Альфа Телекомдун" пайдасына — 67 пайыз, ал эми "КТ Мобайл" үчүн 33 пайыз принциби боюнча бөлүштүрүлөт.