БИШКЕК, 11-июн. — Sputnik. Таласта коронавирус биринчи табылган медик келиндин үй-бүлөсү дүкөн иштетчү. Эми келиндин жолдошу жана анын дос баласынан вирус аныкталды. Бул тууралуу өкмөттүн Талас облусундагы өкүлү Марат Мураталиев брифинг учурунда билдирди.
Анын айтымында, келин менен бирге мобилдик топто иштеген бир дагы медицина кызматкеринен коронавирус табылган эмес.
"Бул үй-бүлөнүн жүк ташуучулар өтчү жолдун жээгинде дүкөнү болгон. Келинге коронавирус ошол жактан жугушу мүмкүн деп боолголоп жатабыз. Дүкөндөн алар менен байланышта болгондун баары такталып жатат. Ал эми бүгүн анын жолдошунан жана анын дайыма байланышта болуп жүргөн дос баласынан коронавирус аныкталды. Баары облустун жугуштуу илдеттер ооруканасында дарыланышууда", — деди Мураталиев.
Ал облуска вирус элдин кайдыгер мамиле жасай баштаганынан улам да кирип кетти деген пикирде.
Эскерте кетсек, Талас облусунда коронавирус биринчи ирет 9-июнда медицина кызматкеринен табылган. Кыргызстанда коронавирус аныкталган алгачкы күндөн тарта (18-марттан) Таласта вирус каттала элек болчу.
Кыргызстанда коронавирус жуктургандардын саны 2129 болсо, анын ичинен 1630у айыгып чыкты. Тилекке каршы, бул оорудан 26 адам көз жумду.
