Ысык аба ырайы учурунда көчөдө бараткан адамдар. Архив

Аптаптуу ысык кайра кайтабы? Бир жумага аба ырайы

688
Синоптиктердин божомолунда, көпчүлүк учурда тоолуу аймактарда өткүн өтүп, күн күркүрөйт. Абанын температурасы өткөн аптага салыштырмалуу бир нече градуска төмөндөйт.

БИШКЕК, 18-июл. — Sputnik. Кыргызгидромет агенттиги алдыдагы аптага карата аба ырайы тууралуу маалымат берди.

Ага ылайык, көпчүлүк учурда тоолуу аймактарда өткүн өтүп, күн күркүрөйт. Абанын температурасы өткөн аптага салыштырмалуу бир нече градуска төмөндөйт.

Бишкек шаары

18-24-июль күндөрү жаан-чачын күтүлбөйт. Батыштан соккон шамалдын ылдамдыгы секундасына 4-9 метрден, 21-июлда күндүз 14 метрге жетет.

Талас облусу

Апта ичи жаан-чачын болбойт. Болгону күндүз тоолуу райондордо өткүн өтүп, күн күркүрөшү мүмкүн. Батыштан соккон шамалдын ылдамдыгы секундасына 4-9 метрден, 21-июлда күндүз кээ бир райондордо 15-20 метрге жетет.

Чүй облусу

Чүй облусунда Таластагыдай эле негизинен күн ачык болот. Айрым учурларда гана тоо этектеринде өткүн өтөт.

Ош облусу

18-июлда түнкүсүн тоолуу райондордо өткүн өтүп, күн күркүрөйт. 19-июлда көпчүлүк аймактарда өткүн өтүп, кээ бир райондорунда жаан-чачын катуу жаашы мүмкүн. Батыштан соккон шамалдын ылдамдыгы секундасына 15-20 метрге жетиши ыктымал.

Баткен, Жалал-Абад облустары

18-19-20-июлда көпчүлүк аймактарда өткүн өтүп, күн күркүрөшү күтүлүүдө. Башка күндөрү өрөөндөрдө күн ачык болот.

Ысык-Көл, Нарын облустары

Бул аптада Ысык-Көл менен Нарында аба ырайы бирдей болору күтүлүүдө. Өрөөндөргө 18-июлда күндүз жана 19-июлда гана өткүн өтпөсө, башка учурда күн ачык болот. Батыштан соккон шамалдын ылдамдыгы 18-19-июлда секундасына кээ бир райондордо 15-20 метрге жетет.

688
Белгилер:
Кыргызстан, аба ырайы, апта, жай
Тема боюнча
Мээ кайнаткан ысык болобу? Августка карата аба ырайы
Pfizer вакцинасы. Архив

Кыргызстанга күзүндө Pfizer вакцинасынын келиши күтүлүүдө

25
(жаңыланган 00:32 06.08.2021)
Өкмөттүн өкүлүнүн билдиришинче, Pfizer вакцинасынан тышкары, күзүндө кайтарымсыз түрдө Sinopharm препараты келиши күтүлүүдө. Ошондой эле Moderna вакцинасын колдонуу планы бар.

БИШКЕК, 5-авг. — Sputnik. Кыргызстанга COVAX линиясы аркылуу коронавируска каршы Sinopharm жана Pfizer препараттары келиши мүмкүн. Бул тууралуу министрлер кабинетинин төрагасынын орун басары Жылдыз Бакашова билдирди.

"Ушул жылдын сентябь айынын этегинде Кытайдын Sinopharm вакцинасы кайтарымсыз түрдө берилери күтүлүүдө, ошондой эле күздүн ортосунда Pfizer вакцинасынын 259 миң дозасынын келишин күтүп жатабыз. 2022-жылдын биринчи кварталында Дүйнөлүк банктын донордук колдоосунун линиясы менен Moderna вакцинасы келиши мүмкүн", — деген Бакашова.

Анын айтымында, министрлер кабинети дипломатиялык каналдар аркылуу вакциналарды алуу боюнча иштерди улантууда.

25
Белгилер:
Кыргызстан, Министрлер кабинети, коронавирус, вакцина
Тема:
Коронавируска каршы эмдөө
Тема боюнча
Дарыгер COVID-19дан айыккандар жана эмделгендер качан кан тапшырса болорун айтты
Окуучулар сентябрда кадимки тартипте окуйбу? Министрликтин жообу
Кыргызстанда жарым миллиондон ашуун адам коронавируска каршы вакцина алды
Кыз-келиндер күрөшү боюнча Кыргызстандын курама командасынын башкы машыктыруучусу Нурбек Изабеков жана балбан Айсулуу Тыныбекова. Архив

Нурбек Изабеков: Айсулуу менен Париж Олимпиадасына даярданабыз деген ниет бар. Видео

321
(жаңыланган 00:31 06.08.2021)
Пресс-атташе машыктыруучу Нурбек Изабековдон Айсулуу Тыныбекова финалда анын айткан ыкмаларын ишке ашыра алган-албаганын да сураган.

БИШКЕК, 5-авг. — Sputnik. Кыз-келиндер күрөшү боюнча Кыргызстандын курама командасынын башкы машыктыруучусу Нурбек Изабеков балбандар Айсулуу Тыныбекова, Мээрим Жуманазарова жана Айпери Медет кызынын Олимпиада оюндарындагы беттештери туурасында пикирин билдирди. Аны менен Кыргызстандын спорт делегациясынын пресс-атташеси Кабыл Макешов маектешти.

Нурбек Изабеков алгач жалпы кыргызстандыктарды Токио Олимпиадасында үч медаль алышы менен куттуктап, дем-күч берип колдогондору үчүн терең ыраазычылык айтты.

"Айсулуу алтын үчүн беттеште жеңилүүгө дуушар болду. Бул спорт, спортто, албетте, күчтүүлөр жеңет. Япониялык балбан жакшы даярдыкта келди, өзүнүн жеринде күрөштү. Айсулуу күмүш медаль алды. Кандай болгон күндө дагы биз үчүн чоң ийгилик, аны сезишибиз керек. Бул 2024-жылы Парижде боло турчу Олимпиадага ишенич берди. Спортчуларыбыз кийинки оюнда жогору тепкичке көтөрүлүп, бир нече алтын медаль ута алышат деп ишендирип айтып кете алам. Биз буга бүгүндөн тарта даярдыктарды көрүүдөбүз. Күмүш медаль болгондо же ыйлаарымды, же күлөрүмдү билбеген бир сезим калып калды, муну убакыт гана жеңет экен. Дагы деле өзүбүзгө келе элекпиз. Бир жумада калыбыбызга келип, анализдеп талдоо жүргүзөбүз", — деди спортчу кыздардын машыктыруучусу.

Пресс-атташе Кабыл Макешов Айсулуу Тыныбекова финалда кез келген Юкако Каваи менен Олимпиадага чейин үч ирет кармашып, бир ирет жеңилгенин белгилеп, машыктыруучудан спортчу финалда айткан ыкмаларын ишке ашыра алган-албаганын сурады.

"Бул ирет төртүнчү жолу беттешишти. Экөө бири-бирин жакшы билет. Айсулуу мен айткандын бардыгын жасаганга аракет кылды. Анткен менен бул спорт. Алты мүнөт күрөшүштү. Жалпы төрт беттеште тең өзүнүн койгон максаттарын аткарды. Бардык мүмкүнчүлүгүн, акыл-эсин, күч кубатын жумшады", — деди Изабеков.

Ошондой эле ал коло байге ээси Мээрим Жуманазарова менен бешинчи орунду алган Айпери Медет кызына өз баасын берип, Айсулуу менен Париж Олимпиадасына даярдык көрүү планы бар экенин айтты.

"Азыркы оюнга Рио Олимпиадасынан (2016-жыл) бери даярдык көрүп келе жатабыз. Кыздарыбыз жакшы даярданды. Айпери менен Мээрим 22 жашта. Психологиялык жактан Айпери кызыбыз кичине ишене албай калдыбы, жаштык кылды. Анткен менен медалга татыктуу болчу. Кудай буюрса, кийинки Олимпте Мээрим менен Айпери намыска жарайт деген ишенич бар. Айсулуу менен да Париж Олимпиадасына даярдык көрөбүз деген ниет бар", — деди башкы машыктыруучу.

Пресс-атташе Кабыл Макешов машыктыруучу Нурбек Изабековдон балбан кыздарды сүрөп атып үнү бүтүп калганын айтканда, "ар бирөө төрттөн беттеш өткөрдү. Жалпы 12 беттеш. Ар бир мелдештен кийин ушундай болот, бул көнүмүш адат. Бир жумада үнүбүз калыбына келет" деп жооп узатты.

Эске салсак, Токиодо болуп жаткан Олимпиада оюндарынан учурда Кыргызстан эки күмүш жана бир коло алды. Тагыраагы, 68 килограмм салмакта мелдешке чыккан Мээрим Жуманазарова Олимпиаданын коло медалын утуп, эгемен Кыргызстандын тарыхында Олимпиада медалын тагынган алгачкы балбан кыз болуп калды.

Айсулуу Тыныбекова 62 килограмм салмакта күрөшүп экинчи орунду камсыздап, Олимпиаданын күмүш медалын тагынды. Финалдык айыгышкан кармашта япониялык Юкако Каваиге 4:3 эсебинде утулду. Тыныбекова тарыхта Олимпиаданын күмүш медалын тагынган алгачкы балбан кыз болуп калды.

Грек-рим күрөшүнүн чебери Акжол Махмудов 77 килограмм салмакта ат салышып, Олимпиаданын күмүш медалын утту. Алтын байге үчүн финалдык беттеште ал венгриялык тажрыйбалуу балбан Тамаш Лёринцке 2:1 эсебинде жеңишти алдырды.

321
Белгилер:
Токио, олимпиада, Айсулуу Тыныбекова, Мээрим Жуманазарова, Айпери Медет кызы, балбан
Тема:
2021-жылы Токиодо өтө турган Олимпиада оюндары
Тема боюнча
Устат Изабеков Токиодо намыска жараган кыздарын канатына калкалап... Фотофакт
Эмоция кайнап, ыйлагым келип турат. Айсулуунун Токиодогу алгачкы билдирүүсү