Кыргызстандын түштүк аймагында медреседе окуган жаштарга 2017-жылдан тарта кесиптик билим бериле баштады.
Мындай демилгени ишке ашырууга салым кошуп жаткан "Авеп" коомдук фондунун өкүлү Нурлан Токонов балдарга кесиптик билим берүү аркылуу аларга экстремисттик агымдардан оолак болууга шарт түзүлүп жатканын билдирди.
"Ош, Жалал-Абад жана Баткен облустарындагы медреселерде билим алып жаткан жаштарга кошумча кесип үйрөтүү боюнча долбоор ишке ашырыла баштады. Кыргызстанда жалпы 86 диний билим берүү окуу жайы болсо, анын 30у өлкөнүн түштүк аймагындагы облустарда жайгашкан. Долбоордун алкагында 200 бала кабыл алынат. Алар ширетүүчүлүк, ашпозчулук, тигүүчүлүк кесиптерине ээ болуу үчүн эки жылдык окуудан өтөт", — деди Токонов.
Ал ошондой эле долбоор аяктаган соң медреселер кесиптик билим алууну акы төлөө жолу менен улантып кетсе болорун кошумчалады.
