Дастан Жапар уулу: Индияда ири өлкөлөрдүн мыкты тасмалары менен ат салыштык
Индиянын Ботхисаттва шаарында өткөн эл аралык кинофестивалда "Ата керээзи" тасмасы дүйнөнүн он тасмасы менен ат салышып, жеңип чыкты. Бул тууралуу тасманын режиссерлорунун бири Дастан Жапар уулу Sputnik Кыргызстан агенттигине билдирди.
Анын айтымында, эл аралык фестивалга ири өлкөлөрдүн мыкты тасмалары катышкан.
"Бул фестиваль экинчи жолу өткөрүлүп жатканы менен сынактары абдан көп болду. Алсак, кыска метраждуу, документалдык, анимациялык, эл аралык тасмалар жана Индиянын өзүнүн ичиндеги фильмдер болуп 8 сынак болду. Биз алардын ичинен толук метраждуу тасмалардын эл аралык сынагына катыштык. Биз менен бирге бул сынакта АКШ, Испания, Аргентина, Мьянма, Иран, Кытай мамлекеттеринин фильмдери ат салышты. Алардын катарында баш байгени биз алганыбыз күтүүсүз болду. Жеңүүчүнү калыстар тобу жабык түрдө добуш берип аныкташты", — деди режиссер Дастан Жапар уулу.
"Ата керээзи " тасмасы Индиядан ушуну менен экинчи жолу баш байге жеңип алып жатат. Буга чейин аталган тасма Бангалор шаарындагы эл аралык кинофестивалда да баш байгени багындырган.
