Былтыр Москва шаарында өрттөн каза болгон кыз-келиндердин жаркын элесине арналып тигилген көчөттөр бүчүр байлай баштагынан "Поколение BEST" коомдук бирикмесинин жетекчиси Нуриля Чекирова Sputnik Кыргызстан агенттигине билдирди.
"Москва шаарында өрттөн каза тапкан 17 эже-сиңдибиз менен курсакта кеткен баланын элесине арнап отургузган 18 дарак тең бүчүр байлай баштаптыр. Кеч күздө отургузулса дагы узак жана суук кышта көчөттөрдүн жанданып кеткени бизди абдан кубандырды", — деди Чекирова.
Дарактар былтыр ноябрь айында Бакаев — Айни көчөлөрүнүн кесилишиндеги "Лагерный" сейил багына шаар мэриясынын уруксаты менен отургузулган. Ошондой эле элден чогулган акчага, каза болгондордун аты-жөнү жазылган эстелик таш коюлган.
Эске салсак, 27-август күнү Москвадагы "Печатный экспресс" басмаканасында өрт чыгып, андан 14 кыргызстандык кыз-келин жана россиялык үч аял каза болгон.
