Бир Бол фракциясынын депутаты Акылбек Жапаров. Архивдик сүрөт

Жапаров: инвентаризация коррупцияга бөгөт койчу негизги жол

74
(жаңыланган 22:20 29.11.2018)
"Бир Бол" фракциясынын депутаты Акылбек Жапаров мамлекеттик мүлктүн эсебин чыгаруу менен коррупцияны кескин түрдө азайтуу мүмкүн экендигин билдирди.
Жапаров: инвентаризация — коррупцияга бөгөт койчу негизги жол

Мамлекет жер үстү менен жер астындагы өз байлыктарынын эсебин так билсе, өлкөдө экономикалык өнүгүү болот. Мындай пикирин Акылбек Жапаров Sputnik Кыргызстан радиосунун "Ачык кеп" программасында маек куруп жатып билдирди.

Анын айтымында, аталган фракция инвентаризация жүргүзүү боюнча токтом кабыл алып, өкмөткө тапшырган. Бирок учурда эч кандай иш жүргүзүлө элек.

"Ар бир үй-бүлөдө кожоюн канча мал-мүлк бар экенин билет. Аялы идиш-аяк, кийим-кечегинин эсебине так. Ушул сыяктуу эле мамлекет да өз байлыктарынын эсебин билиши зарыл. Кыргызстан эгемендүүлүк алгандан бери бир да жолу инвентаризация жүргүзүлгөн эмес. Башкача айтканда, учурда өлкөгө эмне тиешелүү, кайсы объект же жер жеке менчикке өтүп кеткен, канчасы ижарада турат, элде канча унаа, канча мал бар, эч ким эсебин билбейт. Ошонун негизинде башаламандык жаралат. Биринчи эле кезекте экономикага зыянын тийгизет. Эгер мамлекет канча айдоо жерине эмне себилип жатканын билсе, болбосо кайсы аймакта кайсы малдын түрү көп экени аныкталса, жылына канча автоунаа кирип, канчасы чыгып жатканы так болсо, ошого жараша чыгым, керектөөлөр эсептелип, божомолдор жасалып, иш жүрмөк да, туурабы? Так эсеби жок өлкөдө коррупция да гүлдөп өнүгө берет. Инвентаризация жасоо менен биз жемкорлуктун күрөө тамырын кесет элек ", — деди Акылбек Жапаров.

Эл өкүлү аталган маселеде учурдагы премьер-министр менен фракциянын ою бир жерден чыгып жатканын, ошондуктан өкмөт бул ишти кечеңдетпей аткарарына үмүт артарын кошумчалады.

74
Белгилер:
Акылбек Жапаров, инвентаризациялоо, мамлекет, мүлк, мыйзам
Тема боюнча
Сулайманов: мамлекеттик мүлктү инвентаризациялоо керек
Саламаттык сактоо министрлигинин штаттан тышкаркы башкы фармакологу Жылдыз Жумагулова

Жумагулова: онкологияга чалдыккандарга кан тапшырып жардам кылса болот

7
Саламаттык сактоо министрлигинин штаттан тышкаркы башкы фармакологу Жылдыз Жумагулова онкологиялык илдетке чалдыккандарга жылдап дарыланууга туура келерин белгиледи.

Онкологияга чалдыккандар дары-дармек, медициналык жабдуу алуу үчүн каржылык жана кан донорлорунун жардамына муктаж. Бул тууралуу Жылдыз Жумагулова Sputnik Кыргызстан радиосунда маек куруп жатып билдирди.

Жумагулова: онкологияга чалдыккандарга кан тапшырып жардам кылса болот

Анын айтымында, онкологияга чалдыккандар үчүн өкмөт тарабынан каржы бөлүнөт, бирок ал жетишсиз.

"Кыргызстандын фармацевтикалык рыногу чакан болгондуктан көп компаниялар акыркы чыккан дарыларды алып келүүгө кызыкдар эмес. Башка ооруларга салыштырмалуу онкологияга чалдыккандар жылдап дарыланат. Ошондуктан бир жылга ченеп алынган дарылар кээде жетишсиз болуп калат. Мындан тышкары, медициналык жабдууларга дагы муктаждык күч. Мына ушул көйгөйлөрдү чечүү үчүн элдин көмөгү зарыл. Мисалы, балага диагноз коюлганда ата-энеге психологиялык дагы көмөк керек. Анткени муну кабыл алуу абдан оор болот. Ошондой эле тромбоциттик масса менен камсыздоонун наркы дагы жогору. Анткени ал он чакты донордун канынан даярдалат. Ошондуктан мүмкүнчүлүгү барлар онкологиялык илдетке чалдыккандарга деп кан тапшырса, бул дагы бир адамдын өмүрүн сактаганга жардам болот. Мындан тышкары, өлкөдө полиативдик көмөк дагы жөнгө салынган эмес. Аталган дартка чалдыккандар толук кандуу сакайбай калган учурлар кездешет. Онкологиялык илдетте чыдатпаган оору болот. Аны басаңдатуу үчүн наркотикалык багыттагы дарылар жазылат. Аны рецептсиз жок алуу мүмкүн эмес. Айрым медиктер муну жазып бербей койгон учурлар кездешет. Мына ушул багыттагы көмөктү дагы жолго салуу зарылдыгы бар", — деди Жумагулова.

Ошондой эле ал онкологиялык ооруга чалдыккандар табыптарга барып, дарыгерлерге кеч кайрылып калган учурлар да болуп жатканын кошумчалады.

Белгилей кетсек, Sputnik Кыргызстан радиосу онкологиялык илдетке кабылган балдарга жардам берүү максатында башталган алгачкы ири радиомарафонго катышты. Чогулган каражат долбоордун алкагында оорулууларга жана аларды дарылап жаткан дарыгерлерге жумшалат.

Подкасттын толук вариантын видеодон көрүңүз:

 

7
Тема боюнча
Арзыкулов: онкологиялык ооруга кабылган балдарга ар бир адам жардам бере алат
Республикалык СПИД борборунун дарылоо бөлүмүнүн дарыгери Эркин Тостоков

Тостоков: өлкөдө 1500-2000дей адам ВИЧ менен ооруганын билбейт

9
Республикалык СПИД борборунун дарылоо бөлүмүнүн дарыгери Эркин Тостоков Кыргызстанда бүгүнкү күндө 11 006 адам расмий түрдө ВИЧ/СПИД инфекциясы менен каттоодо турарын айтты.

Биздин эң негизги көйгөй — ВИЧ инфекциясын жуктурган жаңы учурларды аныктоо болуп эсептелет. Үстүбүздөгү жылдын ноябрь ичи калк арасында инфекцияны анонимдүү жана бекер диагностикалоону жогорулатууга багытталган ыкчам тестирлөө боюнча иш-чаралар өткөрүлдү. Ошондой эле өлкөдөгү окуу жайларда, жаштар уюмдарында, мекеме-ишканаларда жана эл көп чогулуучу коомдук жайларда ВИЧ\СПИД илдети тууралуу маалыматты жайылтуу жана түшүндүрүү иштери жүрүп, атайын семинарлар, талкуулар болду. Бул тууралуу Эркин Тостоков Sputnik Кыргызстан радиосунун эфиринде маек куруп жатып билдирди.

Тостоков: өлкөдө 1500-2000дей адам ВИЧ менен ооруганын билбейт

Анын айтымында, учурда ВИЧ илдети менен ооруган киши кайсы аймакта катталса, жашаган жерине карабастан ошол аймактын статистикасына кошулат.

"Быйыл он айдын жыйынтыгы боюнча 665 кишиден ВИЧ/СПИД аныкталды. Жалпысынан расмий түрдө Кыргызстанда 11 006 адам ВИЧ/СПИД инфекциясы менен каттоодо турат (Чүй – 2965, Бишкек – 2406, Ош облусу – 1634, Ош шаары – 1200 жана башка облустар). Анын 10395и кыргызстандыктар, ал эми калганы чет өлкөлүк жарандар. Бейтаптардын 63 пайызы эркек, ал эми 37 пайызы аял кишилер. Оорудан каза болгондордун саны 2385 кишини түзөт. ВИЧ илдетинин эң акыркы баскычы болгон СПИДге кабылгандар 1148 адамга жетти. Эл аралык, саламаттык сактоо уюмдары тарабынан жүргүзүлгөн атайын иш-чаранын жыйынтыгы боюнча Кыргызстанда болжол менен 1500-2000дей адам ВИЧ илдетин алып жүрөт жана алар ооруганын билбейт. Биздин негизги максат — ошол адамдарды таап, аныктап жана дарылоо иштерин жүргүзүү. 2000-2010-жылдары ВИЧ инъекциялык жол менен көбүрөөк тараса, азыр 80 пайыз жыныстык жол аркылуу жугуп жатат", — деди Тостоков.

Дарыгер бейтап дайыма антиретровирустук дарыларды ичип турса эле кадимкидей өмүр сүрүп, адамдарга оору жугузбай турганын, ал эми дарылар бекер берилерин эскертти.

9
Белгилер:
ВИЧ, СПИД, Кыргызстан, статистика, бейтап, Эркин Тостоков
Тема боюнча
Адис: COVID-19дун жаңы штаммы СПИД болгон адамда пайда болушу мүмкүн
Жогорку Кеңештеги депутаттын орун жайы. Архивдик сүрөт

Үч депутаттын кол тийбестигин карачу комиссия түзүлдү. Курамы

0
(жаңыланган 12:31 01.12.2021)
Комиссиянын чечимине карап парламент кылмыш жоопкерчилигине тартууга макулдук берүү же бербөө маселеси добуш берүү менен чечилет.

БИШКЕК, 1-дек. — Sputnik. Жогорку Кеңештин депутаттары Асылбек Жээнбеков, Төрөбай Зулпукаров жана Бакыт Жетигеновдун кол тийбестигин ажыратуу сунушун иликтөөчү депутаттык комиссия түзүлдү.

Башкы прокурор Курманкул Зулушев аталган эл өкүлдөрүн кылмыш жоопкерчилигине тартууга макулдук берүүнү сураган. Анын сунуштамасын кароо үчүн комиссиянын курамына жети депутат кирди. Алар төмөнкүлөр:

  • КСДПдан Евгения Строкова;
  • "Республика Ата-Журт" фракциясынан Авазбек Абдугапаров;
  • "Кыргызстан" фракциясынан Алмаз Токторов;
  • "Кыргызстан" фракциясынан Канат Исаев;
  • "Өнүгүү" фракциясынан Тазабек Икрамов;
  • "Бир бол" фракциясынан Мамасадык Бакиров;
  • "Ата Мекен" фракциясынан Эмил Токтошев.

Комиссиянын курамына кирген эл өкүлдөрү бир айлык мөөнөттүн ичинде иликтеп, парламентке баяндама жасашы керек. Андан соң кылмыш жоопкерчилигине тартууга макулдук берүү же бербөө маселеси добуш берүү менен чечилет.

Буга чейин да 27-ноябрда эл өкүлдөрүнүн кол тийбестигин алуу боюнча ЖКнын кезексиз жыйыны пландалып, кворум жоктугунан өтпөй калган.

Белгилей кетсек, Жээнбеков менен Зулпукаров үстүбүздөгү жылдын июнь айында "Кумтөр" долбоорун ишке киргизүүдөгү коррупциялык иштерге катыштыгы бар деген шек менен кармалган. Алар учурда УКМКнын тергөө абагында

Ал эми Бакыт Жетигенов бийликти басып алууга белсенген деген шек менен шайлоонун алдында кармалган.

0
Белгилер:
Жогорку Кеңеш, депутат, Асылбек Жээнбеков, кол тийбестик, комиссия