2019-2020- окуу жылынан баштап 1-класска окуучулар электрондук каттоо аркылуу гана кабыл алынат. Бул тууралуу Төлөгөн Аматов Sputnik Кыргызстан радиосунун таңкы эфиринде маек куруп жатып билдирди.
Анын айтымында, электрондук каттоо эки баскычтан турат. Биринчи этабы 15-февралдан 15-майга чейин, экинчиси 16-майдан 15-августка чейин жүрөт.
"Электрондук каттоо башталгыч класстарды кабыл алуу үчүн гана иштейт. Ата энелер балдарын 1-класска берүүгө алгач www.mektep.edu.gov.kg сайтына кирип, баласын каттоого тургузушу керек. Сайтты колдонуу абдан жеңил, ата-энелерге ылайыкташтырылган. Балдарды каттоо эки баскычтан туруп, биринчиси 15-февралдан 15-майга чейин өз аймагындагы мектептерге кабыл алат. Эгер ата-эне башка мектепке бергиси келсе, 16-майда баштала турган экинчи этабын күтүп турушу керек. Ал 15-августка чейин уланат. Пилоттук программа азырынча Бишкек шаарын өзүнө камтыйт", — деди Аматов.
Адис аталган маалыматтык система мектепке кабыл алуудагы коррупцияны жоюу максатында жасалып жатканын кошумчалады.
