Маданият, маалымат жана туризм министринин орун басары Кайрат Иманалиев

Иманалиев: Көчмөндөр оюндарынын максаты элди биримдикке чакыруу

Маданият, маалымат жана туризм министринин орун басары Кайрат Иманалиев Таласта өтө турган Көчмөндөр оюндарына даярдыктар кызуу жүрүп жаткандыгын белгиледи.
Иманалиев: Көчмөндөр оюндарынын максаты — элди биримдикке чакыруу

Көчмөндөр оюндарын республикалык деңгээлде жыл сайын өткөрүүнүн максаты — элди биримдикке, ынтымыкка чакыруу. Ата-бабалардын үмүт-тилеги кандай болгон, ошону биз татыктуу аткарып жатабызбы деген идеологияны чагылдыруу. Бул тууралуу Кайрат Иманалиев Sputnik Кыргызстан радиосунда маек куруп жатып билдирди.

Анын айтымында, аталган иш-чара 16-21-сентябрь күндөрү Талас облусундагы "Манас Ордо" маданий-тарыхый комплексинде өтөт.

"Көчмөндөр оюндары мындан ары жыл сайын республиканын ар облусунда өткөрүлүп турмакчы. Максаты - элдин биримдигин чыңдоо, ынтымакка үндөө. Ошондой эле нечен кылымдан бери бирде ылдый, бирде өрдү карай жол тартып келе жаткан кыргыз көчүнүн тарыхы, маани-маңызы менен жаш муунду тааныштыруу, аларга тарбиялык насаат катары ата-бабалардын баскан жолун ачып көрсөтүү болуп саналат. Дүйнөлүк көчмөндөр оюндары өткөрүлгөндө айрым атуулдар долбоордун кереги жоктугун, чыгымдан башка пайдасы болбостугун айтып чыгышкан. Бирок мындай иш-чаралар элге кадыресе дем-күч берерине күбө болдук. Андыктан, жан дүйнөнү байытуу максатында келечек муунга тарбиялык маанисин көрсөтүү үчүн бул долбоор уланып, өткөрүлүп турушу керек", — деди Иманалиев.

Ошондой эле ал Таласта өтчү маданий, спорттук оюн-зооктордун баары көрүүчүлөр үчүн акысыз тартууланарын кошумчалады.

Белгилер:
тарых, ордо, Манас, Талас, Дүйнөлүк көчмөндөр оюндары, Кайрат Иманалиев
Тема боюнча
Жаңы ипподром, этнофестиваль, спорттун 10 түрү. Көчмөндөр оюнуна даярдык күч
Өсүмдүк таануучу Абдыганы Абдыгапаров

Абдыгапаров: органикалык продукцияны көбөйтүүгө кооперативдер керек

Өсүмдүк таануучу Абдыганы Абдыгапаров Кыргызстанда органикалык продукцияны өндүрүүнү өнүктүрүү үчүн туура баа коюлушу керектигин айтты.

Айдоо талааларына изилдөөлөрдү жүргүзүп, атайын лабораториялар курулса продукциянын сапатын көзөмөлдөө оңой болот. Мындай пикирин Абдыганы Абдыгапаров Sputnik Кыргызстан радиосунун эфиринде маек учурунда билдирди.

Абдыгапаров: органикалык продукцияны көбөйтүүгө кооперативдер керек

Анын айтымында, дыйкандар органикалык продукцияны көп көлөмдө экспорттоо үчүн атайын ассоциация же кооператив түзүп тыгыз байланышта иштөөсү зарыл.

"Бизде органика өнүгүшү үчүн ага коюлган туура баа болушу керек. Ошондо табигый продукцияларды өстүргөн дыйкандардын саны да көбөйөт. Мисалы, химикат колдонгон дыйканга салыштырмалуу органикалык өсүмдүк өстүргөндөрдүн түшүмү аз болот. Бирок баасы бирдей жана түйшүгү көп болгондуктан минералдык жер семирткичтерди колдонууга өтөт. Органикалык продукцияны атайын лабораторияларда текшерүү керек. Тилекке каршы, заманбап технологиялык лабораториялар жокко эсе. Дыйкандар органикалык продукцияны ири көлөмдө экспорттоо үчүн атайын ассоциация же кооператив түзүп тыгыз байланышта иштесе жыйынтык жакшы болот", — деди Абдыгапаров.

Ошондой эле адис айыл чарбасында жер семирткичтерди туура колдонуу дыйкандын ишин бир топ жеңилдетерин кошумчалады.

Белгилер:
жер семирткич, айыл чарба, агроном
Тема боюнча
Кыргызстанда минералдык жер семирткич экспорттоого тыюу салынды
Невролог, КММАнын А. Мурзалиев атындагы неврология жана клиникалык генетика кафедрасынын ассистенти Кундуз Карбозова

Карбозова: Паркинсон оорусу тукум кууйт

(жаңыланган 13:24 13.04.2021)
Невролог, КММАнын А. Мурзалиев атындагы неврология жана клиникалык генетика кафедрасынын ассистенти Кундуз Карбозова азыркыга чейин Паркинсон оорусунун пайда болушунун так себептери аныкталбаганын айтты.

Англиялык дарыгер Жеймс Паркинсон ооруну изилдеп, илдет тууралуу кагаз бетине жазып чыккан. Ошентип дартка анын ысымы коюлуп калган. Бул тууралуу Кундуз Карбозова Sputnik Кыргызстан радиосунун эфиринде маек куруп жатып билдирди.

Карбозова: Паркинсон оорусу тукум кууйт

Анын айтымында, белгисиз себептерден улам Паркинсон илдети менен аялдарга караганда эркектер көбүрөөк жабыркайт.

"Паркинсон оорусу — нерв системасынын нейродегенеративдүү оорусу. Башкача айтканда мээнин кайсы бир бөлүгүнүн нейрондорунун өлүшү менен коштолот. Мээдеги нигро субстанция (же кара субстанция) деп аталган бөлүгү дофамин затын бөлүп чыгарат. Ал биздин кыймыл-аракет, эс тутум, маанайга таасир эткен нерв системабыздын эң белгилүү нейротрансмиттеринин бири. Бул зат азайганда Паркинсон оорусу пайда болуп, адамдын кыймыл-аракети бузулат. Бейтап кыймылдай албай, тең салмактуулукту сактай албай калат. Андан тышкары, эс тутум өзгөрүп, деменция (ой калчоонун жайлашы — ред.) байкалат. Паркинсон 1755-1756-жылдардан бери изилденип келгени менен азыркыга чейин оорунун пайда болушунун так себептери белгисиз. Ошентсе да мында генетикалык мутациялар болору аныкталган. Демек, тукум кууйт. Аталган дарт менен 60 жаштан кийинки курактагы, кээде 40 жаштагы адамдар, химиялык заттарды көп пайдалангандар ооруп калат. Илдет Паркинсон оорусу жана паркинсонизм деп да бөлүнөт. Биринчисинде жогоруда аталган белгилер болсо, экинчиси баш сөөк жаракат алганда, инсульттан кийин байкалышы мүмкүн", — деди Карбозова.

Невролог аталган илдетте ырахат нейротрансмити болгон дофамин азайгандыктан, адам суусап туруп суу ичсе, ачка болуп туруп тамак жесе ырахат ала албай турганын кошумчалады.

Белгилер:
Кундуз Карбозова, маанай, мээ, дарт
Тема боюнча
Интеллектуал адамдар кайсы ооруга көп кабылат? Дарыгердин пикири
Россиянын президенти Владимир Путин. Архивное фото

Үчүнкү өлкөдө жолугалы. Байден Путин менен телефондон сүйлөшүп, сунушун айтты

(жаңыланган 10:20 14.04.2021)
Эки тарап тең Россия менен АКШнын гана кызыкчылыгы эмес, бүткүл дүйнө коомчулугуна пайда алып келүү үчүн мындан ары дагы диалогду улантууга даяр экенин билдирди.

БИШКЕК, 14-апр. — Sputnik. АКШ президенти Жо Байден Россия лидери Владимир Путин менен телефон аркылуу сүйлөшүп жатып, кесиптешин жакынкы айларда үчүнчү өлкөдө жолугушууга чакырды. Бул тууралуу Кремлдин маалымат кызматына шилтеме берип РИА Новости жазды.

Билдирүүгө караганда, сүйлөшүү АКШнын демилгеси менен уюштурулду.

Президент Байден Россия менен мамилесин турукташтырып, жакшыртууну максат кылганын айтты. Ал жакынкы айларда жолугуп, Россия менен Американын ортосундагы көйгөйлүү маселелерди талкуулоого чакырган.

"Байден Крым жана Украина менен чектешкен аймакта орус аскерлери күчтөндүрүлгөнүнө тынчсызданып жатканын айтып, бул өлкөнүн эгемендүүлүгү менен аймактык бүтүндүгүнө АКШ кызыкдар экенин кошумчалады. Мындан тышкары, "эгер Россия киберчабуул жана шайлоолорго аралаша турган болсо", Вашингтон өз кызыкчылыгын коргой турганын билдирди", — деп айтылат кабарда.

Россия президентинин маалымат катчысы Дмитрий Песковдун айтымында, Россия буга чейин деле АКШдагы шайлоолорго аралашпагандыгын айтып, айыптоолорду курулай жалаа жабуу деп баалап келгенин билдирди.

Эки тарап тең Россия менен АКШнын гана кызыкчылыгы эмес, бүткүл дүйнө коомчулугуна пайда алып келүү үчүн мындан ары дагы диалогду улантууга даяр экенин билдиришти.

Лидерлер алдыда Афганистандагы кырдаал, Ирандын өзөктүк программасы, климаттын өзгөрүшү сыяктуу көйгөйлүү маселелер боюнча сүйлөшүүлөрдү жүргүзөрү белгилүү болду.

Белгилер:
Россия, талкуу, сүйлөшүүлөр, Владимир Путин, Жо Байден, АКШ
Тема боюнча
Донбасста согуш жанданабы? Путин Меркель жана Макрон менен эмнени сүйлөштү