Экономика илимдеринин доктору, профессор Айылчы Сарыбаевдин архивдик сүрөтү

Сарыбаев: мамлекеттик ведомстволор бизнеске аралашпашы керек

33
(жаңыланган 09:53 23.09.2019)
Экономика илимдеринин доктору, профессор Айылчы Сарыбаев Кыргызстандын Конституциясына ылайык өлкөдө ишкерликтин бардык түрү менен алектенүүгө мүмкүнчүлүк бар экенин айтты.

Айрым шылуун адамдар мамлекеттик кызматты бизнеске айландырып алышкан. Ошонун кесепетинен жергиликтүү ишкерлик тармагы өнүкпөй жатат. Бул тууралуу Айылчы Сарыбаев Sputnik Кыргызстан радиосунун таңкы эфиринде маек куруп жатып билдирди.

Анын айтымында, бизнесмендердин ишине мамлекеттик ведомстволор аралашып, аларга жол көрсөтүп, рыноктогу ордун таап берүүгө ашыга беришет, чынында бул туура эмес. Анткени ишкерлерди мажбурлап иш кылдыруу бизнес чөйрөсүнүн өнүгүүсүнө бөгөт коёт.

"Бизнес рыноктун шартында гана өнүгөт. Суроо-талапка жараша атаандаштык болуп, ишкерлер издене баштайт. Өнүккөн өлкөлөрдүн тажрыйбасын колдонушат. Эң башкысы мыйзамда каралган ишкерлердин укуктары бузулбаса, сөзсүз өнүгүү болот. Ал үчүн Конституцияда бардык шарттар каралган. Бирок бизде айрым шылуундар мамлекеттик кызматты бизнеске айландырып алышты. Ошонун кесепетинен жылыш болбой жатат. Жемкорлуктун айынан ишкерлик чөйрөсү жапа чегүүдө. Айрым ведомстволор бизнесмендерге рыноктогу ордун таап берүүгө аракеттенишет. Бул туура эмес. Мажбурлоо болгон жерде өсүү болбойт. Ишкерлерди жайына коюп, алардын ишине мамлекеттик органдар тоскоол болбошу керек", — деди Сарыбаев.

Ошондой эле ал учурда ишкерлердин жаңы мууну пайда болуп, дүйнөлүк рынокко чыгууга жасалган аракети менен заман талабына жараша иш алып барууга умтулуп жатканын кошумчалады.

33
Белгилер:
мамлекет, Өнүгүү, рынок, шарт, мыйзам, бизнес, Айылчы Сарыбаев
Тема боюнча
Айылчы Сарыбаев: мигранттар салган акча максатсыз пайдаланылып жатат
Робин Орд-Смит Кыргызстандын бизнес-акыйкатчысы болуп дайындалды