Маалымат жана массалык коммуникациялар департаментинин укуктук иштер бөлүмүнүн башчысы Бектур Ибрагимов

Ибрагимов: убакытты узарта бергенде мыйзам аткарылбайт экен

39
Маалымат жана массалык коммуникациялар департаментинин укуктук иштер бөлүмүнүн башчысы Бектур Ибрагимов эфирге чыккан берүүлөрдүн теңи атамекендик медиа-продукция болсун жана кыргыз тилиндеги көрсөтүүлөр 50 пайыздан аз эмес көлөмүн түзсүн деген норма бар экенин айтты.
Ибрагимов: убакытты узарта бергенде мыйзам аткарылбайт экен

"Теле көрсөтүү жана радио берүү" мыйзамынын кабыл алынганына 11 жылдын жүзү болду. Азыр айтылып жаткан талаптар башында эле жазылган болчу. Бирок мыйзамды аткарууга эч бир телеканал шашылган жок. Бул тууралуу Бектур Ибрагимов Sputnik Кыргызстан радиосунун таңкы эфиринде маек куруп жатып билдирди.

Анын айтымында, аталган мыйзамга таянуу менен Маданият, маалымат жана туризм министрлиги пландуу жана пландалбаган текшерүүлөрдү жүргүзүп турат.

"Телевидение жана радио тармагындагы мыйзам 11 жыл мурда эле кабыл алынган. Ошондо эле көрсөтүү, уктуруулардын жарымы жергиликтүү медиалар тарабынан жасалган продукция болсун, эфирлердин 50 пайыздан кем эмеси кыргыз тилинде чыксын деген талаптар коюлган. Өлкө санариптештирүүгө өткөн соң көптөгөн жеке менчик телеканалдар ачылып, алар өз контенттерин түзүп алуу үчүн жеңилдетилген тартипте иштөөгө убакыт сурашкан. 2017-жылы аталган мыйзамга өзгөртүүлөр киргизилип, бул өтүнүч үч жылдык мөөнөткө, тагырагы, 2020-жылга чейин канааттандырылган. Эми 2020-жылдын 1-январынан тарта жеңилдетилген убакыт бүтөт. Үч эле жыл берилип калды, бул аз дегенге кошулбайм. Анткени мыйзам кабыл алынганда эле бул нормалар жазылган. Өзүн сактап калам деген телевидение же радио 11 жыл аралыгында аракет жасашы керек болчу", — деди Ибрагимов.

Ал мыйзамды бузган теле, радиолорго айып салуу укугу да Маданият, маалымат жана туризм министрлигине берилгендигин кошумчалады.

39
Белгилер:
мыйзам, радио
Жети-Өгүз райондук Эмгек жана социалдык өнүгүү башкармалыгынын үй-бүлө жана балдарды коргоо бөлүмүнүн башчысы Гүлбара Жаанбаева

Жаанбаева: Жети-Өгүздө балдар үйүнүн ордуна фостердик үй-бүлөлөр иштөөдө

125
Жети-Өгүз райондук Эмгек жана социалдык өнүгүү башкармалыгынын үй-бүлө жана балдарды коргоо бөлүмүнүн башчысы Гүлбара Жаанбаева аталган райондо учурда алты фостердик үй-бүлө бар экендигин айтты.
Жаанбаева: Жети-Өгүздө балдар үйүнүн ордуна фостердик үй-бүлөлөр иштөөдө

Учурда район боюнча оор кырдаалга кабылган 11 бала алты фостердик ата-эненин колунда тарбияланып жатат. Жалпысынан 17 үй-бүлөнү окутуп, даярдыктан өткөрүп алганбыз. Бул тууралуу Гүлбара Жаанбаева Sputnik Кыргызстан радиосуна маек куруп жатып билдирди.

Анын айтымында, 2015-жылдан бери Жети-Өгүз районунда 40тан ашуун бала фостердик үй-бүлөдө тарбияланып чыкты.

"Фостердик үй-бүлө менен балдар үйүнүн айырмасы абдан чоң. Фостердик үй-бүлө же балдарды асырап алган ата-энелерде тарбияланган жеткинчектер кадимки үй шартында, ошол үй-бүлө мүчөсү болуп өсүп жетилет. Үй турмушунда жасалчу иштерди ата-энеси менен биргеликте аткарат. Муну менен жер иштетүү, мал багуу, кыздар ашкана жумуштарын өз алдынча аткарууга даяр болуп чыгышат. Учурда өкмөт дагы балдар үйлөрүн азайтып, фостердик үй-бүлөлөрдү көбөйтүү тапшырмасын койгон. Биз бул багытта жакшы ийгиликтерге жетиштик. 17 үй-бүлөнү атайын окуудан өткөрүп даярдап алганбыз. Алардын алтоондо азыр 11 бала тарбияланып жатат. Жамандык болбой эле койсун, бирок турмуштун оор кырдаалына туш болгон балдар кезиксе биздин район өзүн-өзү камсыздап кете алат", — деди Жаанбаева.

Ал фостердик үй-бүлө болууну каалагандар үчүн атайын критерийлер бар экендигин жана кабыл алынган бала 18 жашка толгончо тиешелүү мамлекеттик органдар тарабынан көзөмөлгө алынып турарын кошумчалады.

125
Белгилер:
Жети-Өгүз району, үй-бүлө, фостердик үй
Тема боюнча
Кочкоров: жарандар бала асырап алууга онлайн арыз бере алат
Мамлекеттик салык кызматынын маалыматтык камсыздоо бөлүмүнүн башчысы Эркин Сазыков

Сазыков: 1-июлдан тарта электрондук эсеп-фактура ишке кирет

16
Мамлекеттик салык кызматынын маалыматтык камсыздоо бөлүмүнүн башчысы Эркин Сазыков өлкөдө кошумча нарк салыгын төлөөчүлөр 10 миңге чукул экендигин айтты.

Электрондук эсеп-фактуралар, товарларды онлайн идентификациялоо каражаттары менен маркалоо жана май куюучу жайларды башкаруунун автоматташтырылган системасы 1-июлдан тартып ишке киргизилет. Бул тууралуу Эркин Сазыков Sputnik Кыргызстан радиосуна маек куруп жатып билдирди.

Сазыков: 1-июлдан тарта электрондук эсеп-фактура ишке кирет

Анын айтымында, салык жол-жоболорун фискалдаштыруу үчүн аралыктан тейлене алат.

"Салык жол-жоболорун фискалдаштыруунун алкагында тийиштүү долбоорлор киргизилүүдө. 2019-жылдын 1-июлунан тартып электрондук эсеп-фактураларды колдонуу боюнча сынамык долбоор иштеп баштайт. Учурда ага катышкан үч миңдей компания өзүнүн сунуштарын берүүдө. Бүгүнкү күндө ар бир салык төлөөчү бул система менен туура колдонуусу үчүн аталган компаниялар менен тийиштүү жолугушуулар ар жума сайын жүргүзүлүүдө. 1-июлдан тарта электрондук эсеп-фактураны кошумча нарк салыгын төлөөчүлөр, товар импорттоочулар жана экспорттоочулар милдеттүү түрдө колдонууга тийиш. Республикада КНС төлөөчүлөр 10 миңге чукул. Ал эми товарларды экспорт, импорт кылган компаниялар төрт миңге жакын", — деди Сазыков.

Ошондой эле ал салык жол-жоболорун фискалдаштырууга жетишпей калган компанияларга түшүндүрүү иштери жүргүзүлө турганын кошумчалады.

16
Белгилер:
эсеп-фактура, салык, Эркин Сазыков
Тема боюнча
Бир айдан кийин өлкөдөгү бардык май куюучу жайлар тыкыр көзөмөлдөнө баштайт
Россия сегодня эл аралык агенттигинин башкы редактору Маргарита Симоньян

Сотко беришибиз мүмкүн! Симоньян АКШда жабыркаган журналисттер тууралуу

25
(жаңыланган 03:39 03.06.2020)
Америкадагы нааразычылык акцияларын чагылдырып жүргөн РИА Новости жана Sputnik агенттигинин кабарчылары полиция тарабынан одоно аракеттерге туш болушкан.

БИШКЕК, 3-июн. — Sputnik. "Россия сегодня" эл аралык агенттигинин башкы редактору Маргарита Симоньян редакциянын кабарчыларына кол салган америкалык полиция кызматкерлерине каршы доо арыз берилиши мүмкүн экендигин билдирди. Бул тууралуу РИА Новости жазды.

"Акыркы үч күндүн ичинде Американын полициясы РИА Новостинин Миннеаполистеги кабарчысы менен Вашингтондогу Sputnik агенттигинин продюсерине кол салды. Экөө тең пресс-карталарын көрсөтүп, кабарчы экендигин айтып кыйкырышкан. Аны полиция көрүп да, угуп да койгон эмес. Учурда АКШ өзүнүн медиасына да ушундай мамиле кылып жатат. Мыйзам бар мамлекетте, албетте, биз сотко кайрылмакпыз. Бирок бүгүнкү Америкада мыйзам полициядан да жакшы иштейт деп айтууга негиз жок. Биз муну ойлонуп көрөбүз", — деген Симоньян.

Өткөн жекшембиде полиция Миннеаполистеги башаламандыкты чагылдырып жаткан РИА Новостинин кабарчысы Михаил Тургиевге көздөн жаш агызуучу газ чачып жиберген. Буга байланыштуу Россиянын элчилиги мамлекеттик департаментке нааразычылык нотасын жөнөткөн.

Ал эми шейшемби күнү Вашингтон полициясы нааразычылык акциясын видеого тартып жүргөн Sputnik агенттигинин продюсери Николь Русселдин журналист экендигин билип туруп желим ок менен аткылаган.

Полиция Тургиев менен Руссел журналист экендигин тастыктаганына карабастан, атайылап орой мамиле жасаган.

Афроамерикалык жарандын өлүмүнөн кийин АКШда өткөн жумадан тарта нааразычылык акциялары башталып, ал башаламандыкка айланып кетти. Бир нече шаарга коменданттык саат киргизилип, полиция кызматкерлери тартипке көз салганы менен башаламандыктын аягы сууй элек. Ири шаарларда дүкөндөр талкаланып, мародёрлук күч алганын ЖМКлар жазып жатышат.

Ал эми АКШ президенти Дональд Трамп башаламандыкты террорчулук деп сыпаттаган.

25
Белгилер:
журналист, башаламандык, АКШ
Тема:
АКШда афроамерикалыктын өлүмүнөн кийинки башаламандык
Тема боюнча
АКШ полициясы ЖМК өкүлү экенин билип туруп Sputnik продюсерине ок чыгарды