Мамлекеттик каттоо кызматынын төрагасы Алмаз Мамбетов

Мамбетов: заманбап автодром куруу пландаштырылууда

Мамлекеттик каттоо кызматынын төрагасы Алмаз Мамбетов каттоо кызматындагы кезек күтүүлөрдү жана автоунааларды каттоодогу кыйынчылыктарды жеңилдетүү үчүн иштер алып барылып жатканын айтты.
Мамбетов: заманбап автодром куруу пландаштырылууда

Жакын арада заманбап  автодром  куруу пландаштырылып жатат. Бул тууралуу Алмаз Мамбетов Sputnik Кыргызстан радиосунун "Ачык кеп" программасында маек куруп жатып билдирди.

Анын айтымында, Мамлекеттик каттоо кызматында калкты каттоо департаменти, архивдик агенттик, инфоком, кыргыз почтасы, унаа мамлекеттик ишканасы кызматтары иштейт.

"Кыргызстандын Мамлекеттик каттоо кызматына быйыл 10 жыл толду. Аталган мекемеге төрага болуп апрель айында келгем. Негизги жетишкендигибиз автоунааларды каттоого, техпаспорт, айдоочулук күбөлүк жана автокөлүктөргө номур алууга жеңилдиктер киргизилди. Мурда документтерди жеке компания жасап берсе, эми бул нерсени өзүбүз колго алдык. Айдоочулук күбөлүк 1300 сомдун тегерегинде берилип келген, эми 700 сомго чейин арзандады. Автоунаанын техпаспорту мурда 10 евро болсо, азыр 192 сомго, кайра каттоодогу төлөм 50 пайызга түштү. Ошондой эле автомашинанын номурлары 385 сомдун тегерегинде берилсе, эми 200 сом болуп калды. Биз бул менен гана чектелип калбайбыз. Алдыда заманбап автодром курууну пландаштырып жатабыз. Анда шаардын имитациясы салынып, камералар коюлуп, унааларды инструкторсуз айдоого мүмкүнчүлүк түзүлөт", — деди Мамбетов.

Ал жасалма номурларды тагып жүргөн айдоочуларга катуу жаза берилиши керек экенин кошумчалады.

Белгилер:
Мамлекеттик каттоо кызматы, унаа, Алмаз Мамбетов
Тема боюнча
Бажыдагы автоунааны каттаган жайлар 11 күн катар түнгө чейин иштейт
Музыка ышкыбозу Чынтемир Акбарали уулу

Акбарали уулу: рок-музыканы кыргыз тилинде жайылтуу керек

(жаңыланган 14:20 15.04.2021)
Музыка ышкыбозу Чынтемир Акбарали уулу рок-н-роллду кыргыз тилинде жайылтып, коомдогу актуалдуу маселелерди көтөрүп чыкса болорун айтты.

Рок-н-ролл Кыргызстанда өтө кеңири өнүкпөгөндүктөн, жанрды коомго жайылтуу оор болуп жатат. Бул тууралуу Чынтемир Курсанали уулу Sputnik Кыргызстан радиосунун эфириндеги маек учурунда билдирди.

Акбарали уулу: рок-музыканы кыргыз тилинде жайылтуу керек

Анын айтымында, өлкөдө аталган музыкалык жанрдын өнүгүшүнө Виктор Цой баштаган "Кино" советтик рок-группанын салымы чоң.

"Мен кичинекей кезимен рок угуп жүргөндүктөн бул жанрда музыка жазып көрүүнү чечтим. Бүбүсара Бейшеналиева атындагы маданият жана искусство университетинде окуп жүргөндө ырчы Алишер Тоотаев жазган салттуу ырды алып, гитаранын ыргагына салып ойноп көргөм. Башында баарына жагып, режиссёр таап, клип да тартканбыз. Бирок радио, телевидениелер биздин чыгарманы кабыл албай, эфирге чыгарбай коюшкан. Биз атайын рок-барларга барып, чакан аудиторияга чыгармабызды тартуулап баштаганбыз. Көп башка улуттар рок-н-роллду эне тилинде ырдап, популярдуу болуп келишет. Ошондуктан биз дагы эне тилде ырдап чыгууну туура көрдүк. Азыр деле кыргыз тилиндеги рок музыкасын жайылтуунун аракетиндебиз. Өз тилибиз аркылуу коомдогу көйгөйлүү маселелерди алып чыксак болот. Бул жанрды коомго жайылтуу оор болууда", — деди Акбарали уулу.

Ошондой эле ырчы Кыргызстанда рок-музыка өткөн кылымдын 70-80-жылдарында эле жарала баштаганын кошумчалады.

Белгилер:
Чынтемир Акбарали уулу, музыка
Тема боюнча
Димаш Кудайбергендин казакча рэп жаңырган англис тилиндеги ыры жарык көрдү
Экономист Нургүл Акимова. Архив

Экономист: азык-түлүк тартыштыгынан чыгуу өлкө саясатынан көз каранды

(жаңыланган 14:19 15.04.2021)
Экономист Нургүл Акимова азык-түлүк тартыштыгы жалпы дүйнөдө эмес, Кыргызстанда гана болуп жаткандыгын айтты.

Учурда өлкөдө экономикалык эмес, саясий кризис өкүм сүрүүдө. Мындай пикирин Нургүл Акимова Sputnik Кыргызстан радиосуна маек куруп жатып билдирди.

Экономист: азык-түлүк тартыштыгынан чыгуу өлкө саясатынан көз каранды

Анын айтымында, коронавирустан улам дүйнөдө оор кырдаал жаралганы менен азык-түлүк тартыштыгы жок.

"Кыргызстан негизинен импорттон көз каранды өлкө. Ошондуктан азык-түлүк тартыштыгы болуп жатат. Бизден айырмаланып, башка мамлекеттерде мындай көрүнүш жок. Мисалы, ун Казакстандан келет, ал жакта фондулук биржа өнүккөн. Андагы маалыматтарга ылайык, коңшу өлкөдө ундун тартыштыгы дээрлик жок. Пандемиянын кесепетин алар деле тартты, бирок азык-түлүк тартыштыгы келип чыккан жок. Тескерисинче, өндүрүлгөн продукциялар логистикалык көйгөйлөрдөн улам сатылбай, кампаларда ашыгы менен туруп калды. Ошондуктан учурдагы өлкөдөгү абал экономикалык эмес, саясий кризис. Мындай учурда өлкө саясатын жүргүзгөн адамдар сүйлөшүүлөрдү жүргүзүп, келишимдерди түзүү менен абалды жөнгө сала алат. Эгерде башка өлкөлөрдүн биздин саясатчыларга ишеними болсо, товарларын бизге ыңгайлуу баада өткөрөт. Болбосо башка мамлекеттер менен иштешип, Кыргызстанга анчейин ишеним көрсөтпөй кое алышат. Андыктан азыркы азык-түлүк тартыштыгын жоюп, бааларды турукташтыруу чоң-чоң саясий чечимдерден көз каранды", — деди Акимова.

Экономист мындай учурдан чыгууда биринчи кезекте саясий күчтөрдүн ынтымагы жана коомдогу туруктуулук зор мааниге ээ экендигин кошумчалады.

Белгилер:
кризис, саясат, экономика, Нургүл Акимова
Тема боюнча
Кыргызстандыктардын жашоо минимуму 760 сомго жогорулады
Бишкек — Нарын — Торугарт унаа жолунун 90-чакырымында Lexus LX470 унаасынын айдоочусу Автопатруль-Радар аппараттык-программалык комплексин тебелеп, качып кеткен

Жолтандабастын айдоочусу 2,3 млн. сомдук радарды тебелеп качып кетти. Сүрөт

(жаңыланган 22:03 15.04.2021)
Окуя бүгүн түштө Кемин районунун Бообек айылында болгон. Айдоочу изи сууй электе кармалып, унаасы айып короого киргизилди.

БИШКЕК, 15-апр. — Sputnik. Бишкек — Нарын — Торугарт унаа жолунун 90-чакырымында Lexus LX470 унаасынын айдоочусу "Автопатруль-Радар" аппараттык-программалык комплексин тебелеп, качып кеткен. Бул тууралуу ЖКККББнын маалымат кызматы кабарлады.

Окуя бүгүн, 15-апрель күнү, саат 15:30дар чамасында Кемин районунун Бообек айылында болгон.

"Айдоочу изи сууй электе ЖКККББнын кызматкерлери тарабынан кармалды. Унаа айып короого киргизилип, тергөө бөлүмүнө өткөрүп берилди. Учурда тийиштүү экспертизалар дайындалып, Кылмыш жана жоруктардын бирдиктүү реестрине катталды", — деп айтылат маалыматта.

Көчмө "Автопатруль-Радар" аппараттык-программалык комплексинин наркы 2 миллион 324 миң 477 сомду түзөрү белгиленди. 

Белгилер:
радар, унаа, айдоочу, ЖКККББ
Тема боюнча
Ош — Баткен жолунда жеңил автоунаа оодарылып кетти. Видео