Саламаттык сактоо министринин орун басары Мадамин Каратаев

Каратаев: калкты профилактикага басым жасоого үйрөтүшүбүз керек

44
Саламаттык сактоо министринин орун басары Мадамин Каратаев эл аралык уюмдардан бөлүнгөн каражат негизги акча катары эмес, жардам катары иштетилиши керектигин айтты.

Саламаттык сактоо тармагынан акча үнөмдөөнүн эффективдүү ыкмасы бөлүнгөн каражатты кыркып салуу эмес, элди профилактикалык дарыланууга өткөрүү. Мындай пикирин Мадамин Каратаев Sputnik Кыргызстан радиосунун таңкы эфиринде маек куруп жатып билдирди.

Анын айтымында, 2020-жылы "Дени сак адам —  өнүккөн өлкө"  программасынын алкагында Саламаттык сактоо министрлигине 2,5 миллион, ММК (милдеттүү түрдө медициналык камсыздандыруу) фондуна 2,5 миллион доллар каражат четтен жардам катары келет жана министрлик ага негизинен ооруканалардын техникалык абалын жакшыртууну пландап жатат.

"Өлкөнүн экономикасына байланыштуу Саламаттык сактоо министрлигинин да каржылык жактан абалы оор. Ошентсе да биз бул тармакка кеткен акчаны үнөмдөйбүз десек, жүргүзгөн саясатты өзгөртүү зарыл. Элди ооруп калган соң гана дарыгерге кайрылбай, илдетке чалдыгып калбайын деп бейтапканага келе тургандай кылышыбыз керек. Мисалы, Германияда ар бир жаран тиешелүү врачтарга белгиленген убакытта оорубаса да барып текшерилип турганга милдеттүү. Эгер бир ирет өткөрүп жиберсе, эскертүү алат, экинчисинде да барбай койсо ири суммадагы акчаны өз чөнтөгүнөн төлөп, дарыланууга туура келет. Мына ушундай профилактикага басым жасоону элге жеткирсек, саламаттык сактоо тармагына кеткен акчаны сезилерлик үнөмдөйт элек", — деди Каратаев.

Ал ошондой эле мамлекеттик программалардын сырткары ар бир адам өзү эң жөнөкөй болгон туура тамактануу жана спортко көңүл буруп, өз ден соолугуна кам көрүшү зарылдыгын кошумчалады.

44
Белгилер:
эл, каражат, саламаттык сактоо
Тема боюнча
Каратаев: 2019-жылы төрөттөн каза болгон энелердин саны 10,5%га азайды