Директор Национальной ассоциации пастбищепользователей Кыргызстана Абдымалик Эгембердиев на радио Sputnik Кыргызстан

Эгембердиев: жасалма мөңгү тоңдуралы десем айрымдар күлгөн

182
(жаңыланган 12:18 10.03.2020)
"Кыргыз жайыты" улуттук ассоциациясынын жетекчиси Абдымалик Эгембердиев жасалма мөңгү суу тартыштыгын чечүүгө жардам бере турганын айтты.
Эгембердиев: жасалма мөңгү тоңдуралы десем айрымдар күлгөн

Жасалма мөңгү тоңдуруу идеясын жайыт комитеттерине сунуштасам, кээ бири күлдү, айрымдары тамаша иретинде кабыл алышты. Кийин Нарында сөз арасында ушул тууралуу сүйлөшүп калып, идеяны ал жердеги жайыт комитети, аксакалдар колдоого алып, мөңгү тоңдурдук. Бул тууралуу Абдымалик Эгембердиев Sputnik Кыргызстан радиосунун "Стимул" програмасында маек куруп жатып билдирди.

Айтымында, ал интернеттен непалдык инженердин мөңгү жасаганын көрүп, шыктанып калган.

"Өлкөдө жакшы жайлоолор бар. Алардын айрымдарында суу жок. Малчылар аргасыз жайлап, малын он чакырым айдап барып сугарышат. Мындан улам мал жакшы эттене албайт. Ошондуктан жасалма мөңгү тоңдуруу керектигин ойлонуп, жайыт комитеттерине сунуштадым. Алардын айрымдары күлүп, кээ бири тамаша катары кабыл алышты. Өткөн жылы Нарын районунун Жерге-Тал айылында болгонумда ушул идеяны айтсам колдоо тапты. Жайыт комитети, аксакалдар кеңеши менен керектүү жерди таптык. Ал жерде тоонун башында булак бар экен. Ага 20 метрлик труба орнотуп, суу тоңдурдук. Жазында эрий баштаганда аны малга суу, сугат суу катары колдонсо болот. Санай берсек жасалма мөңгү тоңдуруунун пайдалуу жактары абдан көп. Азыр анын сүрөт, видеолорун өлкөдөгү жайыт комитеттерине жиберип жатабыз. Алар муну ишке ашыруу керектигин билдирип, демилгени колдоого алышууда", — деди Эгембердиев.

Ошондой эле ал жасалма мөңгү тоңдуруу менен айлана-чөйрөгө, экологияга кам көрүүгө боло турганын кошумчалады.

182
Белгилер:
экология, жайыт, Мөңгү, жасалма
Тема боюнча
Кабылбеков: мөңгүлөрдү сактабасак Борбор Азия чөлгө айланышы мүмкүн
Эколог: Борбор Азия мамлекеттери чөлгө айланып калышы мүмкүн
Заара жана эндоскопия клиникасынын жетекчиси Нурбек Моңолов

Моңолов: дарыгерлердин атайын "десанттык" тобун даярдоо зарыл

43
Заара жана эндоскопия клиникасынын жетекчиси Нурбек Моңолов божомолдонуп жаткан коронавирустун экинчи толкунуна карата аймактарда кадр тартыштыгын жөнгө салуу боюнча сунушун берди.
Моңолов: дарыгерлердин атайын "десанттык" тобун даярдоо зарыл

Өлкөнүн бир аймагында эпидемиологиялык абал кескин курчуп кетсе, ал жакка жиберүү үчүн дарыгерлердин атайын тобун даярдап коюу керек. Мындай пикирин Нурбек Моңолов Sputnik Кыргызстан радиосуна маек берип жатып билдирди.

Анын айтымында, өлкөдө 13 миңден ашуун дарыгер бар.

Вице-мэр: Бишкек болжонуп жаткан коронавирустун экинчи толкунуна даяр

"Учурда өлкөдөгү дарыгерлердин кадрдык түзүмү белгилүү. Аларды туура уюштуруу керек. Мисалы, эпидемиологиялык абал кескин курчуп кеткен убакта Россия бизге "дарыгерлердин десанттык тобу" деп жиберди. Ошондой атайын топторду түзүп, аларга тийиштүү шарттарды түзүп берүү зарыл. Саламаттык сактоо тармагынын жетекчилеринин буга тийиштүү планы болушу керек. Эгерде өлкөнүн кайсы бир аймагында абал кескин начарлап кетсе, дарыгерлер ошол регионго чыгып кетет. Болгону дарыгерлердин маянасын төлөп берип, тийиштүү жабдыктар менен камсыздап коюу зарыл", — деди Моңолов.

Ошондой эле ал Тез жардамдын кызматкерлери жетишсиздигин эске алып ыкчам байланыш телефондорун жетиштүү жана сапаттуу деңгээлде даярдоо керектигин кошумчалады.

43
Белгилер:
тез жардам, коронавирус, дарыгер
Тема боюнча
Адис: коронавируска каршы эмдөө жүрмөйүн экинчи эмес, онунчу толкун да болот
Эмгек жана социалдык өнүктүрүү министрлигинин өкүлү Кульира Кубатова. Архивдик сүрөт

Кубатова: угуу жана сүйлөөсү начар адамдарга сурдокотормо кызматы көрсөтүлөт

64
(жаңыланган 11:31 28.09.2020)
Эмгек жана социалдык өнүктүрүү министрлигинин өкүлү Кульира Кубатова министрлик тарабынан иштелип чыккан угуу жана сүйлөө мүмкүнчүлүгү чектелген адамдарга сурдокотормо кызматын көрсөтүү долбоору 2021-жылы ишке кирип каларын айтты.
Кубатова: угуу жана сүйлөөсү начар адамдарга сурдокотормо кызматы көрсөтүлөт

Токтом долбоорунун негизги максаты – ден соолугунан мүмкүнчүлүгү чектелген адамдардын укуктарын жана кызыкчылыктарын коргоо үчүн зарыл болгон учурларда мамлекет кепилдеген сурдокотормо кызматтарына жеткиликтүүлүктү камсыз кылуу. Бул тууралуу Кульира Кубатова Sputnik Кыргызстан радиосунун эфиринде маек куруп жатып билдирди.

КРде майып балдар үчүн мобилдик тиркеме иштелип чыгып, ата-энелерге сунушталды

Анын айтымында, 2020-жылдын 1-январына карата Кыргызстанда жалпы 193,7 миң ден соолугунан мүмкүнчүлүгү чектелген адам жашаса, анын 5500дөн ашууну угуп жана сүйлөө жагынан майып адамдар.

"2019-жылы кыргыз өкмөтү БУУнун Майыптардын укугу жөнүндө конвенциясын ратификациялаган. Анын негизинде мамлекет конвенциянын жоболорун аткарууга милдеттүү. Ага ылайык, Эмгек жана социалдык өнүктүрүү министрлиги "Угуу жана сүйлөө мүмкүнчүлүгү чектелген адамдарга сурдокотормо кызматтарын көрсөтүү тартибин" иштеп чыгып, өкмөттүн токтомунун долбоорун коомдук талкууга чыгарды. Кыргызстандын жарандары, ошондой эле өлкөдө туруктуу жашаган жана сурдокотормо боюнча керектөөчүлөрдүн реестрине киргизилген адамдар кепилденген сурдокотормо кызматын алууга укуктуу. Мүмкүнчүлүгү чектелген адамдар календарлык жылда 15 саат мамлекет тарабынан сурдокотормо кызматын пайдалана алат. Бирок биз муну 40 саатка чейин көбөйтүүнү көздөп жатабыз. Бул кызмат ден соолугунан мүмкүнчүлүгү чектелүү адамдардын укуктарын коргоо үчүн зарыл болгон учурларда, мамлекеттик органдардын же мекемелердин, сот органдарынын талабы боюнча көрсөтүлүшү мүмкүн. Ошону менен бирге билим берүү, саламаттык сактоо жана документ толтуруу сыяктуу тармактарда котормочу жардам берет. Бизде котормочулар абдан аз. Ошондуктан үч жылдык планга сурдокотормочуларды окутуу кызматын киргизүү мерчемделүүдө", — деди Кубатова.

Ал өлкөнү санариптештирүү жылына ылайык аталган кызматты көрсөткөн мобилдик тиркемелерди иштеп чыгуу да каралганын кошумчалады.

64
Белгилер:
кызмат, өкмөт, котормо
Тема боюнча
Кубатова: майып балдарды карагандарга 4 900 сомдон айлык төлөнүүдө
Кыргызстандын президенти Сооронбай Жээнбеков. Архив

Жээнбеков Венгрияга расмий сапар менен барды. Кимдер коштоп жүрөт

0
(жаңыланган 23:52 28.09.2020)
Сапардын алкагында Кыргыз-венгер өнүктүрүү фондусун түзүү жөнүндө меморандумга жана эки тараптуу кызматташуу жөнүндө башка документтерге кол коюлат.

БИШКЕК, 28-сен. — Sputnik. Венгрияга расмий визит менен барган президент Сооронбай Жээнбековду Венгриянын вице-премьер-министри Михай Варга тосуп алды. Бул тууралуу мамлекет башчынын маалымат кызматынан кабарлашты.

Расмий визиттин алкагында Жээнбеков Венгриянын премьер-министри Виктор Орбан менен эки тараптуу сүйлөшүүлөрдү жүргүзөт. Алар Кыргызстан менен Венгриянын ортосундагы стратегиялык өнөктөштүк жөнүндө биргелешкен декларацияга кол коюшат.

Жээнбеков Венгрияга барат. Эки өлкөнүн соода-сатык алакасы кандай

“Жээнбеков жана Орбан Будапешт шаарындагы Түрк кеңешинин европалык өкүлчүлүгүнө барышат. Сапардын алкагында Кыргыз-венгер өнүктүрүү фондусун түзүү жөнүндө меморандумга жана эки тараптуу кызматташуу жөнүндө башка документтерге кол коюлат”, - деп айтылган маалыматта.

Кыргызстан делегациясынын катышуусунда Будапешт шаарындагы гүлбакка жазуучу Чыңгыз Айтматовдун ысымын ыйгаруу аземи болот.

Расмий визиттин алкагында Жээнбеков президент Янош Адер жана Улуттук жыйындын төрагасы Ласло Кёвер менен дагы жолугат.

Будапешт шаарындагы скверге Айтматовдун ысымы ыйгарылат

Кыргызстандын делегациясынын курамында тышкы иштер министри Чыңгыз Айдарбеков, Президенттин аппаратынын тышкы саясат бөлүмүнүн башчысы Данияр Сыдыков, Венгриядагы атайын жана толук ыйгарым укуктуу элчи Бакыт Жусупов, вице-премьер-министр Эркин Асрандиев, билим берүү жана илим министри Каныбек Исаков, айыл чарба, тамак-аш өнөр жайы жана мелиорация министри Эркинбек Чодуев, транспорт жана жолдор министри Жанат Бейшенов, каржы министри Бактыгүл Жээнбаева жана экономика министри Санжар Муканбетов бар.

0
Белгилер:
расмий сапар, Сооронбай Жээнбеков, Венгрия, Кыргызстан
Тема боюнча
Жээнбеков быйыл Венгрияга барат. ТИМ Будапештте жолугушууларды өткөрүп келди