Бакашева: карантин учурунда ата-энелер балдарына китеп окуп берсин

Мобилдик телефонго көндүрүп, алардын каалоосу менен боло бербестен, ата-энелер кырдаалга жараша балдарына көбүрөөк көңүл буруп, китеп окуп беришсе жакшы болмок. Мындай пикирин Жылдыз Бакашева Sputnik Кыргызстан радиосуна маек куруп жатып билдирди.

Анын айтымында, учурда интернет аркылуу китеп окуу мүмкүнчүлүктөрү абдан көп.

"Улуттук китепкана онлайн-кызмат көрсөтүп жатканбыз, бирок кырдаалга жараша аны токтоттук. Учурда каалоочулар www.lib.kg ачык китепкана сайтынан китептерди колдоно алышат. Ал жакта мектеп жашындагылар үчүн илимий жана көркөм чыгармалар орус, кыргыз, өзбек, айрым материалдар англис тилинде дагы жайгашкан. Учурдан пайдаланып ата-энелерге кайрылып кетейин. Көпчүлүгүбүз эле балдарыбызга көңүл бура албай, жумуш менен алек болуп, убакыт таба албай жүрчү элек. Азыр кырдаалга байланыштуу убакытты туура пайдаланып, балдарына китеп окуп берип, ал тургай өздөрү окуганга жакшы мүмкүнчүлүк түзүлүп жатат. Балдарды мобилдик телефонго көндүрүп, алардын каалоосу менен боло бербестен, убакытты туура колдонуп калышса деген тилегим бар. Китеп дүйнө таанымды кеңейтип, сөз байлыкты жакшыртат. Деги эле китептин санап бүткүс пайдасы көп. Албетте, бул же тигил китепти окугула деп сунуштай албайм. Анткени ар ким өзүнүн табитине жараша тандап алат", — деди Бакашева.

Ал ошондой эле окурмандар китепкананын электрондук дарегине окуган китептери тууралуу өз пикирлерин жиберсе, кызыктуу жана баалуу белек бере тургандарын кошумчалады.