Билим берүү жана илим министрлигинин алдындагы Кыргыз билим берүү академиясынын президенти Алмазбек Токтомаметов

Токтомаметов: теледеги сабактарды мугалим багыт катары гана алышы керек

1450
(жаңыланган 12:52 15.04.2020)
Билим берүү жана илим министрлигинин алдындагы Кыргыз билим берүү академиясынын президенти Алмазбек Токтомаметов дистанттык окутууда мугалимдерди креативдүү болууга чакырды.
Токтомамбетов: теледеги сабактарды мугалим багыт катары гана алышы керек

Телевидение аркылуу көрсөтүлүп жаткан сабактар менен өзгөчө аймактардагы мектептердин сабактары дал келбей калышы мүмкүн. Мунун бир нече себеби бар. Андыктан мугалимдер теледеги көрсөтүлүп жаткан окутууларды багыт катары гана алып, өз иш планы менен сабагын уланта берүүсү керек. Бул тууралуу Алмазбек Токтомаметов Sputnik Кыргызстан радиосуна маек куруп жатып билдирди.

Анын айтымында, телевидениеде көрсөтүлүп жаткан башталгыч класстардын сабактарын Бишкек шаардык билим берүү башкармалыгы, Ош шаарынын педагогдору жана жеке мектептин мугалимдери өздөрүнүн тематикалык пландарына жараша тартып, чыгарып жатышат.

"Дистанттык окутууда айрым ата-энелер теледеги сабактар менен балдардын өзүнүн мектептеринде өтүлүп жаткан сабактар дал келбей калып жатканын айтышууда. Мунун бир нече себеби бар. Негизинен сабак өтүү тематикасы республика боюнча бирдей түзүлбөйт. Мугалимдер өздөрү иштеп чыккан пландары менен окутат. Буга дагы бир себеп —  колдонулган китептердин ар түрдүү болуп калуусу. Ал эми учурда телевидение аркылуу өтүлүп жаткан  сабактарды мугалимдер жөн гана багыт катары кабыл алып, өзүнүн иш планы менен балдарды окутуусун уланта берүүсү зарыл. Азыр дистанттык окутуу педагогдор үчүн кыйынчылык жаратуу менен мүмкүнчүлүктөргө да эшик ачууда. Андыктан мугалимдерди учурдан пайдаланып креативдүүлүгүн көрсөтүп, түрдүү видеолорду тартып же башка аракеттер менен сабактарын кызыктуу өтүүгө чакырып кетем", — деди Токтомаметов.

Ал мугалимдерди теледеги сабактардан керектүүсүн алып, өздөрүнүн иш планынын негизинде журнал толтуруусу керектигин кошумчалады.

1450
Белгилер:
окуучу, программа, педагог, окутуу
Тема боюнча
Дистанттык билим берүү: окуучулар бир жумада канча күн окушу керек
Министр Исаков дистанттык окууда балдар эмнеден аксап жатканын айтты
Педагог дистанттык окутууда ата-энелерге бир нече кеңеш берди
Транспорт жана жолдор министрлигинин маалымат кызматынын жетекчиси Кылычбек Досумбетов

Досумбетов: Бишкек Кара-Балта жолун оңдоо 2021-жылы аяктайт

46
Транспорт жана жолдор министрлигинин маалымат кызматынын жетекчиси Кылычбек Досумбетов Бишкек — Кара-Балта жана Түндүк — Түштүк альтернативалуу трассасында курулуш иштери кызуу жүрүп жатканын айтты.
Досумбетов: Бишкек — Кара-Балта жолун оңдоо 2021-жылы аяктайт

Бишкек — Кара-Балта унаа жолу план боюнча быйыл ишке берилмек. Бирок учурдагы пандемияга байланыштуу, ошондой эле жол жээгиндеги түркүктөрдү которууда жакын жайгашкан кожолуктардын мүлкүнө залалы тийгендиктен ишке берүү мөөнөтү 2021-жылга жылдырылды . Бул тууралуу Кылычбек Досумбетов Sputnik Кыргызстан радиосуна маек куруп жатып билдирди.

Анын айтымында, мындан сырткары, Ош — Баткен — Исфана унаа жолунун 8-75-чакырымында курулуш иштери жүрүп жатат. Ал эми Бишкек — Ош трассасынын төртүнчү фазасына кирген Жалал-Абад — Маданият жолунун 20 чакырымга чукул жери асфальт жана бетон куюуга даяр турат.

"Өлкөдөгү ири трассалардын катарына кирген Бишкек — Кара-Балта жана Түндүк — Түштүк альтернативалуу унаа жолдорунда курулуш иштери үзгүлтүккө учураган жок. Бүгүнкү күндө ал жерлерде иш жүрүп жатат. Бирок пандемияга байланыштуу курулуш иштеринин графиги өзгөрдү. Андыктан ишти аяктоо мөөнөтү да жылып кетти. Мунун башка да себептери бар. Курулуш учурунда колдонулган оор техникалардан улам жакын жайгашкан турак жайлардын дубалынан жарака кетип, ага компенсация төлөө маселеси жаралды. Ошондой эле ал жерде көчө бойлой жайгашкан түркүктөрдү жылдыруу иштери убакытты алып жатат. Ушуга байланыштуу Бишкек — Кара-Балта унаа жолу 2021-жылы колдонууга берилет. Мындан сырткары, Кытайдан жол куруучу адистер келмек. Чек ара жабылып, алар да кечигип жатышат. Бирок бүгүнкү күндө 139 кытайлык куруучу Кыргызстанга келди. Учурда алар обсервацияда. Коңшу өлкөдөн келген адистер чыгары менен курулуш иштери тездетилет. Алар Түндүк — Түштүк альтернативалуу жолундагы туннель жана эстакаданын курулушун башташат", — деди Досумбетов.

Ал Кытайдан Түндүк — Түштүк альтернативалуу жолун курууга 450дөн ашык, Бишкек — Кара-Балта жолунун курулушуна 42 жана Бишкек — Нарын — Торугарт жолун салууга төрт адис келери пландалганын кошумчалады.

46
Белгилер:
пандемия, курулуш, жол, Кылычбек Досумбетов
Тема боюнча
Кылычбек Досумбетов: Бишкек — Нарын — Торугарт жолу толугу менен декабрда бүтөт
Саламаттык сактоо министрлигинин Республикалык эмдөө борборунун эпидемиолог-дарыгери Азим Кыргызбаев

Кыргызбаев: ата-энеси эмдетпей койгон бала Америкага окууга бара албай калган

34
Саламаттык сактоо министрлигинин Республикалык эмдөө борборунун эпидемиолог-дарыгери Азим Кыргызбаев убагында эмделбей калган балдар чоңойгондо чет мамлекетке бара албай калышы мүмкүндүгүн айтты.
Кыргызбаев: ата-энеси эмдетпей койгон бала Америкага окууга бара албай калган

Учурунда ата-энеси баш тартып койгон балдар кийин чет мамлекетке окууга, эс алууга, иштөөгө бара албай калышы толук ыктымал. Мындай окуя бизде болгон. Бул тууралуу Азим Кыргызбаев Sputnik Кыргызстан радиосуна билдирди.

Анын айтымында, убагында алынбаган эмдөөнү жылдар өткөн соң калыбына келтирүү мүмкүн эмес.

"Эмдөөдөн ата-энелер тигил же бул жүйөнү келтирип баш тартып коё беришет. Биз аларды мажбурлай албайбыз. Бирок ошол эле учурда балдарынын келечегин ойлошпойт. Анткени тиешелүү вакциналарды албаган балдар баралына жеткенде чет өлкөгө окууга, иштөөгө, ал тургай саякатка да чыга албай калышат. Мындай окуя бизде болгон. Бала мектепте жакшы окуп Америкага окууга гранттык орунга ээ болот. Жөнөй турган учуру келгенде тиешелүү эмдөөлөрдү албаганы билинет. Көрсө, ата-энеси ал кичинекей кезинде баш тартып койгон экен. Бала апасына капа болот. Апасы бизге келип, дарыгерлерди урушуп "кийин балаң чет мамлекетке бара албай калат деп айтпайт белеңер" деп чуу көтөргөн. Андыктан ата-энелер баш тартар алдында өз чүрпөмдүн келечегине балта чаап албаймынбы деп ойлонуп коюшса жакшы болот эле", — деди Кыргызбаев.

Дарыгер өзгөчө билим алууга же иш менен чыгарда, айрым өлкөлөр саякатчылардан да белгилүү бир оорулардан эмделгендиги тууралуу маалым кат сурарын кошумчалады.

34
Белгилер:
чет мамлекет, Азим Кыргызбаев, ата-эне, эмдөө
Тема боюнча
Абдраманов: унаабыз жок, бейтаптарды такси менен ташыйбыз
Баткен облусунда Исфана — Сулюкта жолунда тоолор. Архив

Сүлүктүдө жер көчүп, автоунаа жолун тосуп калды. Видео

46
(жаңыланган 23:33 06.07.2020)
Жолду тазалоо үчүн бир жүктөгүч, эки самосвал тартылып, бир тараптуу ачылган. Тазалоо иши эртең дагы улантылат.

БИШКЕК, 6-июл. — Sputnik. Баткен облусунун Сүлүктү шаарында жер көчүп, автоунаа каттаган чоң жолду тосуп калды. Бул тууралуу Өзгөчө кырдаалдар министрлигинин маалымат кызматы кабарлады.

Билдирмеге караганда, бүгүн саат 17:40 чамасында Кызыл-Бел тилкесинде болжол менен 1000 метр куб жер сүрүлүп, жолду бөгөп салган. Жабыркаган адамдар жок.

Бир үй-бүлөдөн эле... Сүлүктү шахтасындагы төрт кишинин өлүмүнүн чоо-жайы

Жолду тазалоо үчүн Кытайдын жол куруучу компаниясынан бир жүктөгүч, эки самосвал тартылып, бир тараптуу ачылган. Кеч киргендигине байланыштуу саат 20:20да тазалоо иш-чаралары убактылуу токтотулган. Иштин эртең дагы улантылары айтылат.

46
Белгилер:
тазалоо, жол тосуу, автоунаа, Жер көчкү
Тема боюнча
Адам өмүрүн эмес, сөөгүн сактап калган учурлар болот. Куткаруучунун маеги
Жыл башынан бери 35 адам сууга чөктү. Өкмөт коңгуроо кагууда