Кадырова: ЖРТдан алынган балл боюнча мектеп рейтингин баалаган туура эмес

Окуучулардын ЖРТдан алган упайы боюнча мектептин рейтингин баалаган туура эмес. Анткени көпчүлүк учурларда абитуриенттер ЖРТга даярдануу үчүн өз алдынча кошумча сабактарды алышат. Бул тууралуу Мээрим Кадырова Sputnik Кыргызстан радиосуна маек куруп жатып билдирди.

Анын айтымында, ЖРТ өлкөдөгү билимдин сапатын төмөндөтөт деп айтууга болбойт.

"Айрымдар жалпы республикалык тестирлөө логиканы эле текшерет деп жатышат. Андай эмес. Чындыгында абитуриент мектеп программасын өздөштүрүп, топтогон билимди жашоодо колдонорун же колдонбой турганын аныктай турган суроолорду түзөбүз. Ошондой эле ЖРТ болгону математика менен тилди текшерет деген кеп айтылып жүрөт. Бул да туура эмес пикир. Тесттирлөөнүн негизги максаты — жогорку окуу жайларга жакшы окуган, билимдүү абитуриенттерди тандоо. Кээ бир учурларда анын жыйынтыгы менен мектептин рейтингин текшеришет экен. Мектептердин билим деңгээли бүтүрүүчү экзамен же тесттер аркылуу текшерилет. Ал эми ЖРТ мектептин эмес, абитуриенттин жеке көрсөткүчү. Себеби кээ бир окуучулар өз алдынча даярданышат. Ошондой эле тест тапшырууда абитуриенттер мурда химия, биология, англис, немец тилин гана тандашчу. Эми физика, математика жана тарых боюнча кошумча предметтер кирди", — деди Кадырова.

Адис өлкөдө билим берүү системасы өзгөргөнгө чейин ЖРТ ушул тартипте өткөрүлө бере турганын кошумчалады.