Турусбеков: ЕАЭБдин алдыда чоң мүмкүнчүлүктөрү бар

ЕАЭБге кирген беш мамлекеттин экономикасы бирдей эмес. Абал коронавирус пандемиясы учурунда айкын билинип калды. Кырдаалды аталган уюм өз пайдасына колдонуп кетүү мүмкүнчүлүгү бар. Мындай пикирин Бактыбек Турусбеков Sputnik Кыргызстан радиосунун эфиринде маек куруп жатып билдирди.

Анын айтымында, Евразия экономикалык биримдигине кирген мамлекеттерде бирдей баа саясаты жүргүзүлүшү абзел.

"Союз убагында 15 республикада бирдей нарк саясаты катуу кармалчу. ЕАЭБге мүчө мамлекеттерде да ушундай эреже болуусу зарыл. Аталган уюмда экономика өз багыты менен, саясат өз жолу менен өнүккөнү туура. Учурдагы пандемия уюмга мүчө мамлекеттер ортосундагы алаканын кемчилик, артыкчылыктарын алаканга салгандай көрсөтүп койду. Эми Евразия экономикалык биримдиги жетишпеген жактарын эске алуу менен ишкерлерге колдоо көрсөтүп, кыска убакытта кризистен чыгып кетсе болот", — деди Турусбеков.

Эл өкүлү ЕАЭБдин келечеги кең деген пикирин кошумчалады.