Акын, котормочу жана радиожурналист, КРдин маданиятына эмгек сиңирген ишмер Тенти Орокчиев

Орокчиев: көзү өтүп кеткендердин маегин угуп "бул тирүү экен" дегендер болгон

179
Акын, котормочу жана радиожурналист, КРдин маданиятына эмгек сиңирген ишмер Тенти Орокчиев залкарлар менен болгон маектерден кийин болгон кызыктуу окуяларды айтып берди.
Орокчиев: көзү өтүп кеткендердин маегин угуп "бул тирүү экен" дегендер болгон

Залкарлар менен маектерим 300гө чукул. Алар 20 мүнөттөн бир жарым саатка чейин жетет. 2011-жылдан бери баарын кагазга түшүрүп, үч томдугун чыгарууга жетиштим. Бул тууралуу Тенти Орокчиев Sputnik Кыргызстан радиосуна маек куруп жатып билдирди.

Анын айтымында, алынган маектерге байланыштуу кызыктуу окуялар көп болгон.

"Учурунда көптөгөн залкар инсандар менен радиомаек уюштургам. Азыр КТРКнын "Алтын казынасында" 300гө чукулу сакталып турат. Алардын узактыгы 20 мүнөттөн бир жарым саатка чейин. 2011-жылдан бери кагазга түшүрүп, китеп кылып үч томдугун чыгардым. Түгөлбай Сыдыкбеков менен 25 саатка чукул маек уюштургам. Алардын биринде жазуучу байбичесин чакырып, радиодон чогуу угушуптур. Уктуруу аяктаган соң жубайы "кечке эле бир сөздү кайталай берет экенсиң" деп абышкасын сындаган экен. Муну кийин Түгөлбай Сыдыкбеков "аялым мактайт го деп күтүп жатсам, ушинтип сындап салды" деп айтып берген. Анан Кусейин Карасаев менен дагы 12 саат мектешкем. Анын үйүнө барып чай ичишип турат элек. Караколго көчүп кеткенден кийин дагы конокко чакырып турчу. Бир окуяны айтып берди эле. Эки жакын адамы көлгө эс алып кел деп чакырып, колунун бош эмес экенине карабастан алып кетишиптир. Анан азыркы Кырчын жайлоосунун тушуна келгенде жол тосулуу экен. Тигил экөө унаадан түшүп 20 мүнөттөй сүйлөшүшөт. Киргизүүгө макул кыла албай коюшуптур. Аңгыча бир аял чуркап келип "радиодон маек берген Карасаев деген сизби?" деп сурап, киргизиптир. Ошондо Кусейин Карасаев "чоң кызматта иштеген эки интеллигент киргизе албаган жерге сен алган радиомаек киргизди" деп ыраазы болгон. Өтүп кеткен адамдардын маектери кетип жатканда угуп алып "ой, бул каза болду дешти эле, тирүү турбайбы" деген сыяктуу окуялар көп эле болду", — деди Орокчиев.

Ошондой эле ал Токтоболот Абдумомунов үйүндө ооруп төшөктө жатканында 5-6 саат маек алганын кошумчалады.

179
Белгилер:
маданият, маек, Түгөлбай Сыдыкбеков
Тема боюнча
Азыр андай инсандар жок... Сахнадагы залкарлардын таберик сүрөтү
Кыргызстандагы KyrSEFF туруктуу энергияны каржылоо программасынын менеджери Нурзат Абдырасулова

Абдырасулова: күндүн, суунун же шамалдын кубатынан энергия алуу керек

27
Кыргызстандагы KyrSEFF туруктуу энергияны каржылоо программасынын менеджери Нурзат Абдырасулова атмосферага бөлүнүп чыккан уулуу заттарды азайтса болорун айтты.
Абдырасулова: күндүн, суунун же шамалдын кубатынан энергия алуу керек

Электр энергиясын үнөмдөө менен экологияга пайда келтире алабыз. Бул тууралуу Нурзат Абдырасулова Sputnik Кыргызстан радиосуна маек куруп жатып билдирди.

Анын айтымында, Париж келишиминде дагы ар бир өлкө өз мүмкүнчүлүгүнүн жетишинче экологиялык көйгөйлөр менен күрөшүүсү зарыл экендиги көрсөтүлгөн.

"Өлкөдө экологиялык маселелер менен улуттук деңгээлде иш алып баруу боюнча атайын документтер кабыл алынган. Анда айлана-чөйрөгө уулуу заттардын таасирин минималдаштыруу каралган. Ошол эле көмүр жагууну, автоунаалардан бөлүнүп чыккан уулуу газдарды атмосферага таркашын азайтуу зарыл. Мүмкүнчүлүккө жараша электр кубаты менен иштеген автоунааларга өтүп, күндүн, суунун же шамалдан алынган энергиянын түрлөрүн көбөйтүү керек. Бул технологиялар дүйнөдө жакшы өнүгүп, баасы арзан болуп калды. Өкмөт тарабынан жакшылап көңүл бурулуп, туура саясат жүргүзүлүшү шарт. Эң негизгиси, энергияны үнөмдөп колдонуу зарылчылыгы келип чыгууда. Эгер сарамжалдуу колдоно турган болсок, коңшу өлкөлөрдөн сатып албайбыз. Ошондой эле экологияга тийген терс таасирди азайтууга мүмкүнчүлүк түзүлөт", — деди Абдырасулова.

Ошондой эле ал учурда туруктуу энергияны каржылоо программасынын алкагында бир катар долбоорлор ишке ашырылганын кошумчалады.

27
Белгилер:
Кыргызстан, экология, электр энергиясы
Тема боюнча
Казакстандан 500 млн. кВт/саат энергия импорттоо макулдашылды. Баа өзгөрөбү
Билим берүү жана илим министринин орун басары Нурлан Өмүров

Өмүров: ЖОЖго онлайн тапшыруунун биринчи туру 20-июлда башталат

1256
Билим берүү жана илим министринин орун басары Нурлан Өмүров жогорку окуу жайга аралыктан тапшыруу үчүн онлайн-платформа иштелип чыкканын айтты.
Өмүров: ЖОЖго онлайн тапшыруунун биринчи туру 20-июлда башталат

Быйыл пандемиядан улам элдин ден соолугуна кам көрүү жана санариптештирүү жылында технологияларды толук пайдалануу максатында министрлик тарабынан жогорку окуу жайларга кабыл алууну аралыктан өткөрүү макулдашылды. 3-4 ай мурун даярдыктарды баштап, долбоор иштеп чыктык. Бул тууралуу Нурлан Өмүров Sputnik Кыргызстан радиосунун эфиринде маек куруп жатып билдирди.

Анын айтымында, жылына жалпы ЖОЖдор үчүн 5700 бюджеттик орун берилет.

"Жогорку окуу жайга аралыктан тапшыруу үчүн онлайн-платформа иштелип чыкты. Жылына абитуриенттер Жалпы республикалык тестирлөөнүн жыйынтыгын алгандан кийин ЖОЖго барып, каалаган кесибин тандап, кутучага талондорун таштачу. Алар ошондой эле тандаган факультетине кандай балл менен канча абитуриент тапшырып жатканын монитордон көрүп турушчу. Быйыл мунун баары онлайн түрдө өтөт. Абитуриенттер өлкөбүздүн каалаган чекитинен системага кирип, ЖОЖдор тууралуу толук маалымат ала алат. Окуу жайлардагы факультеттер, андагы бюджеттик, контракттык орундардын саны менен таанышат. Талонун онлайн-каттоодон өткөрүп, кадимкидей эле башка абитуриенттер кайсы адистикке канча талон, кандай балл менен тапшырып жатканын көрө алышат. Окууга онлайн тапшыруунун биринчи туру 20-25-июль аралыгында өтөт. Экинчи тур 27синен 31-июлга чейин, ал эми 3-7-август күндөрү үчүнчү тур менен жыйынтыкталат. Система өзү бүтүрүүчүнүн билим алган аймагына карап мурдагыдай эле автоматтык түрдө жеңилдиктерди берет", — деди Өмүров.

Ал өкмөттүн чечими менен кайсы кесипке канчадан орун берилери жана ар бир университетке канча бюджеттик орун бөлүнгөндүгү тууралуу токтом чыгарыларын кошумчалады.

1256
Белгилер:
онлайн, пандемия, абитуриент, ЖОЖ, Нурлан Өмүров
Тема боюнча
Аттестат качан берилип, ЖОЖдор кантип кабыл алат? Бүтүрүүчүнүн 8 суроосуна жооп
Жазуу түрүндөгү сынак. Архив

Контракт көйгөйү: министрлик студентти экзаменге киргизбөө мыйзамсыз экенин айтты

0
Буга чейин билим берүү жана илим министри Каныбек Исаков өлкөдөгү жогорку окуу жайлардын студенттерине контракт төлөө боюнча жеңилдиктер берилгенин айткан эле.

БИШКЕК, 3-июн. — Sputnik. Университеттин өзүндө окуп жаткан студенттерди кайсы бир себептер менен экзаменге кирбейсиңер дегени мыйзамсыз. Бул тууралуу билим берүү жана илим министринин орун басары Надира Жусупбекова парламентте билдирди.

Учурда Жогорку Кеңеште "Билим берүү жөнүндө Кыргыз Республикасынын мыйзамына өзгөртүүлөрдү киргизүү тууралуу" мыйзамдын долбоору биринчи окууда каралып жатат.

Депутат Элвира Сурабалдиева ага студенттер кайрылганын айтты. Алар шартына байланыштуу окуунун акчасын төлөй албай, андан улам экзамендерге кире албай жаткандыктарын айтышкан. Эл өкүлү министрликтин буга чейин айткан контракт боюнча ийкемдүү графигинин маңызы эмнеде экенине кызыкты.

"Студентти экзаменге кире албайсың деп коркутуу мыйзамсыз. Ар бир студент окуу графигине жараша экзамен, аттестацияларга кире алат. Ал эми акы төлөө маселеси боюнча университеттерге студенттин финансылык абалына карап, ийкемдүү мамиле кылуу тапшырмасы берилген", — деди Жусупбекова.

Ошондой эле орун басар айым студенттер төлөгөн акчадан мугалимдерге айлык караларын айтып, ата-энелерде контракттан таптакыр эле бошотуу деген түшүнүк болбошу керектигин кошумчалады.

Буга чейин билим берүү жана илим министри Каныбек Исаков өлкөдөгү жогорку окуу жайлардын студенттерине бул маселеде жеңилдиктер берилгенин айткан. Министр дагы контракт төлөөнү талап кылган фактылар көп катталып жаткандыгын сөз кылган.

0
Белгилер:
студент, билим берүү, контракт, Университет, Элвира Сурабалдиева
Тема боюнча
Россиянын ЖОЖдору пандемияга карабай кыргызстандык студенттерди кабыл алат