Кинематографисттер союзунун төрагасы Айбек Дайырбеков

Дайырбеков: кино аркылуу мамлекеттин идеологиясын жүргүзүүгө болот

52
Кинематографисттер союзунун төрагасы Айбек Дайырбеков Кыргызстандын тарыхында өкмөт тарабынан бир дагы толук метраждуу анимациялык фильм, өспүрүмдөргө арналган сериал тартыла электигин айтты.
Дайырбеков: кино аркылуу мамлекеттин идеологиясын жүргүзүүгө болот

Өспүрүмдөргө арналган тасмалардын тартылбаганын келечегибизге, балдарыбызга карата кайдыгер мамиле кылуу деп билем. Мындай оюн Айбек Дайырбеков Sputnik Кыргызстан радиосунун эфиринде маек куруп жатып билдирди.

Анын айтымында, кино жөнүндөгү мыйзам боюнча бул тармакка бюджеттен 0,1 пайыз каралган. Былтыр 170 миллион сом бөлүнүшү керек эле, бирок кыскарып отуруп 30 миллион сом бөлүнөрү белгилүү болгон. Тилекке каршы, кино тартууга тиешелүү каражат берилген жок.

"Былтыр пандемия башталганда телеканалдар карайлап калышты. Көрсөтөлү дегенге мультфильми жок болуп чыкты. Кыргызстандын тарыхында өкмөт тарабынан анимациялык тасма, анимациялык сериал, өспүрүмдөргө арналган бир дагы сериал тартыла элек. Муну менен өзүбүздүн, балдарыбыздын келечегине кайдыгер мамиле кылып жатабыз. Мисалы, былтыр кыска метраждуу анимациялык тасмага акча бөлүштү. Аны болгон жерден мактанып айтышат", — деди Дайырбеков.

Ошондой эле балдар темасына өкмөт жакшы көңүл буруп, тиешелүү долбоорлорду ишке ашырууга каражат бөлүнүшү керектигин кошумчалады.

52
Белгилер:
долбоор, тасма, кино, сериал, Айбек Дайырбеков
Тема боюнча
Мастанова: он мүнөттүк мультфильмди төрт күндө жасап бүтөбүз
Учкун ААКтын өндүрүштүк бөлүмүнүн башчысы Нурайым Токтомушева

Токтомушева: "Учкун" ААКтын негизделгенине 95 жыл болду

22
"Учкун" ААКтын өндүрүштүк бөлүмүнүн башчысы Нурайым Токтомушева мамлекеттик маанидеги бардык документ, кагаздарды басып чыгарууга аталган ишкананын мүмкүнчүлүгү бар экенин, болгону басмакананы модернизациялоо керектигин айтты.
Токтомушева: "Учкун" ААКтын негизделгенине 95 жыл болду

"Учкун" ачык акционердик коому 1926-жылы негизделген. Ушул эле жылы 7-ноябрда эң биринчи кыргыз гезити араб арибинде чыккан. Ал эми 1930-31-жылдары басма үйүнүн имараты курула баштаган. Бул тууралуу Нурайым Токтомушева Sputnik Кыргызстан радиосунун эфиринде маек куруп жатып билдирди.

Анын айтымында, басмакана мамлекеттик баалуу кагаздарды да басып чыгарат.

"Басмаканага жабдыктарды Алматы, Ташкенттен алып келишкен. Фрунзеде бул жаатта атайын адистерди даярдоо үчүн фабрика-заводдук окуу ачылган. 1967-жылы "Правда" гезитинин биринчи нускасы чыккан. 2019-жылы сатып алуулар мыйзамына мамлекеттик маанидеги документтер мамлекеттик ишканада басылсын деген өзгөртүү киргизилген. Бул боюнча президенттин алдындагы иш башкаруу типографиясы, "Гознак" ЖЧКсы, "Учкун" ААКсы арасында тендер жүргүзүлгөн. Анын жыйынтыгы менен "Учкун" ишканасы Мамлекеттик каттоо кызматынын туулгандыгы, никелешүү тууралуу жана башка күбөлүктөрдү басып чыгарат. Андан тышкары, аттестация, диплом, ошондой эле кадастрдын тендеринин негизинде мамлекеттик актылар, кызыл китептер басылууда. Азыр эми окуу китептери ар башка басмаканаларда жана чет өлкөдө басылып жатат. Чар жайыт кылбай мамлекеттик ишкананы борборлоштуруп каржыласа, сапаттуу китептерди чыгарууга мүмкүнчүлүгүбүз бар", — деди Токтомушева.

Адис президенттик шайлоо жана референдум өткөрүлгөндө жети миллион бюллетенди мыйзамга ылайык 10 күндө басып чыгарышканын кошумчалады.

22
Белгилер:
басмакана, Учкун, Нурайым Токтомушева
Тема боюнча
Министр: китептерде ката кетпеши үчүн "Окуу китеби" борбору ачылды
Кыргыз Республикасынын эмгек сиңирген экономисти, легендарлуу парламенттин депутаты Орозбек Акимбаев

Акимбаев: биз кабыл алган туу азыркыдай эмес болчу

192
(жаңыланган 15:35 03.03.2021)
Кыргыз Республикасынын эмгек сиңирген экономисти, легендарлуу парламенттин депутаты Орозбек Акимбаев депутаттар кабыл алган туу азыркыдай болбогонун айтты.
Акимбаев: биз кабыл алган туу азыркыдай эмес болчу

Кыргыз Республикасы Советтер Союзунан бөлүнүп, эгемендүү мамлекет болгондон кийин туу, герб, гимнин бекитүү үчүн конкурс жарыяланган. Чыгармачыл адамдар Жогорку Кеңештин залында бир жумага жакын туунун көргөзмөсүн өткөрүп, авторлор менен идеясын ортого салып отуруп, 3-марттагы жалпы талкууда азыркы тууну кабыл алганбыз. Бул тууралуу Орозбек Акимбаев Sputnik Кыргызстан радиосунун эфиринде маек куруп жатып билдирди.

Анын айтымында, тууга көлдүн, жайлоонун, пахтанын, буудайдын жана тоонун сүрөттөрү тартылган 30-40ка жакын варианттар болгон.

"Желектин авторлору Жусуп Матаев, Эдил Айдарбеков, Маматбек Сыдыков, Бекбосун Жайчыбеков жана Сабыр Иптаровдун эмгеги жактырылган эле. Кызыл түстөгү туунун ортосуна кырк нуру тегиз чачыраган алтын түстөгү күн алкагынын, анын ичине кыргыз боз үйүнүн түндүгүнүн сүрөтү түшүрүлгөн. "Көк болуш керек", "жок, кызыл болсун" деп түсү боюнча да тартышуулар болду. Кыргызда жамандык болгондо көк, кара киет деп кызыл өңгө токтолдук. Башында желекке Американыкындай канча облус болсо ошончо жылдыз түшүрөлү деп чыгышкан эле. Кызыл туу кайраттуулуктун белгиси, мекенибизди коргоо үчүн канын-жанын аябаган адамдардын канынын түсү деп азыркы туу тандалды. Белгилей кетчү нерсе, негизи тууда азыркыдай эмес, бири узун, бири кыска нур чачырап турган. Кабыл алуунун эртеси желекти жасап келип жайса эле ал күн карамага окшоп калыптыр. Ошондо мен Медеткан Шеримкуловго "бул биз кабыл алгандай болбой калыптыр" десем, ал "ай Оке, Аскар Акаевич менен тартышып эми жараштык, кое турчу муну, кийинчерээк түзөп алабыз" деди эле. Ошол боюнча калып кетти. Элдин көзү көнүп, каныгып калгандан кийин тарыхка кайрылып аны оңдоонун зарылчылыгы барбы, эми аны азыркы жаштар карап көрөр", — деди Акимбаев.

Легендарлуу депутат 350 депутаттын 200дөн ашыгы азыркы тууну кабыл алууну колдогонун кошумчалады.

192
Белгилер:
туу, эгемендүүлүк, Символ, желек
Тема боюнча
Дубанаев: гербди Асейин Абдраев деген сүрөтчү тарткан
Партктагы гүлдөр. Архив

Бейшембиге карата аба ырайы

0
(жаңыланган 21:08 03.03.2021)
4-мартка караган түнү республиканын көпчүлүк аймактарында жаан, тоо этектеринде жана тоолуу райондорунда кар жаашы күтүлөт. Жолдорго муз тоңуп, тайгак болот.

БИШКЕК, 3-мар. — Sputnik. Бейшемби күнү өрөөндөрдө жаан-чачын күтүлбөйт. Батыштан соккон шамалдын ылдамдыгы секундасына 4-9 метрден кээ бир аймактарда 14 метрге жетет. Бул тууралуу Кыргызгидромет билдирди.

Абанын температурасы Чүй, Талас жергесинде +9...+14 градус, Ош, Жалал-Абад жана Баткен облустарында +10...+15, Ысык-Көлдө +3...+8, ал эми Нарын аймагында -1...+4 градуска чейин жылуу болору айтылды.

Борбор калаада күн ачык болуп, күндүн табы +12...+14 градуска чейин көтөрүлсө, Ош шаарында мезгил-мезгили менен жаан жаап, +13...+15 градус жылуу болот.

0
Белгилер:
март, Кыргызстан, аба ырайы
Тема боюнча
Төө-Ашуудагы тайгактан жүк ташуучу унаалар өйдө чыга албай жатат. Видео