Улуттук банктын нак акча менен иш алып баруу башкармалыгынын башкы адиси Анара Сабыр кызы

Сабыр кызы: Кыргызстанда 70 миңдей коллекциялык монета сатылды

49
Улуттук банктын нак акча менен иш алып баруу башкармалыгынын башкы адиси Анара Сабыр кызы Кыргызстанда учурда тыйындын 82 түрү бар экенин айтты.

Кыргызстандын коллекциялык монеталары 1995-жылдан бери чыгарылып келет. Улуттук банк эстелик тыйындарды чыгаруу менен нумизматика рыногунун түптөлүшүнө жол салган. Бул тууралуу Анара Сабыр кызы Sputnik Кыргызстан радиосунун эфиринде маек куруп жатып билдирди.

Сабыр кызы: Кыргызстанда 70 миңдей коллекциялык монета сатылды

Анын айтымында, коллекциялык монеталар алтын, күмүш, никель жана жезден жасалат.

"Коллекциялык монеталар ар кандай тематикадагы серияларда чыгарылат. Алсак, "Манас" эпосунун 1000 жылдыгына, тарыхый окуяларга, Кыргыз мамлекеттүүлүгү, Кыргыз каганатынын доору, Эл аралык тоолор жылы, Улуу Жибек жолу, Чыңгыз Айтматовдун элесине, анын чыгармаларына жана башка окуяларга арналган монеталар чыккан. Коллекциялык монеталарда негизинен архитектуралык эстеликтер, Кыргызстандын жаратылыш дүйнөсү, маданият, спорт жаатындагы жетишкендиктер, улуттук үрп-адат, оюндар жана жок болуп бараткан флора, фауна чагылдырылып, аларды жайылтуу максатын көздөйт. Бул тыйындар жыл сайын чет өлкөлүк сынактарга катышып, нумизматтар арасында туруктуу кардарлары бар. Кадыр-барктуу эл аралык конкурстарда сыйлыктарга ээ болгон. Мисалы, Чыңгыз Айтматовдун чыгармаларына арналган жогорку чеберчиликтеги монеталар топтому Санкт-Петербург шаарында өткөрүлгөн эл аралык сынакта "Библио-Глобус" соода үйүнүн Ардак дипломуна татыса, "Улуу Жибек Жолу" монетасы Берлинде "Жылдын мыкты монетасы" сынагынын лауреаты болгон. "Саймалуу-Таш" тыйыны Москвада "Жылдын күмүш монетасы" номинациясы боюнча үчүнчү орунду алган", — деди Сабыр кызы.

Адис 2021-жылы "Тарыхый окуялар" сериясынан "КРдин эгемендүүлүгүнө 30 жыл" деп аталган алтын жана күмүш монеталарынын 1000 экземпляры, "Көз карандысыз мамлекеттердин шериктештигине 30 жыл" деген 1000 даана монета жана дарыгерлерге арналган "Өмүр сакчыларына таазим" жез, никель монетасын 3000 нуска менен чыгаруу пландалып жатканын кошумчалады.

49
Белгилер:
тыйын, банк, монета, коллекция одежды
Тема боюнча
Улуттук банк быйыл алтын монеталардын дагы бир коллекциясын чыгарат
Киберспорт федерациясынын башкы катчысы Баяман Саймасаев

Саймасаев: акчага кызыгып киберспортко келгендер адашат

41
Киберспорт федерациясынын башкы катчысы Баяман Саймасаев көп өспүрүмдөр киберспорт мелдештеринин байге фондуна көз артып келерин белгиледи.

Акча табуу киберспортто акыркы орунда каралышы керек. Адамдар алгач максатын, миссиясын, каалоосун аныктап, жоопкерчиликтүү мамиле кылышы зарыл. Мындай пикирин Баяман Саймасаев Sputnik Кыргызстан радиосунун эфиринде маек учурунда айтты.

Саймасаев: акчага кызыгып киберспортко келгендер адашат

Анын айтымында, көп функционалдуулук, ой жүгүртүү, интеллект жагынан алганда киберспорттун пайдасы көп.

"Каражат жагын көбү артыкчылык катары эсептейт. Киберспортто акчага кызыккандар адашат. Таланттуу бала акчага кызыкпай, өзүнүн чеберчилигин оюнда көрсөтөт. Мындай учурда акча өзү эле жеңиш артынан келет. Өспүрүмдөр арасында мелдештердин байге фондуна кызыгып келгендер көп. Акча үчүн ойносоң утуласың! Байге — ал мотивация. Бирок аны эң акыркы орунга коюу керек. Бул тармакка келгендер алгач максатын, миссиясын, каалоосун аныктап, жоопкерчиликтүү мамиле кылышы керек. Киберспорттун жакшы дагы, жаман жагы да бар. Аны туура түшүнүү керек. Ой жүгүртүү, интеллект жагынан алганда киберспорттун пайдалуу жактары көп" — деди Саймасаев.

Ошондой эле адис киберспорт боюнча акыркы эл аралык мелдеште 1-орунга 35 миллион доллар коюлганын, бирок андай деңгээлге чыгуу үчүн көп машыгуу керектигин кошумчалады.

Белгилей кетсек, киберспорт видео оюндардан турган жекелик жана командалык мелдеш. Кыргызстанда расмий түрдө спорттун түрү катары катталган.

41
Белгилер:
Баяман Саймасаев, интеллект, киберспорт
Тема боюнча
Кыргызстанда Counter Strike жана Dota оюндары боюнча федерация пайда болду
Улуттук банктын Нак акча менен иш алып баруу башкармалыгынын башкы адиси Эмил Курманалиев

Курманалиев: Кыргызстандын улуттук валютасы төрт ирет өзгөрүүгө учурады

48
Улуттук банктын Нак акча менен иш алып баруу башкармалыгынын башкы адиси Эмил Курманалиев сомдун тарыхында Кыргызстандын улуттук валютасы төрт ирет өзгөргөнүн айтты.
Курманалиев: Кыргызстандын улуттук валютасы төрт ирет өзгөрүүгө учурады

1993-жылы 10-майда үч тыйын жана үч сом номиналындагы банкноталар жүгүртүүгө чыгарылган. Ал учурда бир доллар төрт сомго барабар эле. Бул тууралуу Эмил Курманалиев Sputnik Кыргызстан радиосунун эфиринде маек куруп жатып билдирди.

Анын айтымында, кир жукпаш үчүн сомдун алды-артына атайын лак колдонулат.

"Биринчи сериядагы 1, 10, 50 тыйын жана 1, 5, 20 сом кагаз банкноталар өткөөл мезгилдин акчасы деп айтылат. Булардын коргоо элементи бир гана бүркүт тартылган суу белгисинен турган. Бүгүнкү күнгө чейин кыргыз сому төрт ирет жаңыртылып, бир жолу өркүндөтүлүп, бир эстелик банкнотасы чыгарылды. 1994-жылы турукташуу мезгилинин жакшыртылган экинчи сериясындагы 50, 100 сомдук банкноталар кошулган. Анда белгилүү маданият ишмерлеринин аты, сүрөтү жайгаштырылып, артында тарыхый архитектуралык эстеликтер жана жерлер чагылдырылган. Суу белгиси өзгөрүп, бардыгында акын Токтогул Сатылгановдун портрети болгон. 1997-2002-жылдары жогорку деңгээлдеги коргоо элементтерине ээ үчүнчү сериядагы банкноталар чыгарылды. Мында 200, 500 жана 1000 номиналы чыкты. 2008-2009-жылдары алгачкы металл монеталар пайда болду. 2010-жылы төртүнчү серия чыгып, мында эң төмөнкү номиналдагы банкнота 20 сом, ал эми эң жогорку 5000 сом болду. Бардык акчанын көлөмү 1,5-2 сантиметрге кичирейтилген. 2017-жылы ушул эле серия модификацияланып чыгарылды. Берки сериялардан айырмаланып портрет классикалык гравировка ыкмасы менен түшүрүлгөн. Маск деген жаңы коргоо элементи бар", — деди Курманалиев.

Адис 2017-жылы 2000 сом номиналындагы эстелик банкнота жүгүртүүгө чыкканын, ал Кыргыз мамлекеттүүлүгүнүн тарыхын чагылдырган оригиналдуу дизайнга жана эң мыкты заманбап коргоо элементтерине ээ экенин кошумчалады.

48
Белгилер:
тарых, сом, акча, Эмил Курманалиев
Тема боюнча
Миллиарддар... Кардарлар Кыргызстандын банктарында канча акча сактайт?
Абактын терезеси. Архив

Сокулук РИИБдин убактылуу кармоо жайында бир киши көз жумду. Ишти УКМК иликтейт

0
(жаңыланган 00:35 03.03.2021)
Ишти ар тараптуу жана объективдүү иликтөө үчүн текшерүү дайындалган. ИИМ, Чүй ОИИБи менен прокуратура жетекчилиги аны көзөмөлгө алган.

БИШКЕК, 3-мар. — Sputnik. Сокулуктагы убактылуу кармоочу жайда бир киши каза болгонун Чүй облустук ички иштер башкармалыгынын маалымат кызматы кабарлады.

2-март таң эрте Сокулук райондук милициясынын убактылуу кармоочу жайынын күзөтчүсү камактагы 51 жаштагы эркек кишини эс-учун жоготкон абалда тапкан.

"Окуя болгон жерге дароо Тез жардам кызматы чакырылып, медиктер киши көз жумганын аныкташкан. Анын өлүмүнүн себебин аныктоо үчүн экспертиза дайындалды", — деп айтылат билдирмеде.

Каза тапкан адам Кылмыш-жаза кодексинин 200-беренеси ("Уурулук") менен шектелип, эки айга камакка алынган.

Ишти ар тараптуу жана объективдүү иликтөө үчүн текшерүү дайындалган. ИИМ, Чүй ОИИБи менен прокуратура жетекчилиги ишти көзөмөлгө алган. Аталган факт каттоого алынып, чогултулган материалдар кошумча иликтөө үчүн УКМКга өткөрүлүп берилген.

0
Белгилер:
шектүү, өлүм, милиция, Сокулук району, Чүй облусу
Тема боюнча
Бүгүн таңда Кара-Сууда үй ээсин өлтүрүп, сейфин алып кетишти. Эки шектүүнүн сүрөтү