Жогорку Кеңештин депутаты Эмил Токтошев

Токтошев: бир тонна күйүүчү майга 2000 сомдон салык алуу сунушталууда

96
(жаңыланган 15:30 15.02.2021)
Жогорку Кеңештин депутаты Эмил Токтошев соңку жылдарда чет элден келген грант, насыялардын жардамы менен өлкөдөгү жолдор кыйла жакшырып калганын айтты.
Токтошев: бир тонна күйүүчү майга 2000 сомдон салык алуу сунушталууда

Жол курууга карыз, грант алынып ал бюджеттен төлөнүүдө. Ошондуктан жол тармагын өзүн-өзү камсыздай алгыдай система түзүү боюнча аракеттер көрүлүшү керек. Бул тууралуу Эмил Токтошев Sputnik Кыргызстан радиосуна маек куруп жатып билдирди.

Анын айтымында, өлкөдө жолго кам көрүү үчүн бир жылда орточо эсеп менен 10 миллиард сом керектелет.

"Соңку жылдарда чет өлкөдөн келген кредит, гранттардын көпчүлүгү жол тармагына жумшалган. Натыйжада жолдорубуз мурдагыга салыштырмалуу кыйла жакшырып калды. Коронавируска байланыштуу экономикалык кризис болуп, киреше төмөндөдү. Анын үстүнө мамлекеттин карызы 5 миллиард долларга жетейин деп калды. Мындан ары чет өлкөдөн грант, кредит келбей калышы ыктымал. Келечекте жол тармагы өзүн-өзү камсыздай ала турган системасын түзүү аракеттери көрүлүшү зарыл. Ошондуктан "Жол фонду жөнүндө" мыйзам долбоору сунушталып, коомдук талкууга коюлду. Ага ылайык атайын фонд түзүлүп, ошол каражат менен жолду камсыздоо каралган. Фондго каражат кайдан алынат? Мыйзамда 2021-жылдан тарта бир тонна күйүүчү майга 2000 сомдон салык киргизүү сунушталууда. Бул адилет чечим, анткени учурда жол куруу үчүн алынган карыз бюджеттен, башкача айтканда, жарандардын эсебинен төлөнүүдө. Ал эми салык төлөөчүлөрдүн арасында унаа айдабагандар дагы бар. Ошондуктан ким жолду көп колдонсо, ошого жараша салык төлөнүшү шарт", — деди Токтошев.

Депутат ошондой эле оор габариттүү унааларга кошумча салык төлөө дагы колго алынышы керектигин кошумчалады.

Белгилей кетсек, Жогорку Кеңеште Жол фондун түзүү боюнча мыйзам долбоору демилгеленип, коомдук талкууга коюлду. Анда күйүүчү майга салыкты алты жыл катары менен эки сомдон кымбаттатуу, жүк ташуучу унаалардан жол акы алуу, кымбат унааларга ашкере байлык салыгын киргизүү сунушталууда.

96
Белгилер:
экономика, мыйзам, жол куруу, Эмил Токтошев
Тема боюнча
Бир чакырым жүрсөң 10 сом төлөйсүң. Депутаттар сунуштаган мыйзамдын чоо-жайы
Учкун ААКтын өндүрүштүк бөлүмүнүн башчысы Нурайым Токтомушева

Токтомушева: "Учкун" ААКтын негизделгенине 95 жыл болду

20
"Учкун" ААКтын өндүрүштүк бөлүмүнүн башчысы Нурайым Токтомушева мамлекеттик маанидеги бардык документ, кагаздарды басып чыгарууга аталган ишкананын мүмкүнчүлүгү бар экенин, болгону басмакананы модернизациялоо керектигин айтты.
Токтомушева: "Учкун" ААКтын негизделгенине 95 жыл болду

"Учкун" ачык акционердик коому 1926-жылы негизделген. Ушул эле жылы 7-ноябрда эң биринчи кыргыз гезити араб арибинде чыккан. Ал эми 1930-31-жылдары басма үйүнүн имараты курула баштаган. Бул тууралуу Нурайым Токтомушева Sputnik Кыргызстан радиосунун эфиринде маек куруп жатып билдирди.

Анын айтымында, басмакана мамлекеттик баалуу кагаздарды да басып чыгарат.

"Басмаканага жабдыктарды Алматы, Ташкенттен алып келишкен. Фрунзеде бул жаатта атайын адистерди даярдоо үчүн фабрика-заводдук окуу ачылган. 1967-жылы "Правда" гезитинин биринчи нускасы чыккан. 2019-жылы сатып алуулар мыйзамына мамлекеттик маанидеги документтер мамлекеттик ишканада басылсын деген өзгөртүү киргизилген. Бул боюнча президенттин алдындагы иш башкаруу типографиясы, "Гознак" ЖЧКсы, "Учкун" ААКсы арасында тендер жүргүзүлгөн. Анын жыйынтыгы менен "Учкун" ишканасы Мамлекеттик каттоо кызматынын туулгандыгы, никелешүү тууралуу жана башка күбөлүктөрдү басып чыгарат. Андан тышкары, аттестация, диплом, ошондой эле кадастрдын тендеринин негизинде мамлекеттик актылар, кызыл китептер басылууда. Азыр эми окуу китептери ар башка басмаканаларда жана чет өлкөдө басылып жатат. Чар жайыт кылбай мамлекеттик ишкананы борборлоштуруп каржыласа, сапаттуу китептерди чыгарууга мүмкүнчүлүгүбүз бар", — деди Токтомушева.

Адис президенттик шайлоо жана референдум өткөрүлгөндө жети миллион бюллетенди мыйзамга ылайык 10 күндө басып чыгарышканын кошумчалады.

20
Белгилер:
басмакана, Учкун, Нурайым Токтомушева
Тема боюнча
Министр: китептерде ката кетпеши үчүн "Окуу китеби" борбору ачылды
Кыргыз Республикасынын эмгек сиңирген экономисти, легендарлуу парламенттин депутаты Орозбек Акимбаев

Акимбаев: биз кабыл алган туу азыркыдай эмес болчу

175
(жаңыланган 15:35 03.03.2021)
Кыргыз Республикасынын эмгек сиңирген экономисти, легендарлуу парламенттин депутаты Орозбек Акимбаев депутаттар кабыл алган туу азыркыдай болбогонун айтты.
Акимбаев: биз кабыл алган туу азыркыдай эмес болчу

Кыргыз Республикасы Советтер Союзунан бөлүнүп, эгемендүү мамлекет болгондон кийин туу, герб, гимнин бекитүү үчүн конкурс жарыяланган. Чыгармачыл адамдар Жогорку Кеңештин залында бир жумага жакын туунун көргөзмөсүн өткөрүп, авторлор менен идеясын ортого салып отуруп, 3-марттагы жалпы талкууда азыркы тууну кабыл алганбыз. Бул тууралуу Орозбек Акимбаев Sputnik Кыргызстан радиосунун эфиринде маек куруп жатып билдирди.

Анын айтымында, тууга көлдүн, жайлоонун, пахтанын, буудайдын жана тоонун сүрөттөрү тартылган 30-40ка жакын варианттар болгон.

"Желектин авторлору Жусуп Матаев, Эдил Айдарбеков, Маматбек Сыдыков, Бекбосун Жайчыбеков жана Сабыр Иптаровдун эмгеги жактырылган эле. Кызыл түстөгү туунун ортосуна кырк нуру тегиз чачыраган алтын түстөгү күн алкагынын, анын ичине кыргыз боз үйүнүн түндүгүнүн сүрөтү түшүрүлгөн. "Көк болуш керек", "жок, кызыл болсун" деп түсү боюнча да тартышуулар болду. Кыргызда жамандык болгондо көк, кара киет деп кызыл өңгө токтолдук. Башында желекке Американыкындай канча облус болсо ошончо жылдыз түшүрөлү деп чыгышкан эле. Кызыл туу кайраттуулуктун белгиси, мекенибизди коргоо үчүн канын-жанын аябаган адамдардын канынын түсү деп азыркы туу тандалды. Белгилей кетчү нерсе, негизи тууда азыркыдай эмес, бири узун, бири кыска нур чачырап турган. Кабыл алуунун эртеси желекти жасап келип жайса эле ал күн карамага окшоп калыптыр. Ошондо мен Медеткан Шеримкуловго "бул биз кабыл алгандай болбой калыптыр" десем, ал "ай Оке, Аскар Акаевич менен тартышып эми жараштык, кое турчу муну, кийинчерээк түзөп алабыз" деди эле. Ошол боюнча калып кетти. Элдин көзү көнүп, каныгып калгандан кийин тарыхка кайрылып аны оңдоонун зарылчылыгы барбы, эми аны азыркы жаштар карап көрөр", — деди Акимбаев.

Легендарлуу депутат 350 депутаттын 200дөн ашыгы азыркы тууну кабыл алууну колдогонун кошумчалады.

175
Белгилер:
туу, эгемендүүлүк, Символ, желек
Тема боюнча
Дубанаев: гербди Асейин Абдраев деген сүрөтчү тарткан
Партктагы гүлдөр. Архив

Бейшембиге карата аба ырайы

0
(жаңыланган 21:08 03.03.2021)
4-мартка караган түнү республиканын көпчүлүк аймактарында жаан, тоо этектеринде жана тоолуу райондорунда кар жаашы күтүлөт. Жолдорго муз тоңуп, тайгак болот.

БИШКЕК, 3-мар. — Sputnik. Бейшемби күнү өрөөндөрдө жаан-чачын күтүлбөйт. Батыштан соккон шамалдын ылдамдыгы секундасына 4-9 метрден кээ бир аймактарда 14 метрге жетет. Бул тууралуу Кыргызгидромет билдирди.

Абанын температурасы Чүй, Талас жергесинде +9...+14 градус, Ош, Жалал-Абад жана Баткен облустарында +10...+15, Ысык-Көлдө +3...+8, ал эми Нарын аймагында -1...+4 градуска чейин жылуу болору айтылды.

Борбор калаада күн ачык болуп, күндүн табы +12...+14 градуска чейин көтөрүлсө, Ош шаарында мезгил-мезгили менен жаан жаап, +13...+15 градус жылуу болот.

0
Белгилер:
март, Кыргызстан, аба ырайы
Тема боюнча
Төө-Ашуудагы тайгактан жүк ташуучу унаалар өйдө чыга албай жатат. Видео