Этнический кыргыз из Китая, акын-импровизатор и певец Акматбек Султан уулу во время беседы на радио Sputnik

Султан уулу: Кыргызстанда кедей жашоо өмүргө, табиятка кылган кыянатчылык

1482
Кытайлык кыргыз, төкмө акын, ырчы Акматбек Султан уулу мурда билген Кыргызстан менен өзү келип көргөн Кыргызстандын айырмачылыгын айтып берди.

Мен Кытай Эл Республикасынын Кызыл-Суу автономиялык облусунда жайгашкан Улуу-Чат районунан болом. Биздин Ак-Секи деген жайлообуз Чатыр-Көлдүн аркы бетинде жайгашкан. Бала кезимде ал жерде кой кайтарып жүрүп көлдү, ал жердеги Арпанын Ала-Тоосун көрүп ушул жакка өтө турган күн бар бекен деп дегдечүмүн. Бул тууралуу Акматбек Султан уулу Sputnik Кыргызстан радиосунун эфиринде айтып берди.

Султан уулу: Кыргызстанда кедей жашоо өмүргө, табиятка кылган кыянатчылык

Акын Кыргызстанда кедей жашагандын өзү өмүргө, табиятка кылган кыянатчылык дейт.

"2014-жылы окуганы Кыргызстанга келип калдым. Келгенде эле жетекчилерди аябай шыбап, жамандай беришкенин байкадым. Мен эмне эле минте беришет деп түшүнчү эмесмин. Кыргыз болгондон кийин бири-бирибизди колдобойбузбу, кыргыздарды кыргыздар башкарса жакшы да дечү элем. Бирок чындыгында жамандагандай эле бар экен. Мен эми гана түшүнүп отурам. Жетекчилер мамлекетке күйбөптүр. Азыр чоң кызматта иштеген адамдардын үйлөрүнө барып жүрөбүз. Алардын үйү филармониядан жакшыраак десем аша чапкандык болбойт. Биз СССРден калган эски маданий борборлорду кайрадан сырдап, жамап-жаскап урунуп келе жатабыз. Менин жүрөгүмдү оорутканы — көп адамдардын улуттук амбициясы, максаты жок экен. Чыңгыз Айтматовдун "Эгемендүү мамлекет болдук. Эми бизде зор милдет бар. Дүйнөлүк эл менен атаандашып, улуу жарышта чаңгырап калбай, алдыга чыгышыбыз керек" деген жакшы сөзү бар. Андай болуш үчүн акылдуусуна жол берип, башчысы бир, кошчусу миң болгондо заман өнүгөт. Андан тышкары, биздин калк өтө жалкоо экенин байкадым. Негизи Кыргызстанда кедей жашагандын өзү өмүргө, табиятка кылган кыянатчылык. Себеби жерибиздин таза суусу, куурай сайсаң гүлдөп калчудай күрдүү кара топурагы бар. Алсак, кытай эли эмгек жана улуу максатка бирдей умтулганы үчүн өнүгүп жатат. Булардан үлгү алсак туура болчудай", — деди Султан уулу.

Акын кыргызстандыктар той-аш, шапар тепкенди азайтып, убакытты туура, натыйжалуу пайдаланууну үйрөнүшү керектигин кошумчалады.

Толук вариантын төмөнкү видеодон көрүңүздөр:

 

1482
Белгилер:
өнөр, төкмө акын, айтыш, акын
Тема боюнча
Төкмө акын Идрис Айитбаев: сындап ырдаганым үчүн сес көрсөткөн "чоңдор" болгон
Bio-KG органикалык кыймыл федерациясынын жетекчиси, мурдагы айыл чарба министри Искендербек Айдаралиев

Айдаралиев: чоң пландарды түзө бербей майда иштерди аткарууга мезгил келди

40
Bio-KG органикалык кыймыл федерациясынын жетекчиси, мурдагы айыл чарба министри Искендербек Айдаралиев өлкөдө органикалык продукцияны өндүрүү популярдуу болуп бара жатканын айтты.

Буга чейин айыл чарба тармагын өнүктүрүү боюнча чоң-чоң пландар түзүлүп, бирок каражаттын жетишсиздигинен кагаз жүзүндө калып калчу. Эми бул багытты алдыга сүрөө үчүн план түзүү эмес, майда, бирок маанилүү аракеттерди жасоо керектигин баарыбыз түшүндүк. Мындай пикирин Искендербек Айдаралиев Sputnik Кыргызстан радиосунда маек куруп жатып билдирди.

Айдаралиев: чоң пландарды түзө бербей майда иштерди аткарууга мезгил келди

Анын айтымында, Кыргызстанда органикалык продукцияларды өндүрүүнү колго алуу үчүн дагы көп жумуштар жасалуусу керек.

"Дүйнө жүзү боюнча айыл чарба маанилүү тармак. Анын ичинде Кыргызстанда өзгөчө. Бирок биз буга чейин аталган багытты өнүктүрүү үчүн башынан аягына чейин улам жаңыртып план жазып, анан алар ишке ашпай эле кагаз жүзүндө кала берчү. Мына ушинтип убакыттан уттуруп отуруп ушул күнгө келдик. Эми мамлекеттик тиешелүү органдар, эл деле чоң план түзүү менен эмес, майда иштерди кечиктирбей жасоо менен заманбап дыйканчылыкты колго аларыбызды түшүндүк. Спорттогудай эле бул багытта да ар бир мамлекеттин өзүнүн артыкчылыктары жана чабал жерлери бар. Биздин өлкө дүйнөгө органикалык азык-түлүктөрү менен тааныла алат. Учурда биз уюштурган "органикалык аймак" долбоору ушул багытта иш алып барууда. Республика боюнча белгилүү бир жерлерди тандап алып, жергиликтүү тургундарды окутуулардан өткөрүп, ошол чөлкөмдү органикалык аймакка айландыруу аракеттерин көрүп жатабыз. Азырынча долбоор Ысык-Көл, Нарын, Чүй облустарында ишке ашууда",— деди Айдаралиев.

Ал органикалык продукция өнүктүрүү менен киреше табуу дароо эле ишке ашпастыгын, убакытты талап кыларын кошумчалады.

40
Белгилер:
келечек, ишкерлик, аймак, органика, Искендербек Айдаралиев
Тема боюнча
Айдаралиев: органикалык продукция өндүргөндөр мамлекеттен колдоо табат
Кыргызстандыктарды жумушка орноштуруу менен алектенген билим берүү борборунун башчысы Нурдин Шейшенов

Шейшенов: студенттерди үч жылга Германияда иштеп-окуп келүүгө жөнөтүүдөбүз

49
Кыргызстандыктарды жумушка орноштуруу менен алектенген билим берүү борборунун башчысы Нурдин Шейшенов Германияга иштөө үчүн алгач ирет студенттерди 2012-жылы жөнөтүшкөнүн айтты.

2020-жыл март айынан баштап Германия Европа өлкөлөрүнөн башка да мамлекеттерге жумушка орношуу мүмкүнчүлүгүн ачты. Пандемиядан улам бул программа анча актуалдуу болгон жок. Азыр студенттерден тышкары диплому бар, немис тилин билген адистерти жумушка орноштуруудабыз. Бул тууралуу Нурдин Шейшенов Sputnik Кыргызстан радиосунун эфиринде билдирди.

Шейшенов: студенттерди үч жылга Германияда иштеп-окуп келүүгө жөнөтүүдөбүз

Анын айтымында, кыргызстандыктардын Европа өлкөлөрүндөгү сезондук жумушка орношуусуна жардам берген борборлордун кызматы барган сайын суроо-талапка ээ болуп жатат.

"Биздин программа адамдарды башка мамлекетке жумушка орноштурган акы төлөнүүчү кызмат. Мурда 3000-4000 долларга документин даярдап, иштөөгө жөнөтүлсө, бара-бара студенттерге ылайыктап бааны төмөндөткөнгө аракет кылдык. Айрым балдар 500 долларга документин даярдап Германияга кете алышты. Ошондой эле биздин көрсөткөн кызматка барып иштеп биринчи айлыгын алгандан кийин төлөө мүмкүнчүлүгүн түздүк. Программа боюнча сентябрда студенттер немис тилин окуп башташат. Биздин Германияда 80ден ашык өнөктөшүбүз бар. Декабрда алар Кыргызстанга келип сүйлөшүү өткөрүп, документтерди даярдап баштайт. Майдын аягынан баштап студенттердин биринчи этабы кетет. Пандемияга байланыштуу биздин кызматка өзгөрүүлөр кирди. Азыр жайкы мезгилде гана эмес, бир жылдык практика, үч жылга чейин  иштеп-окуп билим алууга жиберүүдөбүз. Үч жылдык келишимде 80 пайызы практика, калганы теория түрүндө окутулат. Жыйынтыгында колледж деңгээлинде диплом алып, ал жакта иштеп калат. Аны менен бирге IT тармагында иштеп, окуу мүмкүнчүлүгүн карап жатабыз. Студенттердин тил билүү деңгээлине жараша ар кайсы тармакка жумушка орношо алат. Алсак, тилди эң жакшы билгендер гастрономия, отель, соода үйлөрүндө иштешет. Ал эми заводдорго, айыл чарба, талаа иштерине тил билбей эле барса болот", — деди Шейшенов.

Ал аталган борбор жиберген адамдар ар кандай кырдаалда калса, маселен, жол эрежелерин билбей жатса же документтери жоголсо эмне кылып, кимге кайрылууну үйрөтүшөрүн кошумчалады.

49
Белгилер:
каникул, жумуш, Германия
Тема боюнча
Сулайманов: сыртта окуу үчүн мотивациялык кат, резюме мыкты болушу керек
Шахта. Архивдик сүрөт

Тажикстан: Исфарадагы көмүр шахтасында жарылуу болду, каза тапкандар бар

0
(жаңыланган 00:28 25.07.2021)
Алдын ала берилген маалыматта, бир адамдын көз жумуп, дагы сегиз кишинин жарадар болгону айтылды.

БИШКЕК, 25-июл. — Sputnik. Тажикстандын Согду облусуна жакын жердеги Исфара көмүр шахтасында катуу жарылуу болгондугун Sputnik Тажикстан жазды. 

Кырсык Согду облусундагы Шураб аймагынын жанындагы кенде болгон.

"Шураб" шахтасындагы жарылуу газдын чыгышынан улам болгонун айтышты", — деди Исфара мэриясынын маалымат катчысы Зубайдулло Шомадов.

Алдын ала берилген маалыматка таянсак, бир адам каза таап, дагы сегиз киши жаракат алган.

Учурда кырсык болгон жерде Өзгөчө кырдаалдар комитетинин кызматкерлери, куткаруучулар жана дарыгерлердин жүргөнү айтылды.

Шураб кени Тажикстандын түндүгүндөгү эң ири кендердин бири. Ал Түркстан кырка тоолорунун этегинде жайгашкан. Бул жерден алынган көмүрдү негизинен медициналык жана билим берүү жайлары колдонот. Бийликтин билдиргенине караганда, мындай кырсык ондогон жылдардан бери болгон эмес.

0
Белгилер:
жарылуу, шахта, көмүр, Тажикстан
Тема боюнча
Дубайда катуу жарылуу болду. Видео