Россиянын тышкы иштер министри Сергей Лавров

Сый кетти. Сергей Лавровдун Россия АКШ алакасы тууралуу маеги. I бөлүк

160
(жаңыланган 16:41 28.04.2021)
Россиянын тышкы иштер министри Сергей Лавров РФ тарап жагдайдан чыгуунун жолун кандай көрөрүн, америкалык саясатчылар ага даяр болуп-болбогонун РИА Новости агенттигине берген маегинде айтып берди.

Соңку убакта Россия менен Кошмо Штаттардын мамилеси каатчылыкта экени анык: америкалык санкциялар биринин артынан бири салынып, дипломаттар чыгарылып, ага Россия тарап да чара көрүүгө аргасыз. Ал эми Вашингтон кайра-кайра Москваны “жазалоону” убада кылууда.

РФ тышкы иштер министри Сергей Лавров ушул таптагы эки тараптуу алакалар “кансыз согуш” маалындагыдан да начар экенин, эгер Америка “кызыл чийинден” өтүүгө аракет кылса, Россия кандай жооп кайтарарын түшүндүрдү.

— Мындан ары эмне болот? Окуя кандай нук алышы ыктымал?

— Эгер бул тек гана бизден көз каранды болгондо кадимки мамилеге кайтмакпыз, АКШдагы Россиянын дипломаттарынын ишин чектөө боюнча көрүлгөн чаралардын баарын жокко чыгаруу алгачкы кадам болмок.

Буга үндөш эле аракетибиз ага карата көрүлгөн чара болгон. Муну Байден кызматына киришери менен администрациясына сунуштаган элек. Бул тууралуу Блинкендин да эсине салгам. Барак Обама кызматынан кетерден эки-үч жума мурун баштап кеткендердин баары токтотулса, нормалдуу иш алып баруу үчүн көрүнүктүү кадам болмоктугун айткам. Россиялык менчиктин Вена конвенциясын бузуу менен камакка алынышы, россиялык дипломаттарды чыгарып салуу өңдүү ал кездеги аракеттер ошол менен токтоп калган жок.

Айтмакчы, биз бир топ сабыр кылдык, андай кадамдарга чара көрүүдөн оболу 2017-жылдын жай мезгилине чейин күтпөдүкпү. Анткени Трамптын администрациясы мурдагы кесиптештери кетип жаткандагы туруксуз көрүнүштөргө көңүл бурбай турууну өтүнгөн эле.

Анткен менен Трамптын администрациясы да жагдайды жөнгө сала албады, ошондуктан биз да жооп кайтарууга аргасыз болгонбуз. Бирок америкалыктар тим калган жок. Байдендин администрациясы да ошол нукта жол улап баратканына күбө болуп турабыз.

Инаугурациядан көп өтпөй Путин менен Байдендин баарлашуусунда, кийин мамлекеттик катчы Блинкен менен сүйлөшкөнүмдө деле Россия менен мамилеге терең сереп салынып жатканы, сүйлөшүүнүн жыйынтыгында көп нерсе түшүнүктүү болору айтылган. Бирок ошол сүйлөшүүнүн корутундусу жаңы санкциялар болуп чыкты. Аларга жараша гана эмес, мурда биз далай ирет эскертип келгендей акыры ассиметриялык жооп кайтарууга аргасыз болдук.

Ал эми биздин алакалардын стратегиялык жактан алып карасак, Вашингтондогулар да биз сымал эле дүйнөдөгү стратегиялык туруктуулук үчүн жоопкерчилигин түшүнөт чыгар. Булар – РФ менен АКШнын, жарандарыбыздын турмушун, алардын байланыштарын, бизнес жүргүзүү жана гуманитардык долбоорлорду ишке ашырууну бир топ кыйынчылыкка тушуктурган гана эмес, сөздүн кеңири маанисинде эл аралык коопсуздукту олуттуу тобокелдиктерге кептеген көйгөйлөр.

Жо Байдендин ABC каналындагы дүң болгон маегинде айтылган пикирлерди кандай кабыл алганыбызды билесиздер. Кошмо Штаттардын президентинин жолугушуу өткөрүү боюнча сунушуна Путин кандай жооп кылганынан да кабардарсыздар. Биз туура эле кабыл алдык.

Мындай демилгенин бардык аспектилерин түшүнгүбүз келет, азыр аны талдоо менен алекпиз. РФ президенти федералдык кайрылуусунда белгилегендей, эгер АКШ үстөмдүк кылуу (суверен) позициясы менен аракет этүүнү токтотсо, эгер бир полярдуу дүйнөнү калыптандыруунун келечеги жок экенин аңдаса, батыш өлкөлөрү баш ийген кандайдыр бир түзүмдү жаратуудан жана бүтүндөй батыш лагери өз тууларынын алдына ар кыл континенттеги бөлөк өлкөлөрдү Кытай жана Россия Федерациясына каршы тукуруу аракеттеринен баш тартса, эгер АКШ акыры БУУнун Уставында жазылгандай суверендүүлүктү, территориялык бүтүндүгүн сыйлоо, мамлекеттердин ички иштерине жана суверендик теңдигине кийлигишпөө өңдүү принциптери тегин жерден жазылбаганын түшүнсө, жөн эле уставдык милдеттенмелерин аткарып, кызыкчылыктардын балансын таап, ошонун негизинде башка өлкөлөрдөй эле биз менен да өз ара сый диалог жүргүзсө... Антпесе колубуздан эч нерсе келбей калат. Президент өз кайрылуусунда так айткандай эле, эгер биздин кызыкчылыктарга жооп берсе, биз эң кеңири макулдашууларга даярбыз. Анан, албетте, буга чейин айтылгандай эле өзүбүз аныктай турган “кызыл чийинден” өтүүгө кандай гана аракет болбосун катуу чара көрөбүз.

— Алар муну түшүнүп, сюзерендик позициядан баш тартары канчалык реалдуу? Себеби үмүт — жакшы нерсе, бирок реалдуулук таптакыр бөлөк эмеспи.

— Үмүт артканым жок. Кандай шарттарда биз сүйлөшүүгө даяр экенибизди санадым.

— Эгер андай болбосочу?..

— Анда бул – алардын тандоосу. Демек, сиз айткандай, же “кансыз согуш”, же андан да начар шарттарда жашоого өтөбүз. Менимче, “кансыз согушта” чыңалуу болгон, албетте, анан калса абдан олуттуу, тобокелдүү кырдаалдар, кризистик жагдайлар көп эле түзүлгөн. Бирок ал кезде азыр бизде таңсыктыгы сезилип турган өз ара сый сакталган эле.

Жакында эле Ак үйдүн расмий өкүлү Россияга карата санкциялар улантыларын, алар Вашингтон болжогон эле натыйжаны берерин, санкциялар АКШ менен Россиянын мамилесиндеги чыңалууну төмөндөтүүнү көздөй турганын билдирди. Буга бир пикир айтуудан да алысмын. Мындай маанидеги билдирүүлөр Ак үйгө аброй алып келбей турганы баарына түшүнүктүү болсо керек.

— Дипломаттар начар иштейт, мамиле түзө алышпайт, биз өжөрлөнө беребиз, РФтин позициясы таптакыр ийкемдүү эмес, ошондуктан алакабыз начар деген пикирлерди да кулагым чалганы бар.

— Мындай пикирлерди мен да окуп калам, дагы жакшы бизде сөз эркиндиги бар, батыштын көп өлкөлөрүнө, ошол эле АКШдагыга караганда бизде кыйла корголгон. Оппозициялык интернет-ресурстарды, газеталарды окуйм, алар өз көз карашын билдирүүгө акысы бар. Аларда негизинен “Батыш менен тирешпесек, азыр бизде пармезан (сырдын түрү – ред.) да, чындап жетпей жаткан дагы көп нерселер болмок” деген ойлор камтылат. Эми бул тар, бир тараптуу көз караш. Түшүндүрбөй туруп Батышта азык-түлүк сатып алууга бөгөт коюлган кезде бул жооп катары көрүлгөн чара болгон. Тек гана биз сырттан сатып алууну токтотуп салдык, импорттун ордун толтуруу менен алектендик.

— Блинкен менен кезигериңизди болжоп турасызбы? Жолугушуу качан болушу ыктымал? Дегеле ал жакын арада ишке ашырылышы мүмкүнбү?

— Телефон аркылуу байланышканыбызда дипломатиялык этикетке ылайык мен аны куттуктадым. Кырдаалды баалоо боюнча пикир алмаштык.

Менимче, жай, достук жана прагматикалык баарлашуу болгон. Америкалык кесиптештер мамлекеттик департаментте өз штатын курап бүткөндө дипломатиялык миссиялардын иштешинен тарта стратегиялык туруктуулук жана башкаларга чейинки көптөгөн маселелер боюнча өз ара пайдалуу макулдашууларды издеп, байланыштарды калыптандырууга даяр болорубузду белгилегем.

Америкалык жана россиялык бизнес кызматташуусун кеңейтүүгө кызыкдар. Бул тууралуу өткөндө эле Америкалык-россиялык соода палатасы бизге маалымдады. Ыңгайы келсе кайра сүйлөшүүгө мүмкүн болчу талаада кандайдыр биргелешкен көп тараптуу иш-чаралар болоруна токтолдук. Азырынча Кошмо Штаттар тарабынан эч кандай сигнал түшө элек.

Иш-чаралар календары жөнүндө айтсак, үч аптадан соң Россия Арктикалык кеңештеги төрагалык эстафетаны Исландиядан өткөрүп алмакчы. Рейкьявикте, билишимче, 20-21-майда министрлердин кезигүүсү пландалууда. Эгер америкалык делегацияны мамлекеттик катчы баштап келсе, анын кызыкдарлыгы болсо мен сүйлөшүүгө даярмын.

Арктикалык кеңешке эки жыл төрагалык кыларыбызды эске алуу менен исландиялык кесиптештерибизге алдыдагы министрлердин жолугушуусуна катышарымды кабарлагам.

160
Белгилер:
саясат, экономика, кызматташуу, бизнес, Жо Байден, мамиле, АКШ, Россия, Сергей Лавров
Тема боюнча
АКШ эмне себептен бардык согуштарда утулууда? Батыштагы басылмага сереп
Кыргызстандын жана Россиянын желектери. Архив

Путин: Россия менен Кыргызстандын мамилеси бекемделүүдө

169
(жаңыланган 16:33 18.05.2021)
Россиянын лидери 24-майда Сочиде Кыргызстандын президенти Садыр Жапаров менен жолугарын айткан.

БИШКЕК, 18-май — Sputnik. Кыргызстан менен стратегиялык өнөктөштүк жана союздаштык мамиле бекемделүүдө. Бул туурасында Россиянын президенти Владимир Путин билдирди.

Ал бүгүн Кыргызстандын Россиядагы элчиси Гүлнара-Клара Саматтан ишеним грамотасын кабыл алып, эки өлкөнүн мамилеси тууралуу кеп салган.

"Биздин өлкөлөрдү жалпы тарых бириктирип турат, бири-бирибизге өз ара ишеним жана урмат-сыйыбыз бар. Россия жана Кыргыз Республикасы соода-экономикалык, аскерий-техникалык, маданий, гуманитардык жана башка тармактарда эриш-аркак ийгиликтүү иш алып барып, Евразия интеграциясын өнүктүрүүгө биргеликте салым кошуп келет", — деген Путиндин сөзүн Кремлдин маалымат кызматы таратты.

Россиянын лидери 24-майда Сочиде ушул тема боюнча Кыргызстандын президенти Садыр Жапаров менен сүйлөшүү болорун кошумчалаган.

169
Белгилер:
Гүлнара-Клара Самат, Владимир Путин, мамиле, элчи, Кыргызстан, Россия
Тема боюнча
Владимир Путин Гүлнара-Клара Саматтан ишеним грамотасын кабыл алды
Жапаров Путин менен сүйлөшүп, чек ара чырын талкуулады
Путин Жапаров менен качан жана кайда жолугарын айтты
Россиянын президенти Владимир Путин. Архив

Владимир Путин Гүлнара-Клара Саматтан ишеним грамотасын кабыл алды

162
(жаңыланган 15:07 18.05.2021)
Гүлнара-Клара Самат Кыргызстандын Россиядагы элчиси болуп ушул жылдын февраль айынын аягында дайындалган.

БИШКЕК, 18-май — Sputnik. Россиянын президенти Владимир Путин Кыргызстандын Россиядагы атайын жана ыйгарым укуктуу элчиси Гүлнара-Клара Саматтан ишеним грамотасын алды. Бул тууралуу Кремлдин сайтында кабарланды.

"Президент Путин Кремлде өлкөгө жаңы келген 23 элчиден ишеним грамоталарын кабыл алды", — деп жазылат билдирүүдө.

Алардын арасынан Кыргызстандын элчиси Гүлнара-Клара Саматты дагы көрүүгө болот.

Эске салсак, Гүлнара-Клара Самат бул кызматка ушул жылдын февраль айынын аягында дайындалган.

162
Белгилер:
элчи, ишеним грамотасы, Гүлнара-Клара Самат, Владимир Путин, Россия
Тема боюнча
Президент Жапаров алты өлкөнүн жаңы элчилери менен таанышты. Сүрөт
Жапаров миссиясы аяктаган АКШ элчиси Луну кабыл алды
Аткаминер. Архив

Эсен Шерботоев "Кыргыз почтасынын" башкы директору болуп дайындалды

0
(жаңыланган 22:54 18.05.2021)
Шерботоев буга чейин өкмөттүн аппаратынын транспорт, курулуш жана байланыш бөлүмүндө эксперт болчу.

БИШКЕК, 18-май — Sputnik. Эсен Шерботоев "Кыргыз почтасы" ишканасынын башкы директору болуп дайындалганын аталган мекемеден билдиришти.

Тиешелүү буйрукка өкмөт башчы Улукбек Марипов кол койгон.

Бүгүн, 18-майда, министрлер кабинетинин төрагасынын орун басары жана санариптик өнүгүү министри Азамат Дыйканбаев Шерботоевди ишкананын жамаатына тааныштырды.

Министр жаңы директорго ийгилик каалап, почтанын ишине олуттуу колдоо көрсөтөрүнө ишене турганын айтты. Ал эми Шерботоев артылган ишеним үчүн ыраазычылык билдирди.

"Учурда байланыш жана коммуникация тармагынын санариптик трансформациялоо багытында динамикалык өзгөрүүлөр болуп жатат. Биргелешкен аракеттер менен почта ишин өркүндөтөбүз", — деди ал.

Шерботоев буга чейин өкмөттүн аппаратынын транспорт, курулуш жана байланыш бөлүмүндө эксперт болчу.

0
Белгилер:
Эсен Шерботоев, жетекчи, "Кыргыз почтасы" мамлекеттик ишканасы
Тема боюнча
"Кумтөрдүн" убактылуу тышкы башкаруучусу жамаатка тааныштырылды. Сүрөт
"Кыргыз почтасы" элди алдамчылардан сак болууга чакырды